LIVE TV
ମାଟ୍ରିକ ପରୀକ୍ଷା ଆରମ୍ଭରୁ ଅନୁପସ୍ଥିତ ପରୀକ୍ଷାର୍ଥୀ । ଫର୍ମ ଫିଲପ୍ କରିଛନ୍ତି, ଆଡମିଟ କାର୍ଡ ମିଳିଛି କିନ୍ତୁ ପରୀକ୍ଷା ଦେବାକୁ ଆସୁନାହାଁନ୍ତି । ଜଣେ କି ଦୁଇ ଜଣ ନୁହେଁ ୧୫ ହଜାରରୁ ଅଧିକ ପରୀକ୍ଷାର୍ଥୀ ପରୀକ୍ଷା ହଲ୍ ରେ ବସିନଥିବାରୁ ଉଠିଛି ପ୍ରଶ୍ନ ।ଦାଦନ, ନାବାଳିକା ବିବାହ ଓ ଆର୍ଥିକ ସମସ୍ୟା ପାଇଁ ମାଟ୍ରିକ ପରୀକ୍ଷାର୍ଥୀ ପରୀକ୍ଷା ଦେଉନଥିବା କୁହାଯାଉଛି । କିନ୍ତୁ ଗଣଶିକ୍ଷା ମନ୍ତ୍ରୀ କହିଛନ୍ତି ପରୀକ୍ଷା ପରେ ଅନୁପସ୍ଥିତ ଛାତ୍ରଛାତ୍ରୀଙ୍କ ତଥ୍ୟ ସଂଗ୍ରହ କରି ଆବଶ୍ୟକ ପଦକ୍ଷେପ ନିଆଯିବ ।
ଫର୍ମ ଫିଲପ୍ କଲେ, ଆଡମିଟ କାର୍ଡ ବି ଆସିଲା, କିନ୍ତୁ ପରୀକ୍ଷା ହଲକୁ ଆସିଲେନି ଛାତ୍ରଛାତ୍ରୀ । ମାଟ୍ରିକର ପ୍ରଥମ ଦିନ ମାତୃଭାଷା ପରୀକ୍ଷା ପରେ ଆସିଲା ଏଭଳି ଚିତ୍ର । ହଜାର ହଜାର ପରୀକ୍ଷାର୍ଥୀ ପ୍ରଥମ ଦିନରେ ଆସିନାହାଁନ୍ତି ପରୀକ୍ଷା କେନ୍ଦ୍ରକୁ । ପ୍ରାୟ ୧୫ ହଜାରରୁ ଅଧିକ ପରୀକ୍ଷାର୍ଥୀ ଚଳିତ ବର୍ଷ ପରୀକ୍ଷା ଦେବାକୁ ପ୍ରଥମ ଦିନରେ ଆସିନାହାଁନ୍ତି । ନବରଙ୍ଗପୁରରେ ୯୭୩ ଜଣ ପରୀକ୍ଷାର୍ଥୀ ଅନୁପସ୍ଥିତ ଥିବାବେଳେ ପାରଳାଖେମୁଣ୍ଡିରେ ୨୪୪ ଜଣ ଅନୁପସ୍ଥିତ ଅଛନ୍ତି ।
ନବରଙ୍ଗପୁରରେ ବାଲ୍ୟ ବିବାହ ସଂଖ୍ୟା ଅଧିକ ଥିବାରୁ ଛାତ୍ରୀମାନେ ନାବାଳିକା ସମୟରୁ ହିଁ ବାହା ହୋଇଯାଉଛନ୍ତି । ଫଳରେ ପରୀକ୍ଷା ଦେଉନାହାଁନ୍ତି । ବିଶେଷ କରି ଉପାନ୍ତ ଜିଲ୍ଲା ଗୁଡ଼ିକରେ ଅନୁପସ୍ଥିତ ପରୀକ୍ଷାର୍ଥୀଙ୍କ ସଂଖ୍ୟା ଅଧିକ । ସୋରୋ ବ୍ଲକର ମଦମୋହନ ସରସ୍ୱତୀ ବାଳିକା ହାଇସ୍କୁଲର ୫ଜଣ ଛାତ୍ରୀ ଫର୍ମ ଫିଲପ୍ କରି ପରୀକ୍ଷା ଦେଇନାହାଁନ୍ତି । ପ୍ରଧାନଶିକ୍ଷକ କହିଛନ୍ତି ଆର୍ଥିକ ସ୍ଥିତି ଭଲ ନଥିବାରୁ ଦୁଇ ଜଣ ନାବାଳିକାଙ୍କୁ ପରିବାର ଲୋକେ ବାହା କରାଇଦେଇଛନ୍ତି ।
Also Read
ଅନ୍ୟମାନେ ଶିଶୁ ଶ୍ରମିକ ଭାବେ ବାହାରକୁ ଚାଲିଯାଇଛନ୍ତି । ଆଉ ଜଳେଶ୍ୱର ବାହାର୍ଦା ଗାଁର ନାରାୟଣ ଘଡାଇଙ୍କ ପୁଅ ବି ଫର୍ମ ଫିଲପ୍ କରିଥିଲା । କିନ୍ତୁ ଭୟରେ ପରୀକ୍ଷାର ଦୁଇ ଦିନ ପୂର୍ବରୁ ସମ୍ପର୍କୀୟଙ୍କ ଘରକୁ ଚାଲିଯାଇଛି । ପରୀକ୍ଷା ଦେବାକୁ ଆସୁନି ବୋଲି ବାପା କହିଛନ୍ତି । ପ୍ରତିବର୍ଷ ମାଟ୍ରିକ ପରୀକ୍ଷାରୁ ହଜାର ହଜାର ପରୀକ୍ଷାର୍ଥୀ ଗାୟବ ହେଉଛନ୍ତି । ବିଶେଷ କରି ସଚେତନତା ଅଭାବରୁ ଛାତ୍ରୀ ମାନେ ପରୀକ୍ଷାରୁ ବଞ୍ଚିତ ହେଉଛନ୍ତି ।
ଆଉ ଏହା ପଛରେ ପ୍ରମୁଖ ତିନି କାରଣ ହେଲା, ଅଭିଭାବକଙ୍କ ସହ ଦାଦନ ଖଟିବାକୁ ବାହାର ରାଜ୍ୟକୁ ଯିବା, ନାବାଳିକା ବିବାହ ଏବଂ ପିଲାଙ୍କ ପରୀକ୍ଷା ଭୟ । ସରକାରଙ୍କ ପକ୍ଷରୁ ଡ୍ରପ ଆଉଟ ହାର ରୋକିବାକୁ ଶିକ୍ଷକଙ୍କ ଡୋର ଟୁ ଡୋର ଭିଜିଟ୍ କାର୍ଯ୍ୟକ୍ରମ କରାଯାଉଛି । ତଥାପି ପରୀକ୍ଷାର୍ଥୀ ଫେରୁନାହାଁନ୍ତି ପରୀକ୍ଷା କେନ୍ଦ୍ରକୁ । ଅଭିଭାବକ ସଂଘ କହିଛି, ସରକାର ଦାଦନ ସମସ୍ୟାକୁ ଯୁଦ୍ଧକାଳୀନ ଭିତ୍ତିରେ ଦୂର କରିବାର ଆବଶ୍ୟକତା ଅଛି ।
ଅପରପକ୍ଷେ ଗଣଶିକ୍ଷା ମନ୍ତ୍ରୀ କହିଛନ୍ତି ଅନୁପସ୍ଥିତ ପରୀକ୍ଷାର୍ଥୀଙ୍କ ତଥ୍ୟ ସମ୍ପୂର୍ଣ୍ଣ ପରୀକ୍ଷା ଶେଷ ହେବା ପରେ ଜଣାପଡିବ । କିନ୍ତୁ କାହିଁକି ଅନୁପସ୍ଥିତ ରହିଲେ ପରୀକ୍ଷାର୍ଥୀ ତାହାର ତର୍ଜମା ନିଶ୍ଚିତ ହେବ । ସଚେତନତା ଅଭାବ ହେଉ କି ଆର୍ଥିକ ସମସ୍ୟା, ଏତେ ସଂଖ୍ୟକ ପରୀକ୍ଷାର୍ଥୀ କ୍ୟାରିୟରର ପ୍ରଥମ ସୋପାନରୁ ବାଦ ପଡିବା ଶିକ୍ଷା ବ୍ୟବସ୍ଥା ପ୍ରତି ଚାଲେଞ୍ଜ ନିଶ୍ଚିତ ।
ସୋରୋରୁ ନିରଞ୍ଜନ ବେହେରା, ଜଳେଶ୍ୱରରୁ ଅଜିତ ଦାସ, ନବରଙ୍ଗପୁରରୁ ନବଘନ ବିଷୋୟୀଙ୍କ ସହ ଜଗଦୀଶ ଦାସଙ୍କ ରିପୋର୍ଟ, ଓଟିଭି...
