Financial Mistakes: ଏହି ସବୁ ଭୁଲ ଆପଣଙ୍କ ଆର୍ଥିକ ସଙ୍କଟର କାରଣ ହୋଇପାରେ

ଚାକିରି କରିଥିବା ଲୋକଙ୍କ ପାଇଁ ଆର୍ଥିକ ସ୍ଥିରତା ହାସଲ କରିବା ଅତ୍ୟନ୍ତ ଗୁରୁତ୍ୱପୂର୍ଣ୍ଣ। କିନ୍ତୁ ଅଜାଣତରେ ହୋଇଯାଉଥିବା କିଛି ସାଧାରଣ ଭୁଲ ଆପଣଙ୍କର ସଞ୍ଚୟ ଏବଂ ଭବିଷ୍ୟତ ଯୋଜନାକୁ ପ୍ରଭାବିତ କରିପାରେ । ବେତନ ବଢିବା ସହିତ ଖର୍ଚ୍ଚ ବଢ଼ାଇବା, କ୍ରେଡିଟ କାର୍ଡର ଭୁଲ ବ୍ୟବହାର, ସଞ୍ଚୟ ଏବଂ ନିବେଶକୁ ଅଣଦେଖା କରିବା, ଜରୁରୀକାଳୀନ ପାଣ୍ଠିର ଅଭାବ ଏବଂ ବଜେଟ ନ ତିଆରି କରିବା ଭଳି ଭୁଲଗୁଡ଼ିକ ଆଗକୁ ଆର୍ଥିକ ସଙ୍କଟର କାରଣ ହୋଇପାରେ। ଏହି ଭୁଲଗୁଡ଼ିକୁ ଏଡ଼ାଇ ଦେଇ ଆପଣ ଆପଣଙ୍କ ଆର୍ଥିକ ଲକ୍ଷ୍ୟକୁ ସହଜରେ ହାସଲ କରିପାରିବେ। ଆସନ୍ତୁ ଏହି ପାଞ୍ଚଟି ଆର୍ଥିକ ଭୁଲ ଏବଂ ସେଗୁଡ଼ିକୁ ଏଡ଼ାଇବାର ଉପାୟ ବିଷୟରେ ଜାଣିବା।

ଦରମା ବଢ଼ିବା ସହ ଖର୍ଚ୍ଚ ବଢ଼ିବା

ଦରମା ବଢ଼ିବା ସହିତ ଲୋକମାନେ ପ୍ରାୟତଃ ନିଜର ଖର୍ଚ୍ଚକୁ ମଧ୍ୟ ବଢ଼ାଇ ଦିଅନ୍ତି, ଯାହାକୁ 'ଲାଇଫଷ୍ଟାଇଲ ଇନଫ୍ଲେସନ' କୁହାଯାଏ। ମହଙ୍ଗା ଗ୍ୟାଜେଟ, ଲଗଜୁରୀ ଜିନିଷ କିମ୍ବା ବାରମ୍ବାର ବାହାରେ ଖାଇବା ଭଳି ଅନାବଶ୍ୟକ ଖର୍ଚ୍ଚ ଆପଣଙ୍କ ସଞ୍ଚୟକୁ ନଷ୍ଟ କରିପାରେ। ଏହାର ସମାଧାନ ହେଉଛି, ଆପଣଙ୍କ ବଢ଼ିଥିବା ଦରମାର ଅତି କମରେ ୫୦ ପ୍ରତିଶତ ସଞ୍ଚୟ କିମ୍ବା ନିବେଶରେ ଲଗାନ୍ତୁ।

ଉଦାହରଣ ସ୍ୱରୂପ, ଯଦି ଆପଣଙ୍କ ଦରମାରେ ୧୦,୦୦୦ ଟଙ୍କାର ବୃଦ୍ଧି ହୁଏ, ତେବେ ଅତି କମରେ ୫,୦୦୦ ଟଙ୍କାକୁ ସଞ୍ଚୟ ଖାତା, ମ୍ୟୁଚୁଆଲ ଫଣ୍ଡ କିମ୍ବା ଅନ୍ୟ ନିବେଶ କରନ୍ତୁ । ବେତନ ବଢ଼ିବା ସହିତ ଅନେକ ଲୋକ କ୍ରେଡିଟ କାର୍ଡ ନିଅନ୍ତି ଏବଂ ଛୋଟ-ବଡ଼ କ୍ରୟ ପାଇଁ ଏହାର ବ୍ୟବହାର ଆରମ୍ଭ କରନ୍ତି। କ୍ରେଡିଟ କାର୍ଡର ଚାର୍ଜ, ବିଳମ୍ବ ଶୁଳ୍କ ଏବଂ ସୁଧ ହାର ବିଷୟରେ ଜ୍ଞାନ ନ ଥିଲେ ଏହା ଆର୍ଥିକ ବୋଝ ହୋଇପାରେ। କ୍ରେଡିଟ କାର୍ଡର ବ୍ୟବହାର ସୀମିତ ଏବଂ ଚିନ୍ତା କରି କରନ୍ତୁ। ବିଲ ସମୟରେ ପରିଶୋଧ କରନ୍ତୁ ଏବଂ ଅନାବଶ୍ୟକ କ୍ରୟରୁ ଦୂରେଇ ରୁହନ୍ତୁ। ସବୁବେଳେ ଆପଣଙ୍କ କ୍ରେଡିଟ କାର୍ଡର ସର୍ତ୍ତ, ଯେପରିକି ବାର୍ଷିକ ଶୁଳ୍କ ଏବଂ ସୁଧ ହାର, ବୁଝି ନିଅନ୍ତୁ ଯାହା ଦ୍ୱାରା ଆପଣ ଅତିରିକ୍ତ ଖର୍ଚ୍ଚରୁ ରକ୍ଷା ପାଇପାରିବେ।

ସଞ୍ଚୟ ଏବଂ ନିବେଶକୁ ଅଣଦେଖା କରିବା

ଅନେକ ଲୋକ ଭାବନ୍ତି ଯେ ସଞ୍ଚୟ ଏବଂ ନିବେଶ ୩୦-୩୫ ବର୍ଷ ବୟସରେ ଆରମ୍ଭ କରିବା ଉଚିତ, କିନ୍ତୁ ଏହା ଏକ ବଡ଼ ଭୁଲ। ପ୍ରଥମ ଚାକିରିରୁ ହିଁ ଆପଣଙ୍କ ବେତନର ୨୦-୩୦ ପ୍ରତିଶତ ସଞ୍ଚୟ ଏବଂ ନିବେଶରେ ଲଗାଇବା ଆରମ୍ଭ କରନ୍ତୁ। ଉଦାହରଣ ସ୍ୱରୂପ, SIP ମାଧ୍ୟମରେ ମ୍ୟୁଚୁଆଲ ଫଣ୍ଡରେ ଛୋଟ ରାଶିରୁ ନିବେଶ ଆରମ୍ଭ କରନ୍ତୁ, ଯାହା ଦୀର୍ଘ ସମୟରେ ଚକ୍ରବୃଦ୍ଧି ସୁଧ ସହିତ ବଢ଼ିବ।

ଅଧିକ ପଢ଼ନ୍ତୁ: ନିରାଡ଼ମ୍ବର ଜୀବନ ବିତାଉଛନ୍ତି ଦୈନିକ ୧୫୬ କୋଟି ଆୟ କରୁଥିବା ଏହି ବ୍ୟକ୍ତି...କାହିଁକି ଜାଣନ୍ତୁ

ଜରୁରୀକାଳୀନ ପାଣ୍ଠି ଏବଂ ସ୍ୱାସ୍ଥ୍ୟ ବୀମାର ଅଣଦେଖା

ଜରୁରୀକାଳୀନ ପାଣ୍ଠି ଏବଂ ସ୍ୱାସ୍ଥ୍ୟ ବୀମାକୁ ଅଣଦେଖା କରିବା ଆର୍ଥିକ ସୁରକ୍ଷା ପାଇଁ ବିପଦଜନକ ହୋଇପାରେ। ଅପ୍ରତ୍ୟାଶିତ ଖର୍ଚ୍ଚ, ଯେପରିକି ଚିକିତ୍ସା କିମ୍ବା ଚାକିରି ହରାଇବା ଭଳି ପରିସ୍ଥିତି ପାଇଁ ଅତି କମରେ ୬ ମାସର ଜରୁରୀକାଳୀନ ପାଣ୍ଠି ଆବଶ୍ୟକ।

ଉଦାହରଣ ସ୍ୱରୂପ, ଯଦି ଆପଣଙ୍କ ମାସିକ ଖର୍ଚ୍ଚ ୫୦,୦୦୦ ଟଙ୍କା, ତେବେ ୩ ଲକ୍ଷ ଟଙ୍କାର ପାଣ୍ଠି ତିଆରି କରନ୍ତୁ। ଏହା ବ୍ୟତୀତ, ଏକ ଭଲ ସ୍ୱାସ୍ଥ୍ୟ ବୀମା ଯୋଜନା ନିଅନ୍ତୁ, ଯାହା ହସ୍ପିଟାଲ ଖର୍ଚ୍ଚକୁ କଭର କରିବ ଏବଂ ଆପଣଙ୍କ ସଞ୍ଚୟକୁ ସୁରକ୍ଷିତ ରଖିବାରେ ଗୁରୁତ୍ୱପୂର୍ଣ୍ଣ ସାହାଯ୍ୟ କରିବ।

ବଜେଟ ନ ତିଆରି କରିବା

ଯଦି ଆପଣଙ୍କୁ ଜଣା ନାହିଁ ଯେ ଆପଣଙ୍କ ବେତନ କେଉଁଠାରେ ଖର୍ଚ୍ଚ ହେଉଛି, ତେବେ ପଇସା ଶୀଘ୍ର ଶେଷ ହୋଇପାରେ। ବଜେଟ ନ ତିଆରି କରି ଖର୍ଚ୍ଚ କରିବା ଆର୍ଥିକ ଅନୁଶାସନକୁ ଭାଙ୍ଗିଦିଏ। ବଜେଟ ତିଆରି କରି ଆପଣଙ୍କ ଖର୍ଚ୍ଚକୁ ବର୍ଗୀକରଣ କରନ୍ତୁ, ଯେପରିକି ଘର ଭଡ଼ା, ରାସନ, ସଞ୍ଚୟ, ଏବଂ ମନୋରଞ୍ଜନ।

ଉଦାହରଣ ସ୍ୱରୂପ, ୫୦-୩୦-୨୦ ନିୟମ ଅନୁସରଣ କରନ୍ତୁ। ବେତନର ୫୦ ପ୍ରତିଶତ ଆବଶ୍ୟକୀୟ ଖର୍ଚ୍ଚରେ, ୩୦ ପ୍ରତିଶତ ଇଚ୍ଛା ପୂରଣ କରିବାରେ, ଏବଂ ୨୦ ପ୍ରତିଶତ ସଞ୍ଚୟ ଏବଂ ନିବେଶ ପାଇଁ ବଣ୍ଟନ କରାଯିବା ଉଚିତ। ବଜେଟ ତିଆରି କରିବା ଦ୍ୱାରା ଆପଣ ଅନାବଶ୍ୟକ ଖର୍ଚ୍ଚ କମାଇ ପାରିବେ ।

ଆର୍ଥିକ ଅନୁଶାସନର ଗୁରୁତ୍ୱ

ଏହି ଭୁଲଗୁଡ଼ିକୁ ଏଡ଼ାଇବା ପାଇଁ ଆର୍ଥିକ ଅନୁଶାସନ ଅବଲମ୍ବନ କରିବା ଜରୁରୀ। ନିୟମିତ ଭାବେ ଆପଣଙ୍କ ଆୟ ଏବଂ ଖର୍ଚ୍ଚର ସମୀକ୍ଷା କରନ୍ତୁ ଏବଂ ଆପଣଙ୍କ ଆର୍ଥିକ ଲକ୍ଷ୍ୟ ନିର୍ଦ୍ଧାରଣ କରନ୍ତୁ । ଯଦି ଆପଣ ନିବେଶ ବିକଳ୍ପଗୁଡ଼ିକୁ ବୁଝିବାରେ ନୂଆ, ତେବେ ଆର୍ଥିକ ପରାମର୍ଶଦାତାଙ୍କ ସାହାଯ୍ୟ ନିଶ୍ଚୟ ନିଅନ୍ତୁ ।

ଅଧିକ ପଢ଼ନ୍ତୁ: ସ୍ୱାମୀ-ସ୍ତ୍ରୀଙ୍କ ଭିତରେ କାହିଁକି ହୁଏ ଝଗଡ଼ା; ଜାଣନ୍ତୁ ଏହା ପଛରେ ଥିବା ୫ କାରଣ