LIVE TV
ପ୍ରତ୍ୟେକ ପିଲା ସମାନ ନୁହନ୍ତି। କେହି କେହି ଉତ୍ତମ ବ୍ୟବହାର ଦେଖାଉଥିବା ବେଳେ ଆଉ କେହି ଖରାପ ବ୍ୟବହାର ମଧ୍ୟ ଦେଖାଇଥାନ୍ତି। ତେବେ ପିଲାମାନଙ୍କର ଲାଳନ ପାଳନ ଉପାୟ ହିଁ ସେମାନଙ୍କ ବ୍ୟକ୍ତିତ୍ୱ ବିକାଶରେ ସାହାଯ୍ୟ କରେ ନଚେତ ସେମାନଙ୍କୁ ନଷ୍ଟ କରିବାରେ ଏହା ମୁଖ୍ୟ କାରଣ ହେବ। ବାପାମାଆଙ୍କର ଅଭ୍ୟାସ ଏବଂ ପିଲାମାନଙ୍କୁ ପ୍ରତିପୋଷଣର ତରିକା ହିଁ ପିଲାମାନଙ୍କ ଉପରେ ବହୁତ ପ୍ରଭାବ ପକାଇଥାଏ।
ବେଳେବେଳେ ପିଲା ମିଛ କହିବା ଅଭ୍ୟାସ, ପିଲାଟିର କିଛି କରିବାକୁ ମନା କରିବାର ଅଭ୍ୟାସ ଏବଂ ପିଲାଟିର ସବୁ କଥାରେ ଯୁକ୍ତିତର୍କ କରିବାର ଅଭ୍ୟାସ ମଧ୍ୟ ବାପାମାଆଙ୍କ ପାଳନରେ ହୋଇଥିବା ଭୁଲ ହେତୁ ହୋଇପାରେ। ତେବେ ଆସନ୍ତୁ ବାପାମାଆଙ୍କ କେଉଁ ବ୍ୟବହାର ପିଲାମାନଙ୍କୁ ନଷ୍ଟ କରିବାରେ ସହାୟ ହୁଏ ସେ ବିଷୟରେ ଜାଣିନେବା।
Also Read
ଅଧିକ ପଢ଼ନ୍ତୁ: ଆପଣଙ୍କ ପିଲାକୁ ଅଲ୍ରାଉଣ୍ଡର୍ କରିବାକୁ ଚାହୁଛନ୍ତି କି… ଆପଣଙ୍କ ପାଇଁ ଟିପ୍ସ
ପିଲାମାନଙ୍କୁ ମିଛ କହିବା:
ଅନେକ ସମୟରେ ଦେଖାଯାଏ ଯେ ବାପାମାଆମାନେ ଥଟ୍ଟା-ମଜା କରିବା ପାଇଁ କିମ୍ବା କାହା ସହିତ କୌଣସି ଝଗଡା ନ ହେବା ପାଇଁ ନିଜ ପିଲାମାନଙ୍କୁ ମିଛ କହିବା ଆରମ୍ଭ କରନ୍ତି। ପିଲାମାନେ ସେମାନଙ୍କର ବାପାମାଆଙ୍କର ଏହି ମିଛ କହିବାର ଅଭ୍ୟାସକୁ ଶୀଘ୍ର ଧରିଥାନ୍ତି ଏବଂ ନିଜେ ମଧ୍ୟ ମିଛ କହିବା ଆରମ୍ଭ କରନ୍ତି। ପ୍ରଥମେ ପ୍ରଥମେ ଏହି ମିଛଗୁଡ଼ିକ ଛୋଟକାଟିଆ ଏବଂ ପରେ ଏହା ବୃଦ୍ଧି ପାଇଥାଏ।
ପିଲାମାନଙ୍କ ଭାବପ୍ରବଣତାକୁ ରୋକିବା:
ଅନେକ ବାପାମାଆ ସେମାନଙ୍କ ପିଲାମାନଙ୍କୁ କୁହନ୍ତି ଯେ କାନ୍ଦିବା ଭଲ ନୁହେଁ କିମ୍ବା ସବୁବେଳେ ହସିବା ଠିକ୍ ନୁହେଁ କିମ୍ବା ଖରାପ ଲାଗିଲେ ବି ରାଗିବା ଉଚିତ ନୁହେଁ। ଏହିପରି କଥା ପିଲାମାନଙ୍କୁ ଗଭୀର ଭାବେ ଆଘାତ ଦେଇଥାଏ। ଏଭଳି କ୍ଷେତ୍ରରେ ପିଲାମାନେ ନିଜର ଭାବନାକୁ ବୁଝିବାକୁ ଅକ୍ଷମ ହୁଅନ୍ତି ଏବଂ ସେମାନଙ୍କର ଭାବପ୍ରବଣତାର ବିକାଶ ମଧ୍ୟ ଠିକ୍ ଭାବରେ ହୁଏ ନାହିଁ। ଏହିପରି ପିଲାମାନେ ମଧ୍ୟ ଅସମ୍ବେଦନଶୀଳ କିମ୍ବା ଅଧିକ ଭାବପ୍ରବଣ ହୋଇପାରନ୍ତି।
ପିଲାମାନଙ୍କ ପାଇଁ ସମସ୍ତ ନିଷ୍ପତ୍ତି ନିଜେ ନେବା:
ଯେତେବେଳେ ପିଲାମାନେ ବଡ ହୋଇଯାଆନ୍ତି, ବାପାମାଆ ଅଭିଯୋଗ କରନ୍ତି ଯେ ସେମାନେ କାହିଁକି ନିଜ ନିଷ୍ପତ୍ତି ନିଜେ ନ ନେବେ କିମ୍ବା ପିଲାମାନେ କାହିଁକି ସବୁ କଥାକୁ ନେଇ ଭୟଭୀତ। ଏମିତି ହେବାର ପ୍ରମୁଖ କାରଣ ଏହା ମଧ୍ୟ ହୋଇପାରେ ଯେ ବାପାମାଆମାନେ ସେମାନଙ୍କର ପିଲାମାନଙ୍କୁ ପିଲାଦିନରୁ କୌଣସି ନିଷ୍ପତ୍ତି ନେବାକୁ ଦିଅନ୍ତି ନାହିଁ। ଯେତେବେଳେ ଏଭଳି ସମୟ ଆସେ ପିଲାମାନେ କିଛି କରିବା ପୂର୍ବରୁ ଶହେ ଥର ଭାବନ୍ତି ଏବଂ କିଛି କରିବାକୁ ଭୟ କରନ୍ତି। ଏହି କାରଣରୁ, ପିଲାମାନଙ୍କର ସମସ୍ୟା ସମାଧାନ କୌଶଳ ବିକାଶ ହୋଇପାରେ ନାହିଁ।
ପିଲାମାନଙ୍କ ସାମ୍ନାରେ ଝଗଡା କରିବା:
ପ୍ରାୟ ବାପାମାଆମାନେ ଭାବନ୍ତି ଯେ ସେମାନଙ୍କ ପିଲାମାନଙ୍କ ସାମ୍ନାରେ ଟିକିଏ କଳି ଝଗଡା କରିବାରେ କୌଣସି କ୍ଷତି ନାହିଁ। କିନ୍ତୁ, ପିଲାମାନେ ଏହି କଳି ଝଗଡାରୁ ବହୁତ କିଛି ଶିଖନ୍ତି। ପିଲାମାନେ ସେମାନଙ୍କ ବାପାମାଆଙ୍କ ସହ ଯୁକ୍ତିତର୍କ କରିବା ଆରମ୍ଭ କରନ୍ତି ଏବଂ ସେମାନେ ଭାବନ୍ତି ଯେ ଏହିପରି ଯୁକ୍ତିତର୍କ କରିବାରେ କୌଣସି ଅସୁବିଧା ନାହିଁ କାରଣ ବାପାମାଆ ମଧ୍ୟ ପରସ୍ପର ସହ ଏମିତି ହୋଇଥାନ୍ତି।
