LIVE TV
କାମରେ ଆସୁନି ନୂଆ ଭସାପୋଲ । ପୁରୁଣା ଭସାପୋଲରେ ବିପଦସଙ୍କୁଳ ଅବସ୍ଥାରେ ଚିଲିକାର ଅଥଳ ଜଳରାଶି ପାର ହେଉଛନ୍ତି ଲୋକେ । କେତେବେଳେ ଯେ କେଉଁ ଅଘଟଣ ଘଟିବ ତାହା କହିବା ମୁସ୍କିଲ୍ । ଯାତ୍ରୀବାହୀ ଡଙ୍ଗାରେ ସୁରକ୍ଷା ବ୍ୟବସ୍ଥା ନଥିବା ବେଳେ ନୂଆ ଭସାପୋଲ ବି ଏକ ମାସରୁ ଅଧିକ ସମୟ ହେବ ଜହ୍ନିକୁଦା କୂଳରେ ବନ୍ଧାହୋଇ ରହିଛି ।
Also Read
ଅଧିକ ପଢ଼ନ୍ତୁ: ରାତି ତମାମ ଚାଲିଲା ବିଧାନସଭା, ଭୋର ୪ଟା ୨୯ ମିନିଟରେ ପାରିତ ହେଲା ବିଶ୍ୱ ବିଦ୍ୟାଳୟ ସଂଶୋଧିତ ବିଲ୍-୨୦୨୪
ଚିଲିକାର ଅଥଳ ଜଳରାଶିରେ ଆଗେଇ ଚାଲିଛି ଭସାପୋଲ । ଦୁଇ ଚକିଆ, ଚାରି ଚକିଆ ଯାନ ସହ ଲୋଡ୍ ହୋଇଛି ବସ୍ । ଆଉ ଏହି ଭସାପୋଲର ଅନେକ ଅଂଶ ଭାଙ୍ଗିରୁଜି ଗଲାଣି, ତଳ ପ୍ଲେଟ୍ କି କଣା ହୋଇଗଲାଣି । ଏଭଳି ବିପଦସଙ୍କୁଳ ଅବସ୍ଥାରେ ନିଇତି ଯାତାୟାତ କରୁଛନ୍ତି ପୁରୀ ଜିଲ୍ଲା କୃଷ୍ଣପ୍ରସାଦବାସୀ । ଯାନ୍ତ୍ରିକ ତୃଟି କାରଣରୁ ଦିନେ ଚାଲିଲେ ଦୁଇଦିନ ବନ୍ଦ ରହେ ଭସାପୋଲ । ଆଉ ଏ ପୋଲରେ ଗଲେ ଚିଲିକା ମଝିରେ କେତେବେଳେ ଯେ କ’ଣ ଘଟିବ ତାକୁ ନେଇ ଆଶଙ୍କାରେ ଯାତ୍ରୀ । ସ୍ଥିତିକୁ ଦେଖି ପ୍ରଶାସନ ପକ୍ଷରୁ ୨ଟି ନୂତନ ଭସାପୋଲ ବ୍ୟବସ୍ଥା କରାଯାଇଥିଲା । ମାତ୍ର ମାସେରୁ ଅଧିକ ସମୟ ହେବ ଏହା ଜହ୍ନିକୁଦା ଚିଲିକା କୂଳରେ ବନ୍ଧାହୋଇ ରହିଛି। ପୁରୁଣା ଭସାପୋଲରେ ହିଁ ଚାଲିଛି ଯାତ୍ରୀ ପରିବହନ।
ବିସ୍ତିର୍ଣ୍ଣ ଚିଲିକା ଭିତରେ ବସବାସ କରନ୍ତି କୃଷ୍ଣପ୍ରସାଦ ବ୍ଲକର ୧୪ଟି ପଞ୍ଚାୟତର ଲକ୍ଷାଧିକ ଲୋକ l ପୁରୀ ଜିଲ୍ଲା ସଦର ମହକୁମାଠାରୁ ଏହା ଅଲଗା ହୋଇ ରହୁଥିବା ବେଳେ ଲୋକେ ଏକ ପ୍ରକାର ବିଚ୍ଛିନ୍ନାଞ୍ଚଳ ଭାବେ ରୁହନ୍ତି । ଏଠାକୁ ଯିବାକୁ ହେଲେ ଜଳପଥରେ ୫ କିଲୋମିଟର ଚିଲିକାକୁ ପାରହେବାକୁ ପଡିଥାଏ l ଦେଶୀ ଡଙ୍ଗା ଏବଂ ଭସାପୋଲ ଚିଲିକା ପାରିହେବାର ଏକମାତ୍ର ମାଧ୍ୟମ l
ଯାତ୍ରୀମାନଙ୍କର ସୁରକ୍ଷିତ ଯାତାୟାତ ପାଇଁ ପ୍ରଶାସନ ପକ୍ଷରୁ ଚିଲିକାରେ ୨୦୦୧ ମସିହାଠାରୁ ଆରମ୍ଭ ହୋଇଥିଲା ୨ଟି ଭସାପୋଲ ସେବା l ଗୋଟିଏ ଜହ୍ନିକୁଦା ଠାରୁ ସାତପଡା ଯାଉଥିବା ବେଳେ ଅନ୍ୟଟି ସାତପଡାରୁ ଜହ୍ନିକୁଦାକୁ ଯାତ୍ରୀ ପରିବହନ କରିଥାଏ। ତେବେ ରକ୍ଷଣାବେକ୍ଷଣ ଅଭାବରୁ ଏ ଭସାପୋଲ ଏବେ ବିପଦଶଙ୍କୁଳ ଅବସ୍ଥାରେ ରହିଛି। ନୂତନ ଭସାପୋଲ ଚଳାଚଳ କରିବା ସହ ସ୍ଥାୟୀ ବ୍ରିଜ୍ ନିର୍ମାଣ ପାଇଁ ସ୍ଥାନୀୟ ବାସିନ୍ଦା ଦାବି କରିଛନ୍ତି। ବିଭାଗୀୟ ଅଧିକାରୀଙ୍କ ସହ ଆଲୋଚନା ପରେ ପଦକ୍ଷେପ ନିଆଯିବ ବୋଲି ପୁରୀ ଜିଲ୍ଲାପାଳ କହିଛନ୍ତି।
