ପରିବାର ବୋଝ ତଳେ ଲୁଚିଗଲା ଅସୁମାରୀ ସ୍ୱପ୍ନ; ସାନ ଭଉଣୀକୁ ମଣିଷ କରିବାକୁ ମୂଲ ଲାଗୁଛନ୍ତି ଲତା

ବିଛଣାରେ ମାଆ ଶୋଇଛି ଓ ମାଆର ହାତ ଗୋଡ ବସି ଘସି ଦେଉଛି ବଢିଲା ଝିଅ । ରୋଗରେ ପଡିଥିବା ମାଆ କିଛି କରିପାରୁନି । ସେଥିପାଇଁ ଘର ଗୋଟାକାର ଦାୟିତ୍ୱ ଏବେ ଲତାଙ୍କ ଉପରେ । ଖାଲି ମାଆ ନୁହେଁ ବରଂ କୁନି ଭଉଣୀର ସେବା ଯତ୍ନ କରିବା ସହ ମୂଲ ମଜୁରୀ କରି ପରିବାର ଚଳାଉଛି ଲତା। କିନ୍ତୁ ଜୀବନ ଯୁଦ୍ଧରେ ସେ ହାର ମାନିନାହାନ୍ତି ବରଂ ସଂଘର୍ଷ କରି ବଂଚିବାର ରାସ୍ତା ପାଇଛନ୍ତି ।

ସଂଘର୍ଷ କରୁଛନ୍ତି, ପରିବାରର ଯତ୍ନ ନେଉଛନ୍ତି । ବର୍ଷେ ହେବ ବାପା ଆର ପାରିକୁ ଚାଲି ଗଲେ । ବାପା ବଂଚିଥିବା ବେଳେ ଲତା ଓ ନଳିନୀ ଦୁଇ ଭଉଣୀଙ୍କ ପାଇଁ ଅନେକ ସ୍ୱପ୍ନ ଦେଖିଥିଲେ । ଆଉ ସେଇ ସ୍ୱପ୍ନକୁ ପୂରଣ କରିବା ପାଇଁ କୁଲି ମଜୁରୀ କରି ଯୋଉ ଦୁଇ ପଇସା ରୋଜଗାର କରୁଥିଲେ, ସେଇ ଟଙ୍କାରେ ପରିବାର ଚଳାଇବା ସହ ଦୁଇ ଝିଅଙ୍କୁ ପାଠ ବି ପଢାଉ ଥିଲେ । କିନ୍ତୁ ବିଧିର ବିଧାନ କିଛି ଅଲଗା ଥିଲା । ଗତ ୨୦୨୧ ଅକ୍ଟୋବର ମାସରେ ବାପା ନରେନ୍ଦ୍ର ପଟେଲ ସମସ୍ତଙ୍କୁ ଛାଡି ଆରପାରିକୁ ଚାଲିଗଲେ । ବାପା ଚାଲିଯିବା ପରେ ଲତାଙ୍କ ପାଠ ପଢାରେ ଲାଗିଲା ଡୋରି ।

ମାଟ୍ରିକ ପଢିବା ବେଳେ ଲତାଙ୍କ ବାପା ଚାଲିଯିବା ପରେ ପରିବାରରେ ବଢିଥିଲା ଦୁଃଖ । ରୋଗୀଣା ମାଆର ସେବା ସହିତ ସାନ ଭଉଣୀର ପାଠ ପଢାର ବୋଝ ପଡିଥିଲା ଲତାଙ୍କ ପିଠିରେ । କଷ୍ଟ ଆସିଥିଲା ସତ କିନ୍ତୁ ଏହାରି ମଧ୍ୟରେ ସଂଘର୍ଷ କରି ସାନ ଭଉଣୀକୁ ପାଠ ପଢାଇବାର ସୁନେଲୀ ସ୍ୱପ୍ନ ଦେଖୁଥିଲେ ଲତା । ଖାଲି ସ୍ୱପ୍ନ ଦେଖିଲେ ତ ହେବନି ବରଂ ନିଜର ସ୍ୱପ୍ନ ପୂରଣ ପାଇଁ ପର ଦୁଆରେ ଏବେ ମୂଲ ମଜୁରୀ କରୁଛି ଲତା ।

ଗୁରୁତ୍ୱପୂର୍ଣ୍ଣ କଥା ହେଲା, ଏତେ ଅସୁବିଧାରେ ଥିବା ପରେ ବି ଲତାଙ୍କ ପରିବାରକୁ ମିଳିନି ସରକାରୀ ସହାୟତା । ନିଜ ଅସୁବିଧା ସମ୍ପର୍କରେ ବ୍ଲକ୍‌କୁ ଯାଇ ବଡବାବୁଙ୍କୁ ଭେଟିଛନ୍ତି ସତ, ହେଲେ କିଛି ଲାଭ ମିଳିନି । ବରଂ ଏବେ ବି ଅନ୍ୟ ଦୁଆରେ ମଜୁରୀ କରି ପରିବାର ଚଳାଉଛନ୍ତି ଲତା । ଯଦି ସରକାର ଏହି ପରିବାରକୁ ସହାୟତା କରିବା ସହ ଲତା ମାଆଙ୍କୁ ବିଧବା ଭତାଟିଏ ଯୋଗାଇ ଦିଅନ୍ତେ, ତେବେ ଲତାଙ୍କ ସ୍ୱପ୍ନ ପୂରଣ ହେବା ସହ ପରିବାର ବଂଚିଯାଆନ୍ତା । ସେପଟେ ବିଡିଓ କହିଛନ୍ତି, ଖୁବଶୀଘ୍ର ବିଧବା ଭତା ମିଳିବା ସହ ଅନ୍ୟାନ୍ୟ ସରକାରୀ ସହାୟତା ତାଙ୍କୁ ଯୋଗାଇ ଦିଆଯିବ।

(ରିପୋର୍ଟର- ମାୟାଧର ସରାଫ, ନୂଆପଡା)