ବାଲିଯାତ୍ରା ବିବାଦ: ପ୍ରଶାସନର କାର୍ଯ୍ୟଶୈଳୀକୁ ସୌମ୍ୟ ବି କଲେ ସମାଲୋଚନା

ପ୍ରଭାତ ତ୍ରିପାଠିଙ୍କ ପରେ କଟକ ବାଲିଯାତ୍ରା ବିବାଦ ନେଇ ମୁହଁ ଖୋଲିଛନ୍ତି ଖଣ୍ଡପଡା ବିଧାୟକ ତଥା ବରିଷ୍ଠ ବିଜେଡି ନେତା ସୌମ୍ୟରଞ୍ଜନ ପଟ୍ଟନାୟକ । ଭାଇଚାରା ସହର କଟକ ରେ ଶାନ୍ତି କମିଟି ଓ ପୂଜା କମିଟିର ଅନେକ ଭୂମିକା ରହିଥାଏ । ପର୍ବପର୍ବାଣୀ ସମୟରେ ପ୍ରଶାସନ ସହ ମିଶି କାମ କରେ ଶାନ୍ତି କମିଟି ଓ ପୂଜା କମିଟି । ତେବେ ବାଲିଯାତ୍ରା ସମୟରେ ଏମାନଙ୍କୁ ଅଣଦେଖା କରିବା ଉଚିତ ନୁହେଁ ବୋଲି କଟକରେ ଏକ କାର୍ଯ୍ୟକ୍ରମରେ ଯୋଗଦେଇଥିବା ବେଳେ ସାମ୍ବାଦିକଙ୍କ ପ୍ରଶ୍ନର ଏଭଳି ଉତ୍ତର ରଖିଛନ୍ତି ସୌମ୍ୟରଂଜନ । ତାସହ ମଞ୍ଚରେ ହେ ନବୀନ ବାବୁ ଆମେ ତମ ଫ୍ୟାନ ଗୀତ ପରିବେଷଣ ପ୍ରସଙ୍ଗକୁ ରାଜନୀତି କରିବା ଉଚିତ ନୁହେଁ ବୋଲି ସେ କହିଛନ୍ତି ।

ଅଧିକ ପଢ଼ନ୍ତୁ: ବାଲିଯାତ୍ରା ମଞ୍ଚରେ ଛାତ୍ର ନେତାଙ୍କ ନବୀନ ବନ୍ଦନା ଗାନ, ଜିଲ୍ଲାପାଳ କହିଲେ ମୁଁ ଜାଣିନି !

ଦୁଇ ଦିନ ପୂର୍ବରୁ ବରିଷ୍ଠ ବିଜେଡି ନେତା ପ୍ରଭାତ ତ୍ରିପାଠୀ ବାଲିଯାତ୍ରାକୁ ନେଇ ବିସ୍ଫୋରକ ବୟାନ ଦେଇଥିଲେ । ସେ କହିଥିଲେ ବାଲିଯାତ୍ରାରେ ବ୍ୟାପକ ଦୁର୍ନୀତି ହୋଇଛି । ମହାନଗର ଶାନ୍ତି କମିଟି ଓ ପୂଜା କମିଟିକୁ ଜିଲ୍ଲା ପ୍ରଶାସନ ଅଣଦେଖା କରି ପ୍ଲଟ ଆବଣ୍ଟନରୁ ସମ୍ବର୍ଦ୍ଧିତ ପ୍ରତିଭା ଚୟନ ସବୁଥିରେ ଏକଚାଟିଆ ନିଷ୍ପତ୍ତି ନେଇଛି ।

ଅଧିକ ପଢ଼ନ୍ତୁ: ଜିଲ୍ଲା ପ୍ରଶାସନକୁ ପ୍ରଭାତଙ୍କ ନାଲି ଆଖି; କହିଲେ, ବାଲିଯାତ୍ରାରେ ହୋଇଛି ବ୍ୟାପକ ଦୁର୍ନୀତି

ବାଲିଯାତ୍ରାରେ କେତେ ଆୟ ଓ ବ୍ୟୟ ହୋଇଛି, ରାଜ୍ୟ ସରକାର ତାର ସ୍ପେଶାଲ ଅଡିଟ୍ କରନ୍ତୁ । ତେଣେ କଟକ ଜିଲ୍ଲାପାଳ ସ୍ପେଶାଲ ଅଡିଟ୍‌କୁ ସ୍ୱାଗତ କରିଥିବାବେଳେ କହିଛନ୍ତି, ସବୁ କିଛି ସ୍ୱଚ୍ଛତାରେ ହୋଇଛି । ରୋଚକ ହେଉଛି, ସ୍ଥାନୀୟ ବିଜେଡି ନେତା ଦେବାଶିଷ ସାମନ୍ତରାୟ ନିଜ ଦଳର ନେତା ପ୍ରଭାତଙ୍କ ଅଭିଯୋଗକୁ ବାଏଁ ବାଏଁ ଉଡ଼ାଇବା ସହ କହିଛନ୍ତି, କିଛି ଭୁଲ୍ ହୋଇନି ।

ବାଲିଯାତ୍ରା ଆୟୋଜନରେ ହୋଇଛି ବ୍ୟାପକ ଅନିୟମିତତା । ମଞ୍ଚରେ କିଏ ସମ୍ମାନିତ ହେବେ ? ଉତ୍ସବରେ କେଉଁମାନେ ଅତିଥି ହେବେ ? ସାସ୍କୃତିକ କାର୍ଯ୍ୟକ୍ରମରେ କେଉଁ ଦଳ ଭାଗନେବେ ? ଏସବୁଥିରେ ହୋଇଛି ଗୁରୁତର ବିଭ୍ରାଟ । ପ୍ଲଟ ଆବଣ୍ଚନରରେ ବି ହୋଇନି ସ୍ୱଚ୍ଛତା । ଏଭଳି ଅଭିଯୋଗ ଆଣିଥିଲେ ପ୍ରଭାତ ।