ଦିନକ ପରେ ଘରକୁ ଫେରିଥାଆନ୍ତେ ରଶ୍ମୀ : ହଠାତ୍ ବୋମା ବର୍ଷଣ ଯୋଗୁଁ କିଭରେ ଲାଗିଲା କର୍ଫ୍ୟୁ, ପୁଅ ବାଟକୁ ଚାହିଁ ରହିଛି ଦୁଃଖିନୀ ମା’

ବାପରେ ତୁ ଭଲରେ ଅଛୁନା... କଣ ଖାଇଛୁ... ପାଖରେ ପଇସା ଅଛିନା... ଭିଡିଓ କଲରେ ପୁଅ ସହ କଥା ହେବାବେଳେ ବାହୁନି କାନ୍ଦୁଛି ମା’ । ଦିନ ନାହିଁ, ରାତି ନାହିଁ ସବୁ କିଛି ଏକାକାର ହୋଇଯାଇଛି ମାଆବାପାଙ୍କ ପାଇଁ । ଡାକ୍ତରୀ ପଢ଼ିବା ପାଇଁ ୨୦୨୦ରେ ୟୁକ୍ରେନର ଖାରକିଭ୍ ନେସନାଲ ମେଡିକାଲ ୟୁନିଭର୍ସିଟି ଯାଇଥିଲେ ରଶ୍ମୀରଞ୍ଜନ । ପାଠ ପଢ଼ି ପୁଅ ଲୋକଙ୍କ ସେବା କରିବ ବୋଲି ସମସ୍ତେ ଚିନ୍ତା କରିଥିଲେ  । ହେଲେ ରୁଷ ସହ ଯୁଦ୍ଧ ଆରମ୍ଭ ହୋଇଯିବା ପରେ ରଶ୍ମୀଙ୍କ ବାଟକୁ ଚାହିଁ ରହିଛନ୍ତି ପରିବାର ଲୋକ । 

ଦିନକ ପରେ ସେ ଘରକୁ ଆସିଥାନ୍ତେ । କିଭରୁ ନୂଆଦିଲ୍ଲୀ ପାଇଁ ବିମାନ ଟିକେଟ୍ କାଟିଥିଲେ । ଆଉ ନୂଆଦିଲ୍ଲୀରୁ ଭୁବନେଶ୍ୱରକୁ ରାଜଧାନୀ ଏକ୍ସପ୍ରେସରେ ବି ରିଜର୍ଭ କରି ଦେଇଥିଲେ । ତା ପରେ ପରିବାର ଲୋକଙ୍କୁ ଭେଟିଥାନ୍ତେ । ହେଲେ ରୁଷର ହଠାତ ବୋମା ବର୍ଷଣ ଯୋଗୁଁ ସରକାର କର୍ଫ୍ୟୁ ଲଗାଇଦେଲେ । ବିମାନ ସେବା ବି ବନ୍ଦ ହୋଇଗଲା । ସେହିଦିନରୁ ଅର୍ଥାତ ୨୪ ତାରିଖରୁ ଖାରକିଭରେ ଫସି ରହିଛନ୍ତି ଭଦ୍ରକ ଜିଲ୍ଲା ଧାମନଗର ବ୍ଲକ ମୁସ୍ତଫାପୁର ପଞ୍ଚାୟତ ବେଲମଳାର ରଶ୍ମୀରଞ୍ଜନ ସ୍ୱାଇଁ।

ଯୁଦ୍ଧ ହେବା ଆଶଙ୍କା କରି ସେ ୨୫ ତାରିଖରେ ଭାରତ ଫେରି ଆସିବାକୁ ମନସ୍ଥ କରିଥିଲେ । ଏଥିପାଇଁ ପୁଅ ବ୍ୟାଙ୍କ ଆକାଉଣ୍ଟରେ ମାଆ ଲକ୍ଷେ ୫ହଜାର ଟଙ୍କା ଡିପୋଜିଟ୍ କରିଥିଲେ । ନୂଆଦିଲ୍ଲୀକୁ ବିମାନ ଟିକେଟ ଓ ନୂଆଦିଲ୍ଲୀରୁ ଭୁବନେଶ୍ୱରକୁ ରାଜଧାନୀ ଏକ୍ସପ୍ରେସରେ ଟିକେଟ ବୁକ୍ କରି ଦେଇଥିଲେ । ହେଲେ ୨୪ ତାରିଖରେ ରୁଷ ପକ୍ଷରୁ ହଠାତ ବୋମା ବର୍ଷଣ ଓ ଆକ୍ରମଣ ଯୋଗୁଁ ୟୁକ୍ରେନରୁ ଭାରତକୁ ବିମାନ ସେବା ଠପ୍ ହୋଇଯାଇଥିଲା । ତା ପରେ ସମସ୍ତେ ଫସି ରହିଥିଲେ ଖାରକିଭରେ ।

ବିମାନ ସେବା ବନ୍ଦ ହେବା ପରେ ଏକମାତ୍ର ଭରସା ଥିଲା ଟ୍ରେନ୍ । ପଡ଼ୋଶୀ ପୋଲାଣ୍ଡ,ରୋମାନିଆକୁ ଆସି ସେଠାରୁ ପୁଣି ଭାରତ ଫେରି ଫେରିବା ପାଇଁ ଯୋଜନା କରିଥିଲେ । ଏଥିଲାଗି ରୁମରେ ଥିବା ଖାଦ୍ୟ ସାମଗ୍ରୀ ସାରି ଦେଇ ଖାରକିଭ ମେଟ୍ରୋ ଷ୍ଟେସନରେ ପହଞ୍ଚି ଯାଇଥିଲେ ରଶ୍ମୀରଞ୍ଜନ ଓ ସାଥୀରେ ରହୁଥିବା ଆଉ ୩୦୦ରୁ ଅଧିକ ଓଡ଼ିଆ ଛାତ୍ରଛାତ୍ରୀ। ମେଟ୍ରୋ ଷ୍ଟେସନରେ ପହଞ୍ଚିବା ପରେ ରୁଷ ପକ୍ଷରୁ ଖାରକିଭ ଉପରେ ହୋଇଥିଲା ଆକ୍ରମଣ । ଜୀବନ ଜିଇଁବା ଆଶାରେ ସମସ୍ତେ ସେଇଠାରେ ଅଟକି ରହିଛନ୍ତି । ପଦାକୁ ବାହାରି ହେଉନି । ପାଖରେ ଖାଦ୍ୟ ପଦାର୍ଥ ବି କିଛି ନାହିଁ । ଯାହାକିଛି ଶୁଖିଲା ଖାଦ୍ୟ ଥିଲା ସେଥିରେ ତିନିଦିନ ଚଳିଗଲେ । ଏବେ ପରିସ୍ଥିତି ଅସମ୍ଭାଳ । ବାହାରେ ଦୋକାନବଜାର ଖୋଲା ନାହିଁ କି ଏଟିଏମରେ ଟଙ୍କା ନାହିଁ । ଏ କଥା ଭିଡିଓ କଲରେ କହିବା ପରେ ଘର ଲୋକ ଆଉ ସମ୍ଭାଳି ହେଉନାହାନ୍ତି ।

ୟୁକ୍ରେନରେ ଥିବା ଲୋକଙ୍କୁ ଫେରାଇ ଆଣିବା ଲାଗି ଭାରତ ସରକାର ଉଦ୍ୟମ ଚଳାଇଛନ୍ତି । ରୋମାନିଆ, ପୋଲାଣ୍ଡ ଓ ହଙ୍ଗେରୀରୁ ବିମାନ ଆସୁଛି । ରଶ୍ମୀରଞ୍ଜନ ଓ ସାଥୀ ପିଲାମାନେ ୧୩୦୦ ରୁ ୧୬୦୦ କିଲୋମିଟର ଦୂରରେ ଥିବା ତିନି ଦେଶକୁ ଆସିଲେ ଯାଇ ଭାରତ ଆସିପାରିବେ । ବାହାରେ ବୋମା ଓ ରକେଟ ମାଡ଼ ହେଉଥିବାରୁ ଏତେ ଦୂର ଆସିବା ସମ୍ଭବ ହେଉନାହିଁ। ଏଣୁ ଭାରତ ସରକାର ଖାରକିଭରେ ରହୁଥିବା ପିଲାଙ୍କୁ ଉଦ୍ଧାର କରିବା ଲାଗି ସ୍ୱତନ୍ତ୍ର ପଦକ୍ଷେପ ନେବା ନିତାନ୍ତ ଜରୁରୀ ବୋଲି କହିଛନ୍ତି ପରିବାର ଲୋକେ । ଡାକ୍ତର ହେବାର ସ୍ୱପ୍ନ ଓ ଜୀବନ ଜିଇଁବାର ଇଛା ମଝିରେ ଫସି ରହିଛନ୍ତି ରଶ୍ମୀରଞ୍ଜନ ଓ ସାଥୀ ପିଲାମାନେ।

ଭଦ୍ରକରୁ ପାର୍ଥସାରଥୀ ନାୟକ