• Facebook
  • Twitter
  • Instagram
  • LinkedIn
  • Youtube
  • Telegram
  • Koo
  • Read in English
Manoranjan Behera

ବାଲେଶ୍ୱର ଜିଲ୍ଲା ହର ମାଉସୀ ନାଁଟି ଭାରି ଜଣା ଶୁଣା । ଏବେ ବୟସ ପାଖାପାଖି ୯୦ ଡେଇଁଲାଣି କିନ୍ତୁ ସରକାରୀ ସହାୟତା ତାଙ୍କ ପାଇଁ ସାତସପନ । ପରିଣତ ବୟସରେ ବି ସେ ହାର ମାନିନାହାନ୍ତି ବରଂ ନିଜେ ଦେଇଥିବା ଏକ ଛୋଟିଆ ଦୋକାନରୁ ଯାହା ଯେମିତି ରୋଜଗାର କରୁଛନ୍ତି, ସେତିକିରେ ନିଜେ ଚଳିବା ସହ ପରିବାର ଚଳାଉଛନ୍ତି ।

ନିର୍ବାଚନ ସମୟରେ ହରମାଉସୀଙ୍କ ଦୁଃଖର ଖବର ଓଟିଭିରେ ପ୍ରସାରଣ କରାଯାଇଥିଲା । ବାସ୍‌ ଖବର ବାଜିବା ପରେ ତାଙ୍କ ପାଖକୁ ନେତାଙ୍କ ସୁଅ ଛୁଟିଥିଲା । ଦିଆଯାଇଥିଲା ଶହଶହ ପ୍ରତିଶ୍ରୁତି । ହେଲେ ପ୍ରତିଶ୍ରୁତି ହେଲା ପାଣିର ଗାର । ଏ ପର୍ଯ୍ୟନ୍ତ ହରମାଉସୀ ପାଇନାହାନ୍ତି ସହାୟତା । ୫୦ ବର୍ଷ ତଳୁ ସ୍ୱାମୀ ଆରପାରିକୁ ଗଲେଣି । ସ୍ୱାମୀଙ୍କ ଅବର୍ତ୍ତମାନରେ ପରିବାର ଚଳାଇବାକୁ ଅଂଟା ଭିଡିଥିଲେ ହର ମାଉସୀ । ବଡ ପୁଅ କିଡନୀ ରୋଗରେ ପଡିଛି । ଆଉ ଦୁଇ ପୁଅ ଫୁଲଦୋକାନ ସହ ସିକ୍ୟୁରିଟି ଗାର୍ଡ କାମ କରି ଚଳନ୍ତି । ବଡ ପୁଅକୁ ରୋଗଗ୍ରାସ କରିବା ପରେ ରୋଜଗାର କରିବା ତାଙ୍କ ପକ୍ଷରେ ସମ୍ଭବ ହେଉନି । ସେଇଥି ଲାଗି ତାଙ୍କ ଦାୟିତ୍ୱ ବି ହରମାଉସୀ ନିଅନ୍ତି ।

ଏହି ଛୋଟିଆ ଦୋକାନରୁ ଯାହା ଯେତିକି ରୋଜଗାର ହୁଏ, ସେତିକିରେ ନିଜେ ଟିକିଏ କ୍ଷୀର କିଣି ଖାଇବା ସହ ପୁଅକୁ ଦିଅନ୍ତି ହରମାଉସୀ । ପରିବାର ବଢିବା ପରେ ଘରେ ଆଉ ଜାଗା ହେଲାନି । ସେଥିପାଇଁ ପାଲଟିଏ ଟାଙ୍ଗି ରହୁଥିଲେ ହର । ହେଲେ ସରକାରୀ ଘର ଦେବା ପାଇଁ ବିଧାୟକ କହିବା ପରେ ଘର ନିର୍ମାଣ ହେଲା ସତ କିନ୍ତୁ ଛାତ ପଡିଲାନି । ଯେଉଁଥି ପାଇଁ ଏ ବର୍ଷା ଦିନରେ ବି ବାରଦୁଆର ସୁଣ୍ଡି ପିଣ୍ଡା ହେଉଛନ୍ତି ହର ।

ଗୋଟିଏ ପଟେ ବୟସର ଅପରାହ୍ନରେ ପହଞ୍ଚିବା ପରେ କିଛି ସାହାଯ୍ୟ ନମିଳିବାର ଦୁଃଖ, ଅନ୍ୟପଟେ ପରିବାରର ବୋଝ ଭିତରେ ଘାଂଟି ହେଉଛନ୍ତି ହର। ଦେଖାଣିଆ ପ୍ରତିଶ୍ରୁତି ଦେଇ ହରଙ୍କୁ ବିଧାୟକ କୁଆଡେ ଠକି ଦେଇଥିବା ନେଇ କୁହାକୁହି ହେଲେଣି ଲୋକେ । ଏଠାରେ ପ୍ରଶ୍ନ ଉଠୁଛି କି ଯଦି ଘର ଖଣ୍ଡିଏ ଦେବାର ନଥିଲା ତେବେ ପ୍ରତିଶ୍ରୁତି ଦେଉଥିଲେ କାହିଁକି ? ୯୦ ବର୍ଷ ବୟସରେ ସରକାରୀ ସହାୟତା ନମିଳିବା କେତେ ଦୂର ଠିକ୍‌ ? ହର ମାଉସୀଙ୍କୁ ଆଉ କେବେ ମିଳିବ ସହାୟତା ? ତେବେ ବିଧାୟକ ମହାଶୟ ଘରର ଛାତ ତୁରନ୍ତ ପକାଇବାର ବ୍ୟବସ୍ଥା କରି ହର ମାଉସୀଙ୍କୁ ସାହାଯ୍ୟ କରନ୍ତୁ ବୋଲି କହିଛନ୍ତି ଗାଁ ଲୋକ ।

ସେପଟେ ସ୍ଥାନୀୟ ବିଧାୟକ ସ୍ୱରୂପ ଦାସ କହିଛନ୍ତି ମାଉସୀଙ୍କ ଘର ସମ୍ପର୍କରେ ଆମେ ଅବଗତ ଅଛୁ। ଖୁବଶୀଘ୍ର ଘର ନିର୍ମାଣ ଶେଷ ହେବ ।

(ରିପୋର୍ଟ- ରଶ୍ମିରଂଜନ ଦାସ, ବାଲେଶ୍ୱର)

Other Stories