LIVE TV
ଶାସନରୁ ହଟିବା ପରେ ବିଜେଡି ପକ୍ଷରୁ ବିଜେପି ସରକାର ବିରୋଧରେ ରାଜଧାନୀରେ ଶୁଭିଛି ଗର୍ଜନ । ଦରଦାମ୍ ବୃଦ୍ଧି ପ୍ରତିବାଦରେ ସାରା ରାଜ୍ୟରୁ ଆସି ବିଜେଡି ନେତାମାନେ ଭୁବନେଶ୍ୱରରେ କରିଛନ୍ତି ପ୍ରତିବାଦ ସଭା । ଏଥିରେ ବିଜେଡି ସଭାପତି ନବୀନ ପଟ୍ଟନାୟକ ଯୋଗ ଦେଇ ସରକାରଙ୍କୁ କଡା ସମାଲୋଚନା କରିଛନ୍ତି । ଦଳର ବରିଷ୍ଠ ନେତାମାନେ ମଧ୍ୟ ନିଜ ନିଜ ଢଙ୍ଗରେ ସରକାରଙ୍କୁ କରିଛନ୍ତି ଆକ୍ରମଣ ।
ଏହି ସଭାରେ ଉଦବୋଧନ ଦେଇ ବରିଷ୍ଠ ନେତା ତଥା ଦଳର ପ୍ରତିଷ୍ଠାତା ସଦସ୍ୟ ପ୍ରସନ୍ନ ଆଚାର୍ଯ୍ୟ କହିଥିଲେ ଯେ, ଯେଉଁମାନେ କହୁଛନ୍ତି ବିଜେଡି ପ୍ରଥମ ଥର ଆନ୍ଦୋଳନ କରୁଛି ତାହା ଭୁଲ୍ କଥା । ବିଜେଡିର ଜନ୍ମ ହିଁ ଆନ୍ଦୋଳନରୁ ହୋଇଛି । ଏ ଆନ୍ଦୋଳନ ବିଜେଡି ପାଇଁ ନୂଆ ନୁହେଁ କି ନବୀନ ପଟ୍ଟନାୟକଙ୍କ ପାଇଁ ନୂଆ ନୁହେଁ । ବର୍ତ୍ତମାନର ସରକାର ଡବଲ୍ ଇଞ୍ଜିନ କଣ ସିଙ୍ଗଲ୍ ଇଞ୍ଜିନ ବି ଫେଲ୍ ହୋଇଯାଇଛି ।
Also Read
ଦଳର ବରିଷ୍ଠ ନେତା ରଣେନ୍ଦ୍ର ପ୍ରତାପ ସ୍ୱାଇଁ କହିଥିଲେ ଯେ, ଏ ସରକାର ମାତ୍ର ୬ ମାସର ହୋଇଛି । ଆମକୁ ଆହୁରି ୪ ବର୍ଷ ୬ ମାସ ଲଢ଼େଇ କରିବାକୁ ପଡିବ । ସମସ୍ତେ ଲଢ଼େଇ ଜାରି ରଖ । ରାସ୍ତାରେ ବାଟରେ ଘାଟରେ ସବୁଠି ଲଢେଇ କରିବାକୁ ସେ ଆହ୍ୱାନ ଦେଇଥିଲେ । ବିଜେଡି ଓଡ଼ିଶାର ସ୍ୱାର୍ଥ ପାଇଁ ଲଢୁଥିବା ସେ କହିଛନ୍ତି । ଯୋଗାଣ ମନ୍ତ୍ରୀଙ୍କୁ କଡା ଜବାବ ଦେଇ ସେ କହିଛନ୍ତି ଯୋଗାଣ ମନ୍ତ୍ରୀ ଆମ ସଭାକୁ ନାଟକ କହୁଛନ୍ତି । ତାହେଲେ ଟ୍ରେନ୍ ଆଳୁ କଥା କ’ଣ । ଏଯାଏ ପହଞ୍ଚିଲାନି । ଟାୟାର୍ ଲିକ୍ ହେଇଗଲା କି ବୋଲି ସେ ପ୍ରଶ୍ନ କରିଛନ୍ତି ।
ଅଧିକ ପଢ଼ନ୍ତୁ:ନବୀନ ନିବାସରେ ବଡ଼ ହଲଚଲ୍; ସିନିୟରଙ୍କୁ ମାନୁନାହାନ୍ତି ଜୁନିୟର, ଚାଲିଛି ସମାନ୍ତରାଳ ସଂଗଠନ!
ପୂର୍ବତନ ମନ୍ତ୍ରୀ ଅରୁଣ ସାହୁ କହିଥିଲେ, ଅନ୍ୟ ରାଜ୍ୟରେ ପିଆଜର ଦର କମିଥିବା ବେଳେ ଆମ ରାଜ୍ୟରେ କିନ୍ତୁ ବଢିକି ଅଛି । ଡବଲ୍ ଇଞ୍ଜିନ ସରକାର ମାନେ ଡବଲ୍ ଶୋଷଣ । ସବୁ ଦର ବଢୁଛି ଓ ବ୍ୟବସାୟୀମାନେ ମୁନାଫା ପାଉଛନ୍ତି ବୋଲି କହିଛନ୍ତି ଅରୁଣ । ନବୀନ ନିବାସ ଆଗରେ ବିଜେପି ଯେଉଁ ସଭା କରିଥିଲା, ସେଠିକି ବୁହା ହୋଇ ଲୋକ ଆସିଥିଲେ ଓ ସେ ସଭା ପତଳା ଥିଲା । କିନ୍ତୁ ଆଜିର ଏ ସଭା ବେଶ୍ ମୋଟା । ଏଠିକି ଲୋକ ବୁହା ହୋଇ ଆସିନାହାନ୍ତି, ପୀଡିତ ମାନେ ସ୍ୱତଃପ୍ରବୃତ୍ତ ଭାବେ ଆସିଥିବାର ସେ କହିଛନ୍ତି ।
ପୂର୍ବତନ ବିଧାୟକ ସମ୍ବିତ ରାଉତରାୟ କହିଥିଲେ କାପିବାରା ଉପାଖ୍ୟାନ । ସେ କହିଥିଲେ, ମୂଷାମାନେ ଏବେ କାପିବାରା (capybara) ସାଇଜର ହୋଇଗଲେଣି । କାପିବାରା ହେଉଛି ଆମାଜନ୍ ଜଙ୍ଗଲର ବଡ ଧରଣର ମୂଷା। ସେମାନଙ୍କୁ ଆନାକୋଣ୍ଡା ଖାଏ। ଆମର ଏଠି କାପିବାରାଙ୍କ ସଂଖ୍ୟା ବଢ଼ି ଗଲାଣି । ଆନାକୋଣ୍ଡା ଆମେ ଆଣିବୁ । ନବୀନ ନିବାସ ଆଗରେ ମୋଦି ସମାବେଶ କରିଥିଲେ ଆଉ ଆଜି ମୁଖ୍ୟମନ୍ତ୍ରୀଙ୍କ ବାସଭବନ ଆଗରେ ସଭା ହେଲା। ଲୋକ ସମର୍ଥନ କେଉଁଠି ଅଛି ଜଣାପଡ଼ିଲା।
ପୂର୍ବତନ ମନ୍ତ୍ରୀ ପ୍ରଫୁଲ୍ଲ ସାମଲ କହିଥିଲେ, ଆମେ ୨୪ ବର୍ଷ ଧରି ଶାସନରେ ଥିଲୁ । ଆମେ କ୍ଷମତାକୁ ଆସିବାକୁ ବ୍ୟସ୍ତ ନୁହଁ । ଆପଣମାନେ ଭାବିବେ ନାହିଁ, ବିଜେପି ସହ ଆମର ସମଝୋତା ଅଛି । ବିଜେପିର ଜନବିରୋଧୀ କାର୍ଯ୍ୟକୁ ଜୋରଦାର୍ ବିରୋଧ କରାଯିବ । ନବୀନଙ୍କୁ ଷଷ୍ଠ ଥର ମୁଖ୍ୟମନ୍ତ୍ରୀ କରିବା ଆମର ଲକ୍ଷ୍ୟ ବୋଲି ସେ କହିଛନ୍ତି ।
ତାଙ୍କ ମତରେ, ଯିଏ ଏପଟ ସେପଟ ହେଉଛି ସିଏ ଦଳରୁ ଯିବା ଦରକାର । ନିହାତି ଭାବେ କିଛି ଲୋକ ଥିବେ ଯେଉଁମାନେ ସୁବିଧା ଦେଖୁଥିବେ । ଯେଉଁମାନେ ରହିବେ ସେମାନେ ଭଲ ଭାବେ ଜାଣିଛନ୍ତି ଆମେ ୫ ବର୍ଷ କାଳ ବିରୋଧୀ ଦଳରେ ରହିବୁ ଏବଂ ଲଢେଇ କରିବୁ । ଆମେ କିନ୍ତୁ କ୍ଷମତା ପାଇଁ ଦୌଡୁ ନାହୁଁ । ଆମକୁ ବିଜୁ ବାବୁ ଲଢେଇ କରିବା ଶିଖେଇ ଦେଇ ଯାଇଛନ୍ତି ।
ଖାଦ୍ୟ ଓ ଯୋଗାଣ ମନ୍ତ୍ରୀ କୃଷ୍ଣଚନ୍ଦ୍ର ପାତ୍ର କହିଛନ୍ତି ଯେ, ମୋହନ ମାଝୀ ସରକାର ଯାହା କହୁଛି ତାହା କରୁଛି । ବିଜେଡି ଆଉ କେବେ ବି ସରକାରକୁ ଆସିବନି । ନବୀନ ପଟ୍ଟନାୟକଙ୍କ ସ୍ୱପ୍ନ ସାକାର ହେବ ନାହିଁ ବୋଲି କହିଛନ୍ତି ମନ୍ତ୍ରୀ । ବିଜେପି ଦିନକୁ ଦିନ ଶକ୍ତିଶାଳୀ ହେଉଥିବା ସେ କହିଛନ୍ତି ।
ଅଧିକ ପଢ଼ନ୍ତୁ: ବିଜେଡି ପୋଷ୍ଟମର୍ଟମରେ ସାମିଲ ହେଉଛନ୍ତି ନୂଆ ନୂଆ ନେତା, କେବେ ବାହାରିବ ଅସଲ ନିର୍ଯ୍ୟାସ
ବିଜେଡିର ଆନ୍ଦୋଳନ ଉପରେ କଡ଼ା ଜବାବ ରଖିଲା ବିଜେପି । ପ୍ରବାସୀ ଭାରତୀୟଙ୍କୁ ସ୍ବାଗତ କରିବା ସମୟରେ ବିଜେଡ଼ି ଆନ୍ଦୋଳନକୁ ଓହ୍ଲାଇବାକୁ ନିନ୍ଦା କରିଛି ବିଜେପି । ବିଜେପି ରାଜ୍ୟ ଉପସଭାପତି ଗୋଲକ ମହାପାତ୍ର କହିଛନ୍ତି, ଓଡ଼ିଶାର ବିକାଶ ବିଜେଡ଼ି ଦେହରେ ଯାଉ ନାହିଁ । ବିଜେପି ସରକାରର ସଫଳ ଶାସନ ଦେଖି ସହିପାରୁନି ବିଜେଡ଼ି । ଦର ବୃଦ୍ଧି ସମସ୍ୟା ବିଜେପିକୁ ଉତ୍ତରାଧିକାରୀ ସୂତ୍ରରେ ଦେଇଛି ବିଜେଡ଼ି । ପୂର୍ବ ସରକାର କରିଥିବା ଆଳୁ, ପିଆଜ ମିଶନ ଫେଲ । ଅଧିକାଂଶ ସାମଗ୍ରୀ ବାହାର ରାଜ୍ୟରୁ ଓଡ଼ିଶାକୁ ଆସୁଛି । ତେବେ ଦରଦାମ ବୃଦ୍ଧିକୁ ନିୟନ୍ତ୍ରଣ କରିବା ପାଇଁ ବିଜେପି ସରକାର ବିଭିନ୍ନ ପଦକ୍ଷେପ ନେଉଛନ୍ତି । ଗତ ସରକାର ଲମ୍ବା ସମୟ ଧରି ଯାହା କରିପାରିଲାନି, ବିଜେପି ସରକାର ୬ ମାସରେ କରି ଦେଖାଇଛି । ବିଜେଡ଼ି ସରକାର କହିଥିଲା ଧାନ ଉପରେ ୧୦୦ ଟଙ୍କା ବୋନସ ଦେବ, କିନ୍ତୁ ଦେଲା ନାହିଁ । ବିଜେପି ପ୍ରତିଶ୍ରୁତି ଦେଇଥିଲା ଓ ଚାଷୀଙ୍କୁ ୮୦୦ ଟଙ୍କା ବୋନସ ଦେଲା । ମହିଳା ସଶକ୍ତୀକରଣ ନାଁରେ କୁମ୍ଭୀର କାନ୍ଦଣା କାନ୍ଦୁଥିଲା ବିଜେଡ଼ି । କିନ୍ତୁ ବିଜେପି ସରକାର ସୁଭଦ୍ରା ଯୋଜନା ମାଧ୍ୟମରେ ମହିଳାଙ୍କୁ ସମ୍ମାନ ଦେଲା ।
ବିଜେଡିର ଏହି ପ୍ରତିବାଦ ସଭା ଉପରେ କଂଗ୍ରେସ ରଖିଛି ପ୍ରତିକ୍ରିୟା । କଂଗ୍ରେସ ମୁଖପାତ୍ର ନିଶିକାନ୍ତ ମିଶ୍ର କହିଛନ୍ତି, ବିଜେପି ଓ ବିଜେଡି ଗୋଟିଏ ମୁଦ୍ରାର ଦୁଇଟି ପାର୍ଶ୍ୱ । ଉପରାଷ୍ଟ୍ରପତି ପ୍ରସଙ୍ଗରେ ବିଜେଡି ବିନା ନିମନ୍ତ୍ରଣରେ ବିଜେପିକୁ କେନ୍ଦ୍ରରେ ସମର୍ଥନ କରିଥିଲା । ସେମାନେ ଏକାଠି ଅଛନ୍ତି । କିନ୍ତୁ ଲୋକ ଏବେ କଂଗ୍ରେସ ମୁହାଁ ହୋଇଥିବାରୁ ବିଜେଡି ଏମିତି ପ୍ରୟାସ କରିଛି । ଲୋକଙ୍କୁ ଭ୍ରମିତ କରିବାକୁ ଚାହୁଁଛି । ଏମାନଙ୍କର ରାଜ୍ୟରେ କଳି ଓ କେନ୍ଦ୍ରରେ କୋଳାକୋଳି ବୋଲି ସେ ଆକ୍ଷେପ କରିଛନ୍ତି ।
