ମାଡ଼ି ଆସୁଛି ଶକ୍ତିଶାଳୀ ଓମିକ୍ରନ୍‌, ୫୬ଟି ଦେଶ ଲଗାଇଲେଣି କଟକଣା

ଏବେ ଦକ୍ଷିଣ ଆଫ୍ରିକାରେ ପ୍ରଭାବ ବିସ୍ତାର କରିବାରେ ଲାଗିଛି ଓମିକ୍ରନ । ଚାରି ସପ୍ତାହରୁ କମ୍ ସମୟ ଭିତରେ ଦେଶରେ ସଂକ୍ରମଣ ହାର ବଢ଼ି ଚାଲିଛି ବୋଲି ସରକାରଙ୍କ ପକ୍ଷରୁ କୁହାଯାଇଛି । ସଂକ୍ରମଣ ବଢୁଥିବାରୁ ଦକ୍ଷିଣ ଆଫ୍ରିକା ସହ ଅନ୍ୟ ଦେଶଗୁଡ଼ିକ ବିମାନ ଯୋଗାଯୋଗ ଉପରେ କଟକଣା ଲଗାଇଛନ୍ତି । ଅଧିକ କଠୋର ହୋଇଛି ଆମେରିକା । ଆଫ୍ରିକୀୟ ଦେଶରୁ ଆସୁଥିବା ସମସ୍ତ ଯାତ୍ରୀଙ୍କ ନାଁ ପ୍ରଦାନ କରିବାକୁ ବିମାନ ଚଳାଚଳ କଂପାନୀକୁ ଆମେରିକା ସରକାର କଡ଼ା ନିର୍ଦ୍ଦେଶ ଦେଇଛନ୍ତି ।

ଖାଲି ସେତିକି ନୁହେଁ ଓମିକ୍ରନ ସଂକ୍ରମଣ ବଢୁଥିବା ପ୍ରାୟ ୧୪ଟି ଦେଶରୁ ଆସୁୁଥିବା ସମସ୍ତ ଯାତ୍ରୀଙ୍କ ତଥ୍ୟ ପ୍ରଦାନ ଲାଗି ଆମେରିକା ପ୍ରଶାସନ ପକ୍ଷରୁ ବିମାନ ସେବା କଂପାନୀକୁ କଡ଼ା ନିର୍ଦ୍ଦେଶ ରହିଛି । କରୋନାର ଅନ୍ୟ ମ୍ୟୁଟେସନ ଅପେକ୍ଷା ଓମିକ୍ରନ ଅଧିକ ସଂକ୍ରାମକ ଓ ଭୟାନକ । ଏଣୁ ଏହାର ସଂକ୍ରମଣ ଆଶଙ୍କାରେ ବିଶ୍ୱରେ ଅର୍ଥନୈତିକ ବଜାର କ୍ଷତିଗ୍ରସ୍ତ ହୋଇଛି ।

ଆଫ୍ରିକାରେ ଏବେ ସଂକ୍ରମିତ ଲୋକଙ୍କ ନମୁନାର ଜିନୋମ ସିକ୍ୱେନ୍ସିଂରୁ ସ୍ପଷ୍ଟ ହୋଇଛି ଯେ, ୭୪ ପ୍ରତିଶତ ନମୁନାରେ ଓମିକ୍ରନ ଭ୍ୟାରିଏଣ୍ଟ ରହିଛି । ତେବେ ଗତ ସପ୍ତାହରେ ଏହି ଭ୍ୟାରିଏଣ୍ଟର ନାମକରଣ ହୋଇଥିଲେ ବି ପ୍ରଥମେ ନଭେମ୍ବର ୮ ତାରିଖରେ ଗାଉଟେଙ୍ଗରୁ ସଂଗୃହୀତ ନମୁନାର ଜିନୋମ ସିକ୍ୱେନ୍ସିଂରୁ ଏହା ଜଣାପଡ଼ିଥିଲା ବୋଲି ଆଫ୍ରିକା ସ୍ୱାସ୍ଥ୍ୟ ଗବେଷଣା ସଂସ୍ଥା କହିଛି ।

ଦକ୍ଷିଣ ଆଫ୍ରିକାରୁ ଆସୁଥିବା ଯାତ୍ରୀଙ୍କ ପ୍ରବେଶ ଉପରେ କଟକଣା ଲଗାଇଛନ୍ତି ୫୬ଟି ଦେଶ । ଦକ୍ଷିଣ ଆଫ୍ରିକାରୁ ଆସୁଥିବା ସମସ୍ତ ବିଦେଶୀଙ୍କ ପ୍ରବେଶ ଉପରେ ଆମେରିକା ସହ ହଂକଂ, ଜାପାନ, ପର୍ତ୍ତୁଗାଲ ଓ ସ୍ୱିଡେନ୍ ପ୍ରଶାସନ ରୋକ ଲଗାଇଛି । କେବଳ ଯାତ୍ରୀଙ୍କ ପ୍ରବେଶ ଉପରେ କଟକଣା ଦ୍ୱାରା କରୋନାର ନୂଆ ଭ୍ୟାରିଏଣ୍ଟକୁ ରୋକିବା ସମ୍ଭବ ନୁହେଁ ବୋଲି ବିଶ୍ୱ ସ୍ୱାସ୍ଥ୍ୟ ସଂଗଠନ ପକ୍ଷରୁ ମଧ୍ୟ କୁହାଯାଇଛି ।

କରୋନାର ଡେଲ୍ଟା ଓ ଡେଲଟା ପ୍ଲସ ଭ୍ୟାରିଏଣ୍ଟ ଭଳି ଓମିକ୍ରନ ଦ୍ୱାରା ଯୁବପିଢ଼ି ଅଧିକ ସଂକ୍ରମିତ ହେଉଛନ୍ତି । ଯୁବକଙ୍କଠାରେ ରୋଗ ପ୍ରତିରୋଧକ ଶକ୍ତି ଅଧିକ ଥିଲେ ବି ଓମିକ୍ରନ ସଂକ୍ରମଣ କ୍ଷେତ୍ରରେ ଏହା କାମ କରୁନାହିଁ ବୋଲି ଦକ୍ଷିଣ ଆଫ୍ରିକାର ଜଣେ ବୈଜ୍ଞାନିକ କହିଛନ୍ତି । ଏପରିକି କିଛି ଆକ୍ରାନ୍ତ ଗୁରୁତର ହେଉଛନ୍ତି । ଯୁବପିଢିଙ୍କ ଠାରୁ ଏହା ବୟସ୍କମାନଙ୍କୁ ସଂକ୍ରମିତ ହେଉଥିବା ମଧ୍ୟ ନଜରକୁ ଆସିଛି ।