ଆସୁଛି ନୂଆ ଟେଲିକମ୍ ବିଲ୍, ଏଣିକି ବିନା ଆଧାରରେ ଆଉ ମିଳିବନି ନୂଆ ସିମ୍

ଚଳିତ ଶୀତ ଅଧିବେଶନରେ ସଂସଦର ଉଭୟ ସଦନରେ ପାରିତ ହୋଇଛି ଟେଲିକମ୍‌ ବିଲ୍‌-୨୦୨୩। ଆଉ ଏବେ ଖାଲି ଅପେକ୍ଷା ମହାମହିମ ରାଷ୍ଟ୍ରପତିଙ୍କ ସମ୍ମତି ପାଇଁ। ରାଷ୍ଟ୍ରପତିଙ୍କ ସମ୍ମତି ପାଇବା ପରେ ଏହି ବିଲ୍‌ ଏକ ଆଇନରେ ପରିଣତ ହେବ। ଏହି ବିଲ୍‌ ଆଇନ୍‌ରେ ପରିଣତ ହେବା ପରେ ନୂଆ ମୋବାଇଲ ନମ୍ବର ଆଣିବା ପ୍ରକ୍ରିୟାରେ ଉଲ୍ଲେଖନୀୟ ପରିବର୍ତ୍ତନ ଆଣିବାକୁ ସ୍ଥିର ହୋଇଛି।

ନୂଆ ମୋବାଇଲ୍ ସିମ୍ କାର୍ଡ କିଣିବା ପାଇଁ ଆବଶ୍ୟକ ପରିଚୟ 'ବାୟୋମେଟ୍ରିକ୍' ହେବ ବୋଲି ଏହି ବିଲ୍‌ରେ ଦର୍ଶାଯାଇଛି । ବର୍ତ୍ତମାନ, କେବଳ ଆଧାର ନମ୍ବର ମାଧ୍ୟମରେ ହିଁ KYC ବାୟୋମେଟ୍ରିକ୍‌ ହୋଇପାରୁଛି। ଆଧାର ଛଡ଼ା ଅନ୍ୟ କୌଣସି ଡକ୍ୟୁମେଣ୍ଟରେ ବାୟୋମେଟ୍ରିକ୍‌ ହେଉନାହିଁ। ତେଣୁ ଯେଉଁ ବ୍ୟକ୍ତିମାନଙ୍କ ଆଧାର କାର୍ଡ ନ ଥିବ ସେମାନେ ନୂତନ ସିମ୍‌ କାର୍ଡ କିଣିପାରିବେ ନାହିଁ ବୋଲି ଅନୁମାନ କରାଯାଉଛି ।

ଏହି ନୂଆ ବିଲ୍ ୧୩୮ ବର୍ଷ ପୁରୁଣା ଭାରତୀୟ ଟେଲିଗ୍ରାଫ ଅଧିନିୟମର ସ୍ଥାନ ନେବ। ଭାରତୀୟ ଟେଲିଗ୍ରାଫ ଅଧିନିୟମ ବର୍ତ୍ତମାନ ଟେଲିକମ୍ କ୍ଷେତ୍ରକୁ ପରିଚାଳନା କରୁଛି। ଏହି ବିଲ୍ ଇଣ୍ଡିଆନ୍ ୱେୟାରଲେସ୍ ଟେଲିଗ୍ରାଫ ଆକ୍ଟ, ୧୯୩୩ ଏବଂ ଟେଲିଗ୍ରାଫ ୱୟାର ଆକ୍ଟ, ୧୯୫୦ର ସ୍ଥାନ ନେବ। ଏହି ବିଲରେ ଟ୍ରାଇ ଆଇନ, ୧୯୯୭ରେ ମଧ୍ୟ ସଂଶୋଧନ କରାଯିବ।

ଏହି ବିଲ୍ ସରକାରଙ୍କୁ ଜାତୀୟ ସୁରକ୍ଷା କାରଣରୁ କୌଣସି ଟେଲିକମ୍ ସେବା କିମ୍ବା ନେଟୱାର୍କକୁ ଗ୍ରହଣ, ପରିଚାଳନା କିମ୍ବା ସ୍ଥଗିତ ରଖିବାକୁ ଅନୁମତି ଦେଇଥାଏ। ଜନସାଧାରଣଙ୍କ ସୁରକ୍ଷା ପାଇଁ ଆବଶ୍ୟକ ହେଲେ ସରକାର ଟେଲିକମ୍ ନେଟୱାର୍କରେ ବାର୍ତ୍ତା ଅଟକାଇବାରେ ସକ୍ଷମ ହେବେ। ଏହି ବିଲରେ ନକଲି ସିମ୍ କିଣିବା ପାଇଁ ତିନି ବର୍ଷ ଜେଲ୍ ଏବଂ ୫୦ ଲକ୍ଷ ଟଙ୍କା ପର୍ଯ୍ୟନ୍ତ ଜୋରିମାନା ମଧ୍ୟ ରହିଛି।