LIVE TV
ଆସୁଛି ବିଶ୍ୱ ଯୋଗ ଦିବସ। ୨୦୧୫ ମସିହାରୁ ଜୁନ୍ ୨୧କୁ ଯୋଗ ଦିବସ ଭାବେ ପାଳନ କରାଯାଉଛି। ଭାରତକୁ ଯୋଗ ଗୁରୁ ଭାବରେ ବିବେଚନା କରାଯାଏ। ଏହି ଦେଶ ଯୋଗର ଉପକାରିତା ବିଷୟରେ ବିଶ୍ୱକୁ ଜଣେଇଛି। ଉଭୟ ମାନସିକ ଏବଂ ଶାରୀରିକ ସ୍ୱାସ୍ଥ୍ୟକୁ ବଜାୟ ରଖିବା ପାଇଁ ନିୟମିତ ଯୋଗାସନ ଅଭ୍ୟାସ କରାଯିବା ଉଚିତ। ଯୋଗ ଅଭ୍ୟାସ ସବୁ ବୟସର ଲୋକଙ୍କ ପାଇଁ ଲାଭଦାୟକ।
ଯୋଗର ମହତ୍ତ୍ୱକୁ ବୁଝି ଆଜିକାଲି ଲୋକମାନେ ୟୁଟ୍ୟୁବ୍ କିମ୍ବା ଅନ୍ଲାଇନ୍ ଭିଡିଓ ଦେଖି ଯୋଗ ଅଭ୍ୟାସ ଆରମ୍ଭ କରିଛନ୍ତି। କିନ୍ତୁ ଯଦି ଆପଣ ପ୍ରଥମ ଥର ପାଇଁ ଯୋଗ କରିବାକୁ ଯାଉଛନ୍ତି ତେବେ କିଛି ଜିନିଷକୁ ଧ୍ୟାନରେ ରଖିବା ଆବଶ୍ୟକ। ଯୋଗ ଅଭ୍ୟାସ କରିବା ସମୟରେ କିଛି ମୌଳିକ ତ୍ରୁଟି ହେତୁ ଯୋଗର ଓଲଟା ପ୍ରଭାବ ହୋଇପାରେ। ଯୋଗ କରିବା ସମୟରେ କିଛି ଛୋଟମୋଟ ଭୁଲରୁ ଦୂରେଇ ରହିବା ଉଚିତ। ତେଣୁ ଆପଣ ଯଦି ପ୍ରଥମ ଥର ପାଇଁ ଯୋଗ କରୁଛନ୍ତି ତେବେ ଏହି ଜିନିଷଗୁଡ଼ିକର ବିଶେଷ ଯତ୍ନ ନେବା ଜରୁରୀ।
ଶ୍ୱାସରେ ଯତ୍ନ:
ଯୋଗରେ ଶ୍ୱାସକ୍ରିୟା ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥାଏ। ପ୍ରଥମ ଥର ପାଇଁ ଯୋଗ କରୁଥିବା ବ୍ୟକ୍ତି ଯଦି ପ୍ରଶିକ୍ଷକଙ୍କ ମାର୍ଗଦର୍ଶନ ବିନା ଯୋଗ କରୁଛନ୍ତି, ତେବେ ସେମାନେ ମନେରଖିବା ଉଚିତ ଯେ ଆସନ କରିବା ସମୟରେ ପାଟିରେ ଶ୍ୱାସକ୍ରିୟା କରିବେ ନାହିଁ। ଆସନ କରିବା ସମୟରେ କେତେବେଳେ ଶ୍ୱାସ ନେବାକୁ ହୁଏ ଓ କେତେବେଳେ ଛାଡିବାକୁ ହୁଏ ତାହା ମଧ୍ୟ ଜାଣିବା ଜରୁରୀ।
ଖାଲି ପେଟରେ ଯୋଗ:
ଯଦି ଆପଣ ପ୍ରଥମ ଥର ପାଇଁ ଯୋଗ କରିବାକୁ ଯାଉଛନ୍ତି ତେବେ ଆପଣ ଜାଣିବା ଉଚିତ୍ ଯେ ଖାଲି ପେଟରେ ଯୋଗ କରାଯାଏ। ଜଳଖିଆ କିମ୍ବା ଖାଦ୍ୟ ପରେ ଯୋଗ କରାଯାଏ ନାହିଁ। ଯଦି ଆପଣ ସକାଳେ ଯୋଗ କରିବା ପାଇଁ ସମୟ ପାଉ ନାହାନ୍ତି, ତେବେ ମନେରଖନ୍ତୁ ଯେତେବେଳେ ବି ଯୋଗ କରନ୍ତୁ, ଅତି କମରେ ୩ ଘଣ୍ଟା ପୂର୍ବରୁ କିଛି ଖାଇ ନଥିବେ। ଏଥି ସହିତ ଯୋଗ କରିବା ପରେ ତୁରନ୍ତ ଖାଦ୍ୟ ଖାଆନ୍ତୁ ନାହିଁ। ପ୍ରଥମେ ଶରୀରକୁ କିଛି ସମୟ ବିଶ୍ରାମ ଦିଅନ୍ତୁ ତା’ପରେ ଖାଦ୍ୟ ଖାଆନ୍ତୁ।
ଯୋଗ ପାଇଁ ପୋଷାକ:
ଯୋଗ କରିବା ସମୟରେ ଆପଣ ଆରାମଦାୟକ ପୋଷାକ ପିନ୍ଧିବା ଉଚିତ। ଟାଇଟ୍ ପୋଷାକ ପିନ୍ଧିବା ଦ୍ୱାରା ଶରୀରର ମାଂସପେଶୀରେ କୁପ୍ରଭାବ ପଡିଥାଏ। ଅନ୍ୟପଟେ ଏକାଗ୍ରତା ସହିତ ଯୋଗ ଉପରେ ଧ୍ୟାନ ଲଗାଯାଇ ପାରିବ ନାହିଁ।
ୱାର୍ମଅପ୍ କରିବା:
ଯୋଗ କିମ୍ବା ବ୍ୟାୟାମ କରିବା ପୂର୍ବରୁ ୱାର୍ମଅପ୍ କରିବା ଜରୁରୀ। ଯଦି ଆପଣ ପ୍ରଥମ ଥର ପାଇଁ ଯୋଗ କରୁଛନ୍ତି, ତେବେ ଆପଣ ସଚେତନ ହେବା ଉଚିତ ଯେ ସିଧା ସଳଖ ଆସନ କିମ୍ବା ମୁଦ୍ରା କରନ୍ତୁ ନାହିଁ। ପ୍ରଥମେ ଶରୀରକୁ ସକ୍ରିୟ କରିବାକୁ ହେଲେ ଆପଣଙ୍କୁ ୱାର୍ମ ଅପ୍ କରିବାକୁ ପଡିବ।
କଠିନ ଏବଂ ଭୁଲ ଯୋଗ କରନ୍ତୁ ନାହିଁ:
ଯଦି ଆପଣ ପ୍ରଥମ ଥର ପାଇଁ ଯୋଗ କରିବାକୁ ଯାଉଛନ୍ତି, ତେବେ ସରଳ ଏବଂ ମୌଳିକ ଯୋଗାସନରୁ ଆରମ୍ଭ କରନ୍ତୁ। କଠିନ ଯୋଗ କରନ୍ତୁ ନାହିଁ, ଏହା ଦ୍ୱାରା ଆଘାତର ବିପଦ ଥାଇପାରେ। ଯେକୌଣସି ଯୋଗ ଅଭ୍ୟାସ ପାଇଁ ଠିକ୍ ଆସନ କ’ଣ ଜାଣି ନିଅନ୍ତୁ। ଭୁଲ ମୁଦ୍ରାରେ ବସନ୍ତୁ ନାହିଁ।
