LIVE TV
ମିଆଁମାର ସୀମାରେ ଭାରତ ନିର୍ମାଣ କରୁଛି ତାରବାଡ଼ । ଦେଶର ସୁରକ୍ଷା ଦୃଷ୍ଟିରୁ ଭାରତ ୧୬୪୩ କିଲୋମିଟର ତାରବାଡ଼ ତିଆରି କରୁଛି । ୩୧୦୦୦ କୋଟି ଟଙ୍କାର ଏହି ପ୍ରକଳ୍ପ ୧୦ ବର୍ଷ ମଧ୍ୟରେ ସରିବ । ସୀମା ପାର ଚଳପ୍ରଚଳ ପାଇଁ ଗେଟରେ ବାୟୋମେଟ୍ରିକ ବ୍ୟବସ୍ଥା ରହିବ । ସ୍ଥାନୀୟ ଅଞ୍ଚଳର କିଛି ଲୋକ ଏହାକୁ ବିରୋଧ କରୁଥିବା ବେଳେ ଜାତୀୟ ସୁରକ୍ଷା ଓ ବ୍ୟବସାୟକୁ ନିୟନ୍ତ୍ରିତ କରିବା ପାଇଁ ଏହାର ଆବଶ୍ୟକତା ଥିବା ସରକାରଙ୍କ ପକ୍ଷରୁ କୁହାଯାଇଛି ।
ବର୍ଡର ରୋଡସ୍ ଅର୍ଗାନାଇଜେସନ ( BRO ) ଏହି କାମକୁ ପର୍ଯ୍ୟାୟକ୍ରମେ ୧୦ ବର୍ଷ ମଧ୍ୟରେ ସାରିବ । ଏହି ପ୍ରକଳ୍ପ ଅଧିନରେ କେବଳ ତାରବାଡ଼ ତିଆରିରେ ୨୦ ହଜାର କୋଟି ଟଙ୍କା ଖର୍ଚ୍ଚ ହେବ । ସୀମାରେ ୬୦ଟି ରାସ୍ତା ନିର୍ମାଣରେ ଖର୍ଚ୍ଚ ହେବ ୧୧୦୦୦ କୋଟି ଟଙ୍କା ।
Also Read
ସରକାରୀ ସଂସ୍ଥା ଦ୍ୱାରା କରାଯାଇଥିବା ସର୍ଭେରୁ ଜଣାପଡିଛି ଯେ, ପ୍ରାୟ ୩ ଶହ କିଲୋମିଟର ଇଲେକ୍ଟ୍ରିକ ତାରବାଡ଼ ହେବ । ସୁରକ୍ଷା ଓ ଉତ୍ତର-ପୂର୍ବାଞ୍ଚଳରେ ସ୍ଥିରତା ପାଇଁ ଏହା ଜରୁରୀ ଥିବା କୁହାଯାଇଛି । ଏବେ ମଣିପୁରରେ ବିବାଦ ଲାଗି ରହିଥିବା ବେଳେ ଓ ପରିସ୍ଥିତି ସ୍ୱାଭାବିକ ଅବସ୍ଥାକୁ ଫେରିବାକୁ ନାଁ ଧରୁନଥିବା ବେଳେ ସରକାର ଏହି ବାଡ଼ ତିଆରି କରିବାକୁ ନିଷ୍ପତ୍ତି ନେଇଛନ୍ତି । କାରଣ ଏହି ସୀମା ଦେଇ ସ୍ମଗଲିଂ ହେଉଥିବା ଓ ମାନବ ଚାଲାଣ ହେଉଥିବା ନେଇ ଖବର ସରକାରଙ୍କ ପାଖରେ ରହିଛି ।
ଅଧିକ ପଢନ୍ତୁ:ସ୍କୁଲକୁ ବୋମାରେ ଉଡ଼ାଇ ଦେବାକୁ ଧମକ; ଛାତ୍ରଛାତ୍ରୀଙ୍କୁ ଫେରାଇ ଦିଆଗଲା ଘରକୁ...
ମଣିପୁରରେ କୁକି-ଜୋ ଓ ମେଇତେଇ ସଂପ୍ରଦାୟ ମଧ୍ୟରେ ଚାଲିଥିବା ହିଂସାକାଣ୍ଡରେ ଗତ ବର୍ଷ ମ’ ମାସଠାରୁ ଆଜି ପର୍ଯ୍ୟନ୍ତ ଦେଢ ବର୍ଷ ଭିତରେ ପ୍ରାୟ ୨୫୦ ଜଣଙ୍କର ପ୍ରାଣହାନି ଘଟିଛି । ପ୍ରାୟ ୬୦ ହଜାର ଲୋକ ବାସଚ୍ୟୁତ ହୋଇଛନ୍ତି । ସୁରକ୍ଷା କର୍ମୀମାନେ ବିପୁଳ ପରିମାଣର ଅସ୍ତ୍ରଶସ୍ତ୍ର ଜବତ କରିଛନ୍ତି । ମିଆଁମାରରେ ମଧ୍ୟ ପରିସ୍ଥିତି ଭଲ ନାହିଁ । ସେନା ଓ ଅସ୍ତ୍ରରେ ସଜ୍ଜିତ ହୋଇଥିବା ବିରୋଧୀଙ୍କ ମଧ୍ୟରେ କଳହ ଲାଗିରହିଛି । ମିଆଁମାରରୁ ପ୍ରାୟ ୩୧ ହଜାର ଲୋକ ଶରଣାର୍ଥୀ ଭାବେ ଭାରତରେ ରହିବାକୁ ଚାହୁଁଛନ୍ତି । ଭାରତ-ମିଆଁମାର ସୀମା ନିକଟରୁ ଗତ ୭ ମାସ ଭିତରେ ପ୍ରାୟ ୧୧୨୫ କୋଟି ଟଙ୍କାର ଡ୍ରଗ୍ସ ଜବତ ହୋଇଛି । ମଣିପୁର, ନାଗାଲାଣ୍ଡ, ଅରୁଣାଚଳ ପ୍ରଦେଶ ଓ ମିଜୋରାମ ଏହି ୪ଟି ରାଜ୍ୟ ମିଆଁମାର ସୀମାକୁ ଲାଗିଛି । କେତେକ ନିର୍ଦ୍ଦିଷ୍ଟ ସଂପ୍ରଦାୟର ଲୋକଙ୍କର ଏହି ପାହାଡିଆ ଅଞ୍ଚଳରେ ମିଆଁମାର ଲୋକଙ୍କ ସହ ଭାବଗତ ସଂପର୍କ ରହିଛି । ତେଣୁ ଏହି ବାଡ଼ ନିର୍ମାଣକୁ ଅନେକ ବିରୋଧ କରୁଛନ୍ତି । କେତେକ ସଂପ୍ରଦାୟର ଲୋକଙ୍କର ମିଆଁମାରରେ ବନ୍ଧୁବାନ୍ଧବ ମଧ୍ୟ ଅଛନ୍ତି । ପ୍ରସ୍ତାବିତ ବାଡ଼ ସେମାନଙ୍କ ସଂସ୍କୃତି ଉପରେ ଆକ୍ରମଣ ବୋଲି ସେମାନେ ଭାବୁଛନ୍ତି । ତେବେ ବାଡ଼ ହେଲେ ମଧ୍ୟ ଯିବା ଆସିବାରେ କିଛି ଅସୁବିଧା ହେବନାହିଁ ବୋଲି ସରକାରଙ୍କ ପକ୍ଷରୁ କୁହାଯାଉଛି ।
