LIVE TV
ରାସାୟନିକ କାରଖାନାରେ ଅଗ୍ନିକାଣ୍ଡ । ଉତ୍ତରପ୍ରଦେଶର ହାପୁରର ଏକ ରାସାୟନିକ କାରଖାନାରେ ବଏଲର ଫାଟି ଅତି କମରେ ୮ ଜଣଙ୍କର ମୃତ୍ୟୁ ଘଟିଛି । ମେରଟ ଜୋନ୍ ଇନ୍ସପେକ୍ଟର ଜେନେରାଲ୍ ପୋଲିସ୍ ପ୍ରବୀଣ କୁମାର ଘଟଣା ସମ୍ପର୍କରେ ସ୍ପଷ୍ଟ କରିଛନ୍ତି । ତେବେ ଏହି ବିସ୍ଫୋରଣରେ ୨୦ରୁ ଅଧିକ ଲୋକ ଆହତ ହୋଇଛନ୍ତି । ବର୍ତ୍ତମାନ ଘଟଣାସ୍ଥଳରେ ଅଗ୍ନିଶମ ବାହିନୀ ପହଞ୍ଚିଥିବା ବେଳେ ଉଦ୍ଧାର କାର୍ଯ୍ୟରେ ନିୟୋଜିତ ହୋଇଛନ୍ତି । ପୋଲିସ ଏବଂ ପ୍ରଶାସନ ଦଳ ମଧ୍ୟ ଘଟଣାସ୍ଥଳରେ ପହଞ୍ଚିଛନ୍ତି । ସ୍ଥାନୀୟ ଲୋକଙ୍କ କହିବା ଅନୁସାରେ ଦୁଇ ଡର୍ଜନ ଲୋକ କାରଖାନା ଭିତରେ ଏବେ ବି ଫସି ରହିଛନ୍ତି । ସେମାନଙ୍କୁ ନିରାପଦରେ ଉଦ୍ଧାର କରିବା ପ୍ରଶାସନ ପାଇଁ ବଡ଼ ଆହ୍ୱାନ ।
ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ବିସ୍ଫୋରଣରେ ଶ୍ରମିକଙ୍କ ମୃତ୍ୟୁକୁ ନେଇ ଗଭୀର ଦୁଃଖ ପ୍ରକାଶ କରିଛନ୍ତି । ସେ ମୃତକଙ୍କ ଶୋକସନ୍ତପ୍ତ ପରିବାର ବର୍ଗଙ୍କୁ ସମବେଦନା ଜଣାଇଛନ୍ତି । ଅଧିକାରୀମାନଙ୍କୁ ତୁରନ୍ତ ଘଟଣାସ୍ଥଳରେ ପହଞ୍ଚିବାକୁ ମୁଖ୍ୟମନ୍ତ୍ରୀ ନିର୍ଦ୍ଦେଶ ଦେଇଛନ୍ତି । ମାମଲାର ଅନୁସନ୍ଧାନ କରିବା ସହ ଦୁର୍ଘଟଣାରେ ଆହତ ଲୋକଙ୍କୁ ଉପଯୁକ୍ତ ଚିକିତ୍ସା ଯୋଗାଇବା ପାଇଁ ମୁଖ୍ୟମନ୍ତ୍ରୀ ନିର୍ଦ୍ଦେଶ ଦେଇଛନ୍ତି । କେବଳ ଏତିକି ନୁହେଁ ବଏଲର ବିସ୍ଫୋରଣରେ ବିଶେଷଜ୍ଞଙ୍କୁ ଅନୁସନ୍ଧାନ କରିବାକୁ ମଧ୍ୟ ନିର୍ଦ୍ଦେଶ ଦିଆଯାଇଛି ।
ଗତ ବର୍ଷ ଅଗଷ୍ଟରେ ଗାଜିଆବାଦର କଭ ନଗରରେ ଥିବା ଏକ ରାସାୟନିକ କାରଖାନାରେ ମଧ୍ୟ ଏହିପରି ନିଆଁ ଲାଗିଥିଲା । କିଛି ସମୟ ମଧ୍ୟରେ ରାସାୟନିକ କାରଖାନାରେ ବିସ୍ଫୋରଣ ହେଲା । ନିଆଁକୁ ଆୟତ୍ତ କରିବା ପାଇଁ ଏଠାରେ ଆଠଟି ଗାଡି ଘଟଣାସ୍ଥଳରେ ପହଞ୍ଚିଥିଲା, ଯେଉଁଥିରୁ ଚାରିଟି ଗାଡି ପୋଡି ଯାଇଥିଲା ।
