LIVE TV
କାହିଁକି ବେହାଲ୍ ବେଙ୍ଗାଲୁରୁ? କାହିଁକି ବର୍ଷାଜଳରେ ଉବୁଟୁବୁ ଦେଶର ଟେକ୍ନୋଲୋଜି କ୍ୟାପିଟାଲ୍? ଅଳ୍ପ ସମୟ ମଧ୍ୟରେ ପ୍ରବଳ ବର୍ଷା ଏବଂ ବିନା ଯୋଜନାରେ ଘର ନିର୍ମାଣ ଯୋଗୁଁ ବେଙ୍ଗାଲୁରୁରେ ଏପରି ପରିସ୍ଥିତି ସୃଷ୍ଟି ହୋଇଥିବା କୁହାଯାଉଛି । ୫ଶହରୁ ଅଧିକ ଡ୍ରେନକୁ ଜବରଦଖଲ କରାଯାଇ ତା ଉପରେ ବେଆଇନ ନିର୍ମାଣ ହୋଇଥିବା ନେଇ ମଧ୍ୟ ରିପୋର୍ଟ ପ୍ରକାଶ ପାଇଛି । ତେଣେ ବର୍ତ୍ତମାନ ବେଙ୍ଗାଲୁରୁରେ ଉପୁଜିଥିବା ସମସ୍ୟା ପାଇଁ ଅବିଶ୍ରାନ୍ତ ବର୍ଷା ସହ ବିରୋଧୀଙ୍କୁ ଟାର୍ଗେଟ୍ କରିଛନ୍ତି ମୁଖ୍ୟମନ୍ତ୍ରୀ ବାସବରାଜ ବୋମାଇ ।
ପୂର୍ବ ଜେଡିଏସ୍-କଂଗ୍ରେସ ସରକାରକୁ ଦାୟୀ କରିଛନ୍ତି ମୁଖ୍ୟମନ୍ତ୍ରୀ । ଅନେକ ସ୍ଥାନରେ ବେଆଇନ ଭାବେ ବାସଗୃହ ନିର୍ମାଣ ହେବା ସହ ବିଲ୍ଡିଂ ଗୁଡିକ ବିନା ପ୍ଲାନିଂରେ କରାଯାଇଥିବା କହିଛନ୍ତି । ଆପାର୍ଟମେଣ୍ଟ, ବିଲ୍ଡିଂ, ବଫର ଜୋନ୍ ଆଦି ବିନା ପ୍ଲାନରେ ହୋଇଛି । ଫଳସୂରୁପ ବେଙ୍ଗାଲୁରୁକୁ ଏଭଳି ଦୁର୍ଦ୍ଦଶା ଭୋଗିବାକୁ ପଡ଼ୁଛି । ଆଗକୁ ଜବରଦଖଲ ପାଇଁ କାହାକୁ ପ୍ରଶୟ ଦିଆଯିବନି ବୋଲି ସେ ପ୍ରତିଶ୍ରୁତି ଦେଇଛନ୍ତି । ବେଙ୍ଗାଲୁରୁ ସହରରୁ ଜଳ ନିଷ୍କାସନ ପାଇଁ ୧୫ ଶହ କୋଟି ଟଙ୍କା ଖର୍ଚ୍ଚ କରାଯାଉଛି । ଏଥିସହ ଜବରଦଖଲ ଉଚ୍ଛେଦ ପାଇଁ ୩ ଶହ କୋଟି ଟଙ୍କା ଅନୁଦାନ ରାଶି ବ୍ୟୟବରାଦ କରାଯାଇଛି ।
ବେଙ୍ଗାଲୁରୁ ସହ ଅନ୍ୟ ଜିଲ୍ଲାରେ ବନ୍ୟା ଜଳ ପରିଚାଳନ ନିମନ୍ତେ ୬ ଶହ କୋଟି ଟଙ୍କା ଖର୍ଚ୍ଚ କରିବାକୁ ଯୋଜନା ରହିଛି ବୋଲି ସୂଚନା ଦେଇଛନ୍ତି କର୍ଣ୍ଣାଟକ ମୁଖ୍ୟମନ୍ତ୍ରୀ । ବିଭାଗୀୟ କର୍ମଚାରୀ, ଇଞ୍ଜିନିୟର, ସ୍ୱେଚ୍ଛାସେବୀ, ଷ୍ଟେଟ୍ ଡିଜାଷ୍ଟର ରେସପନସ୍ ଫୋର୍ସ ସ୍ଥିତି ମୁକାବିଲା ପାଇଁ ଦିନରାତି ଏକ କରି କାମ କରୁଛନ୍ତି ।
୯୦ ବର୍ଷ ଭିତରେ ବେଙ୍ଗାଲୁରୁରେ ଏହା ସବୁଠୁ ବଡ଼ ବର୍ଷା ବୋଲି କୁହାଯାଉଛି । ଆଞ୍ଚଳିକ ପାଣିପାଗ ବିଭାଗ ଆସନ୍ତା ୪ ଦିନ ମଧ୍ୟରେ ଦକ୍ଷିଣ ଓ ଉତ୍ତର କର୍ଣ୍ଣାଟକର ଆଭ୍ୟନ୍ତରୀଣ ଅଞ୍ଚଳରେ ପ୍ରବଳ ବର୍ଷାର ପୂର୍ବାନୁମାନ କରିଥିବାରୁ ଚିନ୍ତା ଆହୁରି ବଢ଼ିଛି । ଉତ୍ତର କର୍ଣ୍ଣାଟକରେ ଅଧିକ ବର୍ଷା ନେଇ ଆଶଙ୍କା ରହିଛି । କୋଡାଗୁ, ହାସନା, ଚିକ୍କାମାଗାଲୁରୁ, ଶିଭମୁଗା ଆଦି ଜିଲ୍ଲାରେ ମୂଷଳଧାରାରେ ବର୍ଷିପାରେ ।
ସେହିପରି ଉପକୂଳ କର୍ଣ୍ଣାଟକରେ ଦକ୍ଷିଣ କନ୍ନଡ଼, ଉତ୍ତର କନ୍ନଡ଼, ଉଡ୍ଡୁପି ଜିଲ୍ଲାର କିଛି ଅଞ୍ଚଳରେ ପ୍ରବଳ ବର୍ଷା ନେଇ ପୂର୍ବାନୁମାନ କରାଯାଇଛି । ଯଦି ଆହୁରି ଅଧିକ ଦିନ ବର୍ଷା ଲାଗି ରହେ, ତେବେ ଆଗକୁ ପରିସ୍ଥିତି ଅଧିକ ବିଗିଡିଯିବା ନେଇ ଆଶଙ୍କା କରାଯାଉଛି । ଅତ୍ୟଧିକ ବର୍ଷା ଯୋଗୁ ଭୀମେଶ୍ୱର ନଦୀ ଫୁଲିବା ଯୋଗୁ ବନ୍ୟା ଜଳ ବି ବେଙ୍ଗାଲୁରୁ ସହରରେ ପ୍ରବେଶ କରିଛି ।
