ବିଜେପି ଫୋକସ୍‌ରେ MP ସିଟ୍, ସର୍ଭେ କହୁଛି ଜିତିଥିବା ୪ ଆସନରେ ଦଳ ଦୁର୍ବଳ

ପଦ୍ମଦଳ ଫୋକସ୍‌ରେ ଓଡ଼ିଶାର MP ସିଟ୍ । ୨୦୧୯ରେ ହାତେଇଥିଲା ୮ ଆସନ । ଏଥର ଟାର୍ଗେଟ୍ ଡବଲ୍ । ଅର୍ଥାତ୍ ୨୦୨୪ ନିର୍ବାଚନରେ ୧୬ଟି ଆସନରେ ବିଜୟ ବାନା ଉଡ଼ାଇବାକୁ ବିଜେପି ଆରମ୍ଭ କରିଦେଇଛି କସରତ । ହେଲେ ଏଇ ଲକ୍ଷ୍ୟ ପଥରେ ବାଧକ ସାଜିଛି ୧୯ ନିର୍ବାଚନରେ ଦଳ ଜିତିଥିବା ୮ଟି ରୁ ୪ଟି ଆସନ । ଦଳୀୟ ସର୍ଭେ ରିପୋର୍ଟରୁ କଳାହାଣ୍ଡି, ବଲାଙ୍ଗିର, ବରଗଡ଼ ଓ ବାଲେଶ୍ୱର, ଏଇ ୪ଟିରେ ଦଳର ସ୍ଥିତି ଦୁର୍ବଳ ଥିବା କୁହାଯାଉଛି । ଯେଉଁଥିରେ ସାଂସଦ ଅଛନ୍ତି ବସନ୍ତ ପଣ୍ଡା, ସଙ୍ଗୀତା ସିଂଦେଓ, ସୁରେଶ ପୂଜାରୀ ଓ ପ୍ରତାପ ଷଡ଼ଙ୍ଗୀ ।

ସର୍ଭେରେ ରାଜ୍ୟଓ୍ୱାରି ଷ୍ଟ୍ରେନ୍ଥ, ଓ୍ୱିକ୍‌ନେସ୍, ଅପର୍ଚୁନିଟି ଓ ଥ୍ରେଟ୍ -ବା SWOT ଆନାଲିସ୍ ଆଣ୍ଡ ଇଭାଲ୍ୟୁଏସନ୍‌ରୁ ଏହି ତଥ୍ୟ ସାମ୍ନାକୁ ଆସିଛି । ଜାତୀୟ ଗଣମାଧ୍ୟମରେ ମଧ୍ୟ ଏନେଇ ଖବର ପ୍ରକାଶିତ ହେବା ପରେ ଏହାକୁ ନେଇ ଚର୍ଚ୍ଚା ଜୋର ଧରିଛି । ତେବେ ଅନ୍ୟ ୪ଟି ଲୋକସଭା ଆସନ ମୟୂରଭଂଜ, ଭୁବନେଶ୍ୱର, ସୁନ୍ଦରଗଡ଼ ଓ ସମ୍ବଲପୁର ରେ ଦଳର ସ୍ଥିତି ଭଲ ଥିବା ଜଣାପଡିଛି । ସେପଟେ କନ୍ଧମାଳ, ପୁରୀ, ଭଦ୍ରକ, ଢେଙ୍କାନାଳ ଓ ନବରଙ୍ଗପୁର ସିଟ୍‌ରେ ଗତ ନିର୍ବାଚନରେ ଅଳ୍ପ ଭୋଟ୍ ବ୍ୟବଧାନରେ ଦଳ ହାରିଥିଲା । ତେଣୁ ସେଠି ଏବେ ଦଳ ସୁବିଧାଜନକ ସ୍ଥିତିରେ ଥିବା କୁହାଯାଉଛି । ତେବେ ଯେଉଁଠି ସ୍ଥିତି ଭଲ ନାହିଁ ସେଠି ସ୍ୱତନ୍ତ୍ର ରଣନୀତି କରୁଛି ଦଳ ।

କେବଳ ସେତିକି ନୁହେଁ ୨୦୧୯ରେ ଦଳ ଜିତିଥିବା ୮ ଆସନ ଏବଂ କୋରାପୁଟ୍ ଛଡ଼ା ବାକି ୧୨ଟି ଲୋକସଭା କ୍ଷେତ୍ରରେ ସଙ୍ଗଠନ ମଜଭୁତ୍ ପାଇଁ ଦଳ ପ୍ଲାନ୍ କରିଛି । ଲୋକସଭା ପ୍ରବାସ ଯୋଜନାରେ ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଜେପି ନଡ୍ଡା ପ୍ରଥମ ପର୍ଯ୍ୟାୟରେ ପୁରୀ ଓ କନ୍ଧମାଳ ସଂସଦୀୟ କ୍ଷେତ୍ରକୁ ଆସି ସାଧାରଣ ସଭାରେ ଉଦ୍‌ବୋଧନ ଦେଇଛନ୍ତି । ଆଗକୁ କେନ୍ଦ୍ର ଗୃହମନ୍ତ୍ରୀ ଅମିତ ଶାହ ଓ ନଡ୍ଡା ଅନ୍ୟ ସବୁ ସଂସଦୀୟ କ୍ଷେତ୍ରରେ ସଭା କରିବା ସହ ସେଠିକାର କର୍ଯ୍ୟକର୍ତ୍ତାଙ୍କୁ ଭେଟି ଆଲୋଚନା କରିବେ । ୪ଟି ସଂସଦୀୟ କ୍ଷେତ୍ରକୁ ଗୋଟିଏ ଲେଖାଏଁ କ୍ଲଷ୍ଟର କରାଯିବାର ଯୋଜନା ରହିଛି । ଏଥିସହ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମଧ୍ୟ ଓଡ଼ିଶା ଆସି ନେତା, କର୍ମୀ ଓ ସାଧାରଣ ଜନତାଙ୍କୁ ବାର୍ତ୍ତା ଦେବେ ।

ବୁଥ୍, ଶକ୍ତି କେନ୍ଦ୍ର, ମଣ୍ଡଳ ସ୍ତରରେ ଦଳର ସଙ୍ଗଠନକୁ ମଜଭୁତ୍ କରିବା, ରାଜ୍ୟ ସରକାର ବିରୋଧରେ ପରିବେଶ ବନେଇବା, ମୋଦି ସରକାରଙ୍କ ସଫଳତାକୁ ଲୋକଙ୍କ ପାଖକୁ ନେବା ଏବଂ ନଡ୍ଡା ଦେଇଥିବା ଟାସ୍କକୁ କାର୍ଯ୍ୟକାରୀ କରି ସଫଳତା ହାତେଇବାକୁ ଜୋର୍ ଦେଉଛି ବିଜେପି ।