ମଣିଷ ଉପରୁ ବିଶ୍ୱାସ ତୁଟୁଛି, ଶିକାରୀ ଭୟରେ ଆସୁନାହାନ୍ତି କାଜଚକୁଆ

ଦୂର ଦିଗବଳୟରେ ଢେଉଢେଉକା ପାହାଡ଼ । ଅସ୍ତ ସୂର୍ଯ୍ୟ ହସି ହସି ଯାଉଥିବା ବେଳେ ସୁନ୍ଦର ଦିଶୁଛି ବ୍ରାହ୍ମଣୀ ନଦୀ । ଢେଙ୍କାନାଳ ସହରର ଏଦୃଶ୍ୟ ଅତି ମନଲୋଭର । ଏହି ସହର ବିଦେଶୀ ପକ୍ଷୀ ମାନଙ୍କ ପାଇଁ ପ୍ରେମର ସହର, ବିଶ୍ୱାସର ଭୂସ୍ୱର୍ଗ । ସେଇଥି ପାଇଁ ତ ଶୀତ ଆସିଲେ ସାତ ଦରିଆ ତେର ନଈ ପାର ହୋଇ ଏଇ ରଙ୍ଗୀନ୍ ପକ୍ଷୀ ସବୁ ଉଡ଼ି ଆସନ୍ତି ବଣ ପାହାଡ଼ ଘେରା ଢେଙ୍କାନାଳକୁ । ଯେଉଁଠି ବହିଯାଉଛି ବିଶ୍ୱାସ ଓ ଭଲପାଇବାର ବ୍ରାହ୍ମଣୀ ନଦୀ । ଆଉ ତାରି ପାଣିରେ ପହଁରୁ ଥାଆନ୍ତି ଦୁଇ ପ୍ରେମ ପକ୍ଷୀ । ଗୋଟିଏ କାଜ ଆଉ ଗୋଟିଏ ଚକୁଆ । ଦୁହିଁଙ୍କୁ ଯୋଡ଼ିଦେଲେ ଲେଖା ହୁଏ କାଜ ଚକୁଆଙ୍କ ପ୍ରେମ କାହାଣୀ ।

ବ୍ରାହ୍ମଣୀ ନଦୀରେ ଏବେ ଜୋରସୋରରେ ଚାଲିଛି କାଜ ଚକୁଆଙ୍କ ପ୍ରେମ । ଏଗୁଡ଼ିକ ଉତ୍ତରଆଫ୍ରିକା, ଇରାନ,ତୁର୍କି ଓ ମଧ୍ୟ ଏସିଆରେ ଅଧିକ ସଂଖ୍ୟାରେ ଦେଖାଯାଆନ୍ତି । ଶୀତ ଋତୁ ଆସିଲେ ସେମାନେ ଅତିଥି ହୋଇ କାହିଁକେତେ ଦୂରରୁ ଉଡ଼ି ଆସନ୍ତି । ଭାରତରେ ଏମାନଙ୍କୁ ବ୍ରାହ୍ମୀଣୀ ବତକ ବୋଲି କୁହାଯାଏ। ଓଡ଼ିଶାରେ ଏମାନେ କାଜ ଚକୁଆ ନାଁରେ ବେଶ୍ ପରିଚିତ ।

କୁହାଯାଏ ଏ ପକ୍ଷୀ କାଳେ ସପରିବାର ଆସନ୍ତି । ସେମାନଙ୍କ ଭିତରେ ମୁଖିଆ ବି ଅଛନ୍ତି । ଗୋଟିଏ ଯୋଡ଼ା କାଜ ଚକୁଆ ସେମାନଙ୍କ ମେଳିର ମୁଖିଆ । ସିଏ ସତର୍କତାର ସହ ଜଗି ବସି ଥାଆନ୍ତି । ଟିକିଏ ବିପଦ ଆଶଙ୍କା ହେଲେ ଫୁର୍ କି ଉଡି ଯାଆନ୍ତି । ସବୁ ପକ୍ଷୀ ଯୋଡ଼ି ଯୋଡ଼ି ହୋଇ ପହଁରୁ ଥାଆନ୍ତି ଆଉ ଉଡ଼ି ବୁଲୁଥାଆନ୍ତି । ଶୀତ ସକାଳ ଓ ଶୀତ ସଞ୍ଜରେ ଓଡ଼ିଶା ମାଟି ପାଣି ପବନକୁ ଉପଭୋଗ କରୁଥାଆନ୍ତି।

ଶୀତ ସରି ସରି ଆସିଲେ ଏମାନେ ବାହୁଡ଼ିଯାଆନ୍ତି ନିଜ ମାଟିକୁ । ହେଲେ ଏବେ ତ ଏମାନେ ସବୁଦିନ ପାଇଁ ଫେରିଯାଉଛନ୍ତି। ଆଉ ଏ ମାଟିକୁ ବିଶ୍ୱାସ କରୁ ନାହାନ୍ତି। ପ୍ରାୟ ୧୦ ବର୍ଷ ପୂର୍ବରୁ ଏହି ପକ୍ଷୀଗୁଡ଼ିକ ଶହଶହ ସଂଖ୍ୟାରେ ଏଠାକୁ ଆସୁଥିଲେ । ଶିକାରୀ ମାନଙ୍କର ଲୋଲୁପ ଦୃଷ୍ଟିର ଶିକାର ହୋଇ ବର୍ଷ ପରେ ବର୍ଷ ଏଇ ନିରିହ ପକ୍ଷୀ ମଣିଷ ଉପରୁ ବିଶ୍ୱାସ ତୁଟାଇ ଦେଉଛି । ଆମ ଭାରତୀୟ ପରମ୍ପରାରେ ଅତିଥିଙ୍କୁ ଯଥାମାନ୍ୟ ସମ୍ମାନ ଦିଆଯାଏ । ସ୍ନେହ ଶ୍ରଦ୍ଧା କରାଯାଏ । ବାହାର ଅତିଥିଙ୍କୁ ଦେବତୂଲ୍ୟ ଚର୍ଚ୍ଚା କରାଯାଏ । ହେଲେ ଆମ ଲୋକ ଏତେ ତଳକୁ ଖସିଗଲାଣି ଯେ, ଅତିଥିଙ୍କୁ ମାରି ଖାଇଯିବା ଭଳି ଘୃଣ୍ୟ ଅପରାଧ କରିବାକୁ ବି ପଛାଉ ନାହାନ୍ତି ।

ଢେଙ୍କାନାଳରୁ ରାଜଶ୍ରୀ ଶତପଥିଙ୍କ ରିପୋର୍ଟ