World AIDS Day: ପ୍ରତିବର୍ଷ ଓଡ଼ିଶାରେ ୩ରୁ ୫ ହଜାର ରୋଗୀ ଚି଼ହ୍ନଟ

ଆଜି ବିଶ୍ୱ ଏଡ୍‌ସ୍‌ ଦିବସ(World AIDS Day) । ଚଳିତ ବର୍ଷର ଥିମ୍‌ ରହିଛି- Let Communities Lead । ରାଜ୍ୟରେ ୧୯୮୮ ପର ଠାରୁ ମୋଟ୍‌ ୬୦ ହଜାର ୮୮୬ ଏଚ୍‌ଆଇଭି ପଜିଟିଭ ରୋଗୀ ଚିହ୍ନଟ ହୋଇଛନ୍ତି । ଯାହା ମଧ୍ୟରୁ ଆଣ୍ଟି ରେଟ୍ରୋଭାଇରସ୍ ଥେରାପି ରେଜିଷ୍ଟର ଅଛନ୍ତି ୪୭ ହଜାର ୩୯୦ ଜଣ ।

ରୋଗୀ ସଂଖ୍ୟା ୫୦ ହଜାର ତଳକୁ ରହିଲେ ଲୋ ପ୍ରିଭିଲେଜ୍ କ୍ୟାଟେଗୋରୀରେ ଯାଏ । ଓଡିଶା ଏହି ବର୍ଗରେ ରହିଛି । ସେହିପରି ହାଇ ପ୍ରିଭିଲେଜ୍ ଷ୍ଟେଟ୍ ମଧ୍ୟରେ ମହାରାଷ୍ଟ୍ର, ଆନ୍ଧ୍ରପ୍ରଦେଶ ଭଳି  ରାଜ୍ୟ ରହିଛି । ଓଡ଼ିଶାରେ ପ୍ରତିବର୍ଷ ପ୍ରାୟ ୩ରୁ ୫ ହଜାର ରୋଗୀ ଚି଼ହ୍ନଟ ହେଉଛନ୍ତି । 

ଗଞ୍ଜାମ ଜିଲ୍ଲାରେ ସବୁଠାରୁ ଅଧିକ ଏଚ୍‌ଆଇଭି ପଜିଟିଭ୍ ଚି଼ହ୍ନଟ ହୋଇଛନ୍ତି । ମୋଟ୍‌ ରୋଗୀଙ୍କ ମଧ୍ୟରୁ ୩୩ ପ୍ରତିଶତ କେବଳ ଗଞ୍ଜାମ ଜିଲ୍ଲାର ଅଛନ୍ତି । ଏହା ପଛକୁ ରହିଛି କଟକ । ଏଡ୍‌ସ୍‌ ସଚେତନତା ପାଇଁ ମୁଖ୍ୟତଃ କେନ୍ଦ୍ର ସରକାର ଅର୍ଥ ଯୋଗାଉଛନ୍ତି ।

Naco ସହାୟତାରେ OSACS ଅର୍ଥାତ୍ ଓଡିଶା ରାଜ୍ୟ ଏଡ୍‌ସ୍‌ ସଚେତନ ନିୟନ୍ତ୍ରଣ ସମିତି ୨୦୦୪ରୁ ରାଜ୍ୟରେ ସଚେତନତା କାର୍ଯ୍ୟକ୍ରମ  କରୁଛି । ରାଜ୍ୟ ସରକାରଙ୍କ ନିଦାନ କେନ୍ଦ୍ରରେ ମାଗଣା ରକ୍ତ ପରୀକ୍ଷା କରାଯାଉଥିବା ବେଳେ ନିରାମୟ ଦ୍ୱାରା ମାଗଣା ଔଷଧ ପ୍ରଦାନ କରାଯାଉଛି ।

ଏହାସହ  ART ଅର୍ଥାତ୍ ଆଣ୍ଟି ରେଟ୍ରୋଭାଇରସ୍ ଥେରାପିରେ ପଞ୍ଜୀକୃତ ରୋଗୀଙ୍କୁ ବିଭିନ୍ନ ସାମାଜିକ ସୁରକ୍ଷା ଯୋଜନାରେ ଅନ୍ତଭୁକ୍ତ କରାଯାଉଥିବା OSACS କର୍ତ୍ତୃପକ୍ଷ କହିଛନ୍ତି ।

କେଉଁ କାରଣରୁ ବ୍ୟାପିଥାଏ ଏଡ୍‌ସ୍‌...

• ଅସୁରକ୍ଷିତ ଯୌନ ସମ୍ପର୍କ
• ସିରିଞ୍ଜର ଏକାଧିକ ବ୍ୟବହାର
• ରକ୍ତଦାନ ସମୟରେ ସଚେତନତା ଅଭାବ