LIVE TV
ପୂର୍ବ ଲଦ୍ଦାଖ ପାଙ୍ଗଙ୍ଗ୍ ହ୍ରଦରେ ପାଟ୍ରୋଲିଂ କରିବା ଓ ଚୀନ୍ ସେନାର ଗତିବିଧି ଉପରେ ନଜର ରଖିବା ହେବ ଆହୁରି ସହଜ । କାରଣ ଏହି ହ୍ରଦରେ ପାଟ୍ରୋଲିଂ କରିବା ପାଇଁ ସେନାକୁ ମିଳିଛି ଲ୍ୟାଣ୍ଡିଂ କ୍ରାଫ୍ଟ ଆସଲ୍ଟ । ଏହା ପୂରାପୂରି ସ୍ୱଦେଶୀ । ଏଥିସହ ଏଲ୍ଏସି ଉପରେ ଉଡ଼ି ଆକାଶ ମାର୍ଗରୁ ସ୍ୱଦେଶୀ ଡ୍ରୋନ୍ ମଧ୍ୟ ନଜର ରଖିବ ସୀମା ଉପରେ ।
ଭାରତୀୟ ସେନା ପାଇଁ ଆଉ ଅପହଞ୍ଚ ନୁହେଁ ପାଙ୍ଗଙ୍ଗ୍ । ନିମିଷକେ ହ୍ରଦର କୋଣ ଅନୁକୋଣରେ ପହଞ୍ଚିପାରିବ ଦେଶର ଜାଗ୍ରତ ପ୍ରହରୀ । ଲ୍ୟାଣ୍ଡିଂ କ୍ରାଫ୍ଟ ଆସଲ୍ଟ ସବୁ କିଛି ସହଜ କରିଦେଇଛି । ପାଙ୍ଗଙ୍ଗର ଗୋଟିଏ ପାର୍ଶ୍ୱ ଭାରତ ସୀମାକୁ ଲାଗିଥିବା ବେଳେ, ଅନ୍ୟଟି ଚୀନ୍ ଅଧୀନସ୍ଥ ତିବ୍ବତକୁ ଲାଗିଛି । ଗଲଓ୍ୱାନ୍ ଘାଟିରେ ସଂଘର୍ଷ ପରେ ଉଭୟ ଦେଶ ମଧ୍ୟରେ ସୃଷ୍ଟି ହୋଇଥିବା ତିକ୍ତତା ଏବେବି ଶାନ୍ତ ପଡ଼ିନି ।
ପାଙ୍ଗଙ୍ଗ୍ ଉପରେ ତୀକ୍ଷ୍ଣ ନଜର ରଖିଛି ଭାରତୀୟ ସେନା । ତେବେ ପାଙ୍ଗଙ୍ଗ୍ ହ୍ରଦର କିଛି ଅଞ୍ଚଳରେ ଭାରତୀୟ ସେନା ନିୟମିତ ପାଟ୍ରୋଲିଂ କରୁଥିବା ବେଳେ ଏହାକୁ ସହଜ କରିଦେଇଛି ସେନାର ଏହି ସ୍ପିଡ୍ ବୋଟ୍ । ଲ୍ୟାଣ୍ଡିଂ କ୍ରାଫ୍ଟ ଆସଲ୍ଟରେ ଏକାଥରକେ ୩୫ ଯବାନ ଯାଇପାରିବେ । ଭାରତୀୟ ସେନାର କୋର୍ ଅଫ୍ ଇଞ୍ଜିନିୟର୍ସ ଏହାର ରକ୍ଷଣାବେକ୍ଷଣ କରୁଥିବା ବେଳେ ଏହାକୁ ଗତକାଲି ପ୍ରତିରକ୍ଷାମନ୍ତ୍ରୀ ରାଜନାଥ ସିଂ ହ୍ରଦରେ ଭର୍ଚୁଆଲ୍ ମୋଡରେ ସେନାରେ ସାମିଲ କରିଛନ୍ତି ।
#WATCH | Indian Army showcased capability of the Landing Craft Assault deployed in Pangong lake by the force along the LAC with China to Defence Minister Rajnath Singh today. The boats can carry 35 combat troops at a time and can reach any area of the lake in a very short time pic.twitter.com/ejiJVATY5m
— ANI (@ANI) August 16, 2022
ପାଙ୍ଗଙ୍ଗ୍ ହ୍ରଦରେ ଲ୍ୟାଣ୍ଡିଂ କ୍ରାଫ୍ଟ ଆସଲ୍ଟ ସହିତ LAC ଉପରେ ଆକାଶମାର୍ଗରୁ ନଜର ରଖିବା ପାଇଁ ସ୍ୱଦେଶୀ ଜ୍ଞାନକୌଶଳରେ ନିର୍ମିତ ଡ୍ରୋନ୍ ସିଷ୍ଟମକୁ ମଧ୍ୟ ମୁତୟନ କରାଯାଇଛି । ଏହା ଆକାଶରୁ ଥାଇ ଶତ୍ରୁ ସୈନ୍ୟଙ୍କ ଗତିବିଧି ସଂପର୍କରେ ଭାରତୀୟ ସେନାକୁ ସୂଚନା ଦେଇପାରିବ । ଏଥିସହ LAC ରେ ମୁତୟନ ଯବାନଙ୍କ ପାଇଁ ମେଡ୍ ଇନ୍ ଇଣ୍ଡିଆ ଯୁଦ୍ଧ ବାହନକୁ ମଧ୍ୟ ସେନାକୁ ହସ୍ତାନ୍ତର କରିଛନ୍ତି ରାଜନାଥ ।
ଏସବୁ ଛଡା ପ୍ରତିରକ୍ଷା ମନ୍ତ୍ରୀ ରାଜନାଥ ସିଂଙ୍କ ଉପସ୍ଥିତିରେ ଆହୁରି ଅନେକ ଅତ୍ୟାଧୁନିକ ଯୁଦ୍ଧାସ୍ତ୍ର ଏବଂ ଯୁଦ୍ଧ ଉପକରଣ ମଧ୍ୟ ଭାରତୀୟ ସେନାରେ ସାମିଲ କରାଯାଇଛି । ଏଥି ମଧ୍ୟରେ ରହିଛି ଏକ ମାନବ ବିହୀନ ଏରିଏଲ ସିଷ୍ଟମ, କୁଇକ ରିଆକ୍ସନ ଯୁଦ୍ଧ ଯାନ, ସର୍ଭିଲେନ୍ସ ଯନ୍ତ୍ରାଂଶ । ଏହା ବ୍ୟତୀତ ଆଣ୍ଟି-ପର୍ସନେଲ ମାଇନ -ନିପୁଣ ଏବଂ ଫ୍ୟୁଚରିଷ୍ଟିକ୍-ଇନସାସ୍ ରାଇଫଲ ମଧ୍ୟ ସେନାକୁ ହାସ୍ତାନ୍ତର କରାଯାଇଛି ।
ବଡ କଥା ହେଉଛି ଏହି ଦୁଇଟି ଯାକ ସିଷ୍ଟମ ଭାରତୀୟ କଂପାନୀ ଦ୍ୱାରା ନିର୍ମାଣ କରାଯାଇଛି । ସେହିପରି ଇନଫାଣ୍ଟ୍ରି ପ୍ରୋଟେକଟେଡ ମୋବିଲିଟି ଭେଇକିଲ, ସ୍ୱୟଂଚାଳିତ ବା ଅଟୋମ୍ୟାଟିକ କମ୍ୟୁନିକେସନ ସିଷ୍ଟମ, ଟ୍ୟାଙ୍କ ପାଇଁ ଉନ୍ନତ ଧରଣର ସାଇଟ୍ ସିଷ୍ଟମ ଏବଂ ଅତ୍ୟାଧୁନିକ ଥର୍ମାଲ ଇମେଜର୍ ମଧ୍ୟ ସାମିଲ କରାଯାଇଛି, ଯାହା ସେନାକୁ ଆହୁରୀ ଶକ୍ତିଶାଳୀ କରାଇବାରେ ସହାୟକ ହେବ । ଏହି ଅବସରରେ ସେନା ମୁଖ୍ୟ ଜେନେରାଲ ମନୋଜ ପାଣ୍ଡେ ମଧ୍ୟ ଉପସ୍ଥିତ ଥିଲେ ।
