LIVE TV
ପସ୍କୋ ବିରୋଧୀ ଆନ୍ଦୋଳନ ବେଳେ ଯେଉଁ ମାଟି ରକ୍ତରଂଜିତ ହୋଇଥିଲା, ସେହି ମାଟି ପୁଣି ଭିଜିବା ଆରମ୍ଭ ହୋଇଛି ନିରୀହଙ୍କ ଲୁହ ଆଉ ଲହୁରେ । ଦୁର୍ବାର ଆନ୍ଦୋଳନର ପ୍ରତିବନ୍ଧକକୁ ଭେଦି ନପାରି ଯେଉଁ ମାଟିରୁ ବିଦାୟ ନେଇଗଲା ପସ୍କୋ, ସେହି ମାଟିରେ ଏବେ ମୁଣ୍ଡ ଟେକୁଥିବା JSWକୁ ନେଇ ଚରମ ଲଢ଼େଇ । ମୁହାଁମୁହିଁ ପୋଲିସ-ପବ୍ଲିକ । ଉଗ୍ର ହୋଇଛି ଆନ୍ଦୋଳନ । ଅଶାନ୍ତ ହୋଇପଡ଼ିଛି ଢିଙ୍କିଆ ।
ଜୀବିକାକୁ ସୁରକ୍ଷା ଦେବାକୁ ଯାଇ ପୋଲିସ ସହ ଢିଙ୍କିଆବାସୀଙ୍କ ଆର୍ର୍ପାର୍ ଲଢ଼େଇ । ସମୟ ସକାଳ ପ୍ରାୟ ସାଢ଼େ ୧୧ଟା । JSWର ପ୍ରସ୍ତାବିତ ପ୍ରକଳ୍ପ ପାଇଁ ଜାରି ରହିଥିବା ଉଚ୍ଛେଦ କାର୍ଯ୍ୟ ଭିତରେ ଢିଙ୍ଗିଆବାସୀ ନିଜ ନିଜ ପାନବରଜକୁ ସୁରକ୍ଷା ଦେବାକୁ ବାହାରିଥିଲେ । ଏହି ସମୟରେ ମାହାଳ ପଟ ପ୍ରବେଶ ପଥରେ ସଦଳବଳେ ଛକିରହିଥିଲା ପୋଲିସ ।
Also Read
ସେଠାରୁ ହିଁ ଉପୁଜିଥିଲା ବିଦ୍ରୋହର ସୂତ୍ରପାତ । ବାଟ ଓଗାଳିଥିବା ପୋଲିସ ଫୋର୍ସ ଉପରକୁ ପିନ୍ଧା ଶାଢ଼ୀ ଫିଙ୍ଗିଥିଲେ ମହିଳା । କିଛି ସମୟ ଧରି ଏଭଳି ମୁହାଁମୁହିଁ ପରେ ଅଣାୟତ୍ତ ହୋଇପଡ଼ିଲା ସ୍ଥିତି । ଶେଷରେ ଆରମ୍ଭ ହୋଇଥିଲା ପୋଲିସର ଲାଠିଚାର୍ଜ । ପୋଲିସ-ପବ୍ଲିକର ସଂଘର୍ଷ ଭିତରେ ରଣକ୍ଷେତ୍ର ପାଲଟିଯାଇଥିଲା ସାରା ଢିଙ୍କିଆ ଇଲାକା ।
୨୦୨୧, ଡିସେମ୍ବର ୦୧ରେ ବାଲିଟିକିରାରେ ଏବଂ ଡିସେମ୍ବର ୨୧ରେ ମାହାଳ ଗାଁର ସୀମା ପୁନଃନିର୍ଦ୍ଧାରଣ ବେଳେ ପୋଲିସ ସହ ମୁହାଁମୁହିଁ ଏବଂ ଧସ୍ତାଧସ୍ତି ହୋଇଥିଲେ ଢିଙ୍କିଆବାସିନ୍ଦା । ଏହାପରେ ଜାନୁୟାରୀ ୧ରୁ ଢିଙ୍କିଆର ପ୍ରବେଶ ପଥ ଗୁଡ଼ିକରେ ଲାଗିରହିଥିଲା ଛକାପଞ୍ଛା । ଲୋକଙ୍କ ଅଭିଯୋଗ, ପୋଲିସ ଲଗାଇ ପାନବରଜ ଗୁଡ଼ିକୁ ପ୍ରଶାସନ ଭାଙ୍ଗୁଛି ଏବଂ ବିରୋଧ କଲେ ମିଛ ମାମଲା ରୁଜୁ କରୁଛି । ଏହାକୁ ବିରୋଧ କରିବା ସହ ଆଜି ପାନବରଜ ସୁରକ୍ଷା ଦେବାକୁ ଯିବାବେଳେ ମୁହାଁମୁହିଁ ପରିସ୍ଥିତି ଉପୁଜିଥିଲା ଢିଙ୍କିଆରେ । ଫଳରେ କାହା ମୁଣ୍ଡ ଫାଟି ଯାଇଛି ତ କାହାର ଗୋଡ଼ ଭାଙ୍ଗିଯାଇଛି । ଏପରିକି କିଛି ଛୋଟପିଲା ବି ଆହତ ହୋଇଥିବା କୁହାଯାଉଛି । ଅନେକ ଲୋକ ନିଜର ସଂପର୍କୀୟଙ୍କ ପତ୍ତା ପାଉନଥିବା ଅଭିଯୋଗ କରିଛନ୍ତି । ଏହି ଘଟଣା ପରେ ବର୍ତ୍ତମାନ ଢିଙ୍କିଆରେ ଚାପା ଉତ୍ତେଜନା ଲାଗି ରହିଛି । କିଛି ଆହତଙ୍କୁ ମେଡ଼ିକାଲରେ ଭର୍ତ୍ତି କରାଯାଇଛି ।
ସେପଟେ JSW ବିରୋଧୀ ଆନ୍ଦୋଳନର ନେତୃତ୍ୱ ନେଉଥିବା ପୂର୍ବତନ ସମିତି ସଭ୍ୟ ଦେବେନ୍ଦ୍ର ସ୍ୱାଇଁଙ୍କ ସହ ୫ରୁ ୬ଜଣଙ୍କୁ ପୋଲିସ ଗିରଫ କରିଛି । ଏସ୍ପିଙ୍କ କହିବା କଥା, ଆନ୍ଦୋଳନକାରୀ ପୋଲିସ ଉପରକୁ ପ୍ରଥମେ ଆକ୍ରମଣ କରିବାରୁ କେବଳ ମୃଦୁ ଲାଠିଚାର୍ଜ କରାଯାଇଛି । ଲୋକଙ୍କ ସହମତିରେ ପାନବରଜ ଭଙ୍ଗାଯାଉଛି ।
ସେପଟେ ଢିଙ୍କିଆରେ ପୋଲିସ-ପବ୍ଲିକ ମୁହାଁମୁହିଁ ସ୍ଥିତିକୁ ନେଇ ରାଜନୈତିକ ଆରୋପ । ଶିଳ୍ପ କରାଯାଉ କିନ୍ତୁ ଜନସାଧାରଣଙ୍କ ସହମତିରେ । କୌଣସି ବର୍ବରତା ପ୍ରକାଶ ନପାଉ ବୋଲି ବିଜେପି କହିଛି । ରାଜ୍ୟ ସରକାର କିଛି ଲୋକଙ୍କୁ ବୁଝାଇ ପାରିନାହାନ୍ତି ବୋଲି ବିଜେପି ରାଜ୍ୟ ସଭାପତି କହିଥିବା ବେଳେ ମୁଖ୍ୟମନ୍ତ୍ରୀ ତୁରନ୍ତ ହସ୍ତକ୍ଷେପ କରି ଘଟଣାର ବିଚାର ବିଭାଗୀୟ ତଦନ୍ତ ସହ ଶିଳ୍ପ ବନ୍ଦ କରିବାକୁ ଦାବି କରିଛି କଂଗ୍ରେସ ।
