LIVE TV
ରାସ୍ତା ନିର୍ମାଣରେ ବ୍ୟାପକ ଦୁର୍ନୀତି ଓ ନିମ୍ନମାନର କାମ ଅଭିଯୋଗ । ଠିକାଦାରଙ୍କ ଢିଲ୍ଲା କାମ ପାଇଁ ଅଞ୍ଚଳରେ ବଢୁଛି ଜନ ଅସନ୍ତୋଷ । ରାଜ୍ୟର ବିଭିନ୍ନ ସ୍ଥାନରେ ରାସ୍ତା ନିର୍ମାଣ ବେଳେ ସଠିକ୍ ମାନ ଅବଲମ୍ବନ କରାଯାଉନଥିବାର ଚିତ୍ର ସାମ୍ନାକୁ ଆସିଛି। ସମ୍ବଲପୁରର ନାକଟିଦେଉଳ ଓ ଖୋର୍ଦ୍ଧା ଜିଲ୍ଲାରୁ ଏଭଳି ସ୍ପଷ୍ଟ ଅଭିଯୋଗ ଆସିଥିବା ବେଳେ ସେପଟେ କୋରାପୁଟ ବୋରିଗୁମାରେ ନିମ୍ନମାନର ରାସ୍ତା ପାଇଁ ବର୍ଷ ବର୍ଷ ଧରି ଯନ୍ତ୍ରଣା ଭୋଗୁଛନ୍ତି ଲୋକେ ।
ନିର୍ମାଣକୁ ସପ୍ତାହେ ପୁରିନି । କିନ୍ତୁ ହାତ ମାରିଦେଲେ ଉଠିଯାଉଛି ପରସ୍ତ ପରସ୍ତ ପିଚୁ। ଠାଏ କି ଦୁଇଠା ନୁହେଁ, ଯେଉଁଠି ଦେଖିବେ ସମାନ ଅବସ୍ଥା । ସମ୍ବଲପୁର ଜିଲ୍ଲା ନାକଟିଦେଉଳ ବ୍ଲକ୍ ଅଞ୍ଚଳର ସ୍ଥାନୀୟ ତଣ୍ଡାବିରା ଛକରୁ ରାଇଲ ପର୍ଯ୍ୟନ୍ତ ୧୭ କିଲୋମିଟର ରାସ୍ତାକୁ ନିକଟରେ ତିଆରି କରିଛି ପୂର୍ତ୍ତ ବିଭାଗ । ହେଲେ ସ୍ଥାନୀୟ ଲୋକଙ୍କ ଅଭିଯୋଗ, ପ୍ରାୟ ୪ କୋଟି ଟଙ୍କା ବ୍ୟୟରେ ନିର୍ମାଣ ହୋଇଥିବା ରାସ୍ତା ଅତି ନିମ୍ନ ମାନର। ଠିକାଦାରର ଏଭଳି କାମ ବିରୋଧରେ ଲୋକେ ଜିଲ୍ଲାପାଳଙ୍କୁ ଅଭିଯୋଗ ବି କରିଥିଲେ ଫଳ କିଛି ହୋଇନି।
Also Read
ଏବେ ଜାଣନ୍ତୁ ରାସ୍ତା ନାଁରେ ହରିଲୁଟର ଆଉ ଏକ ଅଧ୍ୟାୟ ଉପରେ । ଖୋର୍ଦ୍ଧା ଜିଲ୍ଲାରୁ-ପୁରୀକୁ ସଂଯୋଗ କରୁଥିବା ନୂଆ ଜଗନ୍ନାଥ ସଡ଼କର ଦୃଶ୍ୟ ବି ସମାନ । ସ୍ଥାନୀୟ ରାମେଶ୍ୱରଠୁ କେଶରପୁର ପର୍ଯ୍ୟନ୍ତ ୧୩ କିଲୋମିଟର ରାସ୍ତା ଲାଗି ଖର୍ଚ୍ଚ ହୋଇଛି ୫ କୋଟି ୫୯ ଲକ୍ଷ ଟଙ୍କା । ଦୁର୍ଭାଗ୍ୟର କଥା, ଗୋଟେ ପଟେ ରାସ୍ତା ନିର୍ମାଣ ଶେଷ ହେବାକୁ ଯାଉଥିବା ବେଳେ ଅନ୍ୟପଟେ ବହୁ ସ୍ଥାନରେ ରାସ୍ତାରୁ ପିଚୁ ଉଠିଯାଉଥିବା ବାରମ୍ବାର ନଜରକୁ ଆସୁଛି ।
ତେଣୁ ଠିକା ସଂସ୍ଥା ପୁଣି ମାଲ ମ୍ୟାଟେରିଆଲ ନେଇ ରାତିଅଧିଆ ସେ ସ୍ଥାନରେ ପ୍ୟାଚ୍ ପକାଇବାରେ ବ୍ୟସ୍ତ । ତେବେ ନିର୍ମାଣକୁ ମାସେ ପୁରି ନଥିବା ବେଳେ ରାସ୍ତାରୁ ପିଚୁ କାହିଁକି ଉଠିଯାଉଛି ଏବଂ ତାଳିପକା ମରାମତି କାମର ସ୍ଥାୟୀତ୍ୱ କେତେ, ତାକୁ ନେଇ ପ୍ରଶ୍ନ କରିଛନ୍ତି ସ୍ଥାନୀୟ ଲୋକେ । ଏମିତିକି ଖୋର୍ଦ୍ଧାର ବିଜେଡି ବିଧାୟକ ମଧ୍ୟ ରାସ୍ତାକାମ ଅତି ନିମ୍ନ ମାନର ବୋଲି କହିଛନ୍ତି।
କୋରାପୁଟ ଜିଲ୍ଲା ବୋରିଗୁମ୍ମା ବ୍ଲକ ଅଞ୍ଚଳର । ସ୍ଥାନୀୟ ବିସିଂହପୁଠାରୁ ମୁରାନ ଡ୍ୟାମ୍ ପର୍ଯ୍ୟନ୍ତ ପ୍ରାୟ ୧୩ କିଲୋମିଟର ରାସ୍ତା ଲାଗି ୨୦୧୫-୧୬ ଆର୍ଥିକ ବର୍ଷରେ ୧୨ କୋଟି ବ୍ୟୟ ଅଟକଳ ହୋଇଥିଲା । ଜୟପୁରର ଏକ ଠିକା କମ୍ପାନୀ ରାସ୍ତା ନିର୍ମାଣ କାମ କରୁଥିଲା। ତେବେ ଏଠି ବି ଠିକାଦାର ନିମ୍ନମାନର କାମ କରୁଥିବାର ଅଭିଯୋଗ ପରେ ଓଲଟା ବିଭାଗର ଅବହେଳା ଦର୍ଶାଇ ଆଇନର ଆଶ୍ରୟ ନେଇଥିଲେ ଠିକାଦାର ।
ଫଳରେ ଆଜିକୁ ପ୍ରାୟ ୮ ବର୍ଷ ଧରି ଆଇନ ଜାଲରେ ଫସି ରହିଛି ଏ ରାସ୍ତାର ଭାଗ୍ୟ । ବର୍ଷ ବର୍ଷ ଧରି ମରାମତି ଅଭାବରୁ ଏ ରାସ୍ତା ଏଭଳି ପଡ଼ି ରହିଥିବାରୁ ଏହା ନିର୍ଭର କରୁଥିବା ଆଖପାଖ ୧୦୦ଟି ଗାଁର ଲୋକେ ଦୈନିକ ଯନ୍ତ୍ରଣାର ଶିକାର ହେଉଛନ୍ତି ।
