୪ ଖଣ୍ଡ ବାଉଁଶ ,କିଛି ଛିଣ୍ଡା ଅଖାରେ ବିତୁଛି ଭଗବାନଙ୍କ ଜୀବନ

ଚାରିଖଣ୍ଡ ବାଉଁଶ..କିଛି ଅଖା ବସ୍ତା, ଛିଣ୍ଡା ଜରି ପାଲକୁ ନେଇ ଭୂଇଁ ଉପରେ ଛିଡା ହୋଇଛି ଭଙ୍ଗା କୁଡିଆ । ଖରା ପବନରୁ ବର୍ତ୍ତିବାକୁ କୁଡିଆ ଚାରିକଡେ ଅଖା ବସ୍ତା ସବୁ ଓହଳାଯାଇଛି । ଭିତରେ ପଡିଛି ଝିଣ୍ଡା ସପଟିଏ । ସେଇଠି ମାଟି ଚୁଲି ଆଉ କିଛି କଂସା ବାସନ, ପୁରୁଣା ଟ୍ରଂକ ଟି ଉପରେ ଲଣ୍ଠନ ଟିଏ ଅଛି । ବାହାରୁ ଯେତିକି ଦେଖାଯାଉଛି ବାସ୍ ସେତିକି ହିଁ ସମ୍ପତ୍ତି । ଏତକ ଧରି ଆମ୍ବଗଛ ତଳେ ଜୀଉଁଛନ୍ତି ଭଗବାନ ।

ଭଗବାନ ନାୟକ..ବୟସ ୫୪ ବର୍ଷ ହେଲାଣି। ଢେଙ୍କାନାଳ ଜିଲ୍ଲା ଓଡାପଡା ବ୍ଲକ ଗଦାଶିଳା ଗାଁର ସେ ବାସିନ୍ଦା । ଯାହାଙ୍କର ମୁଣ୍ଡ ଗୁଞ୍ଜିବାକୁ ଆମ୍ବ ଗଛ ମୂଳର ଏଇ ଭଙ୍ଗା କୁଡିଆ ପାଲଟିଛି ଆଶ୍ରୟସ୍ଥଳୀ । ଯେଉଁଠି ଗାଈଗୋରୁ ବି ରହିପାରିବେନି, ସେଇଠି କିନ୍ତୁ ରହୁଛନ୍ତି ଭଗବାନ । ବର୍ଷକୁ ପ୍ରାୟ ଆଠମାସ ଏମିତି କୁଡିଆରେ ରୁହନ୍ତି ସେ । ବର୍ଷା ଦିନରେ ଆଣ୍ଠୁଏ ପାଣି ପଶିଯାଏ କୁଡିଆ ଭିତରେ।  ସେଇଥିପାଇଁ ବର୍ଷା ଆସିଲେ କୁଡିଆ ଘର ଛାଡି ବାର ଦୁଆର ଶୁଣ୍ଢିପିଣ୍ଡା ହୁଅନ୍ତି ଭଗବାନ।

ଅଧିକ ପଢ଼ନ୍ତୁ: ମୁଣ୍ଡ ଗୁଞ୍ଜିବାକୁ ନାହିଁ ଘର, ଗଛ ଡାଳ ସାଜିଛି ସାହାରା

ଭଗବାନଙ୍କ ଅବସ୍ଥା ଯିଏ ନିଜ ଆଖିରେ ଦେଖୁଛି,  ଆହା ପଦେ କହି ତା ଆଖି ଭରିଯାଉଛି ।  ଆଖପାଖ ଅଞ୍ଚଳରେ ମୁଲ ମଜୁରୀ କରି ଯାହା ଦୁଇ ପଇସା ରୋଜଗାର ହୁଏ ସେଥିରେ ଓଳିଏ ଖାଇ ଓଳିଏ ଉପାସ ରୁହନ୍ତି ଭଗବାନ । ଏପଟେ ପୁଣି ବୋଝ ଉପରେ ନଳିତା ବିଡା ସାଜିଛି ତାଙ୍କର ଶାରୀରିକ ଅସୁସ୍ଥତା । ଯେଉଁଥି ପାଇଁ ଅସ୍ତ୍ରୋପଚାରର ଆବଶ୍ୟକତା ମଧ୍ୟ ରହିଛି । କିନ୍ତୁ ନିଜ ରୋଜଗାରରୁ ଭଲକରି ଗଣ୍ଡିଏ ଖାଇବାକୁ ପାଉନଥିବା ଭଗବାନ ଅସ୍ତ୍ରୋପଚାର ପାଇଁ ଟଙ୍କା ଆଣିବେ କେଉଁଠୁ ? ଦୁଃଖ କେବଳ ଏତିକିରେ ବି ସରି ନାହିଁ । ଚାରି ବର୍ଷ ପୂର୍ବେ ଖାଦ୍ୟ ସୁରକ୍ଷା ଯୋଜନାରେ ଭଗବାନଙ୍କୁ ରାସନ କାର୍ଡ ଖଣ୍ଡେ ମିଳିଥିଲା ।  କିନ୍ତୁ ହଠାତ ତାହା ବନ୍ଦ କରି ଦିଆଗଲା । ଯେଉଁଥିପାଇଁ ଅନେକ ସମୟରେ ଉପାସରେ ରହୁଛନ୍ତି ଭଗବାନ । 

ସବୁ ପ୍ରକାର ସରକାରୀ ସୁବିଧା ସୁଯୋଗରୁ ବଞ୍ଚିତ ଭଗବାନଙ୍କୁ ଏଇ ଆମ୍ବଗଛ ଦେଇଛି ସାହାରା । ଯାହା କ୍ୟାମେରାରେ କଏଦ ହୋଇଛି ସେତକ ହିଁ ତାଙ୍କ ସମ୍ପତ୍ତି । ବାରମ୍ବାର ପ୍ରଶାସନ ନିକଟରେ ଗୁହାରି ପରେ ବି ନା ମିଳୁଚି ଘର ଖଣ୍ଡିଏ ନା ପାଞ୍ଚ କେଜି ଚାଉଳ । ଫଳରେ ଖରା ବର୍ଷା କାକରରେ ଭଙ୍ଗା କୁଡିଆରେ ପଡି ରହିଛନ୍ତି ଭଗବାନ ।  କେବେ ଭଗବାନଙ୍କୁ ସାହା ହେବେ ଭଗବାନ, ଆଉ ଗୁହାରି ଶୁଣିବେ ସରକାର..ଚାତକ ପରି ଚାହିଁ ରହିଛନ୍ତି ଭଗବାନ ନାୟକ । 

(ରିପୋର୍ଟ- ରାଜଶ୍ରୀ ଶତପଥୀ, ଢେଙ୍କାନାଳ)