LIVE TV
ଭଦ୍ରକରେ ବ୍ରହ୍ମଚାପୁଡ଼ା ମାରିଲେ ବିଡିଓ । ବୌଦ୍ଧରେ ଦବଙ୍ଗଗିରି ଦେଖାଇଲେ ଉପ ଜିଲ୍ଲାପାଳ । କୋଇଡ଼ାରେ ବିଡିଓଙ୍କୁ ନେଇ ହଙ୍ଗାମା । ଏହି ସବୁ ତଥ୍ୟ ଉପରେ ନଜର ପକାଇଲେ ଲାଗୁଛି, ରାଜ୍ୟରେ ଚାଲିଛି ଅଫିସର ରାଜ । ଆଉ ଅଧିକାରୀ ମାନଙ୍କ ଅହଙ୍କାର ବିରୋଧରେ ତୀବ୍ର ହେଉଛି ଜନ ଆକ୍ରୋଶ । ଦୁର୍ଘଟଣା ପ୍ରବଣ ଅଞ୍ଚଳରେ ରେଲୱେ ବ୍ରିଜକୁ ବିରୋଧ କରି ବୌଦ୍ଧ ଉପ ଜିଲ୍ଲାପାଳ ରବୀନ୍ଦ୍ରନାଥ କଅଁରଙ୍କ ପାଖକୁ ମନମୁଣ୍ଡା ଅଞ୍ଚଳବାସୀ ଆସିଥିବାବେଳେ ଉପ ଜିଲ୍ଲାପାଳ ତାଙ୍କୁ ଦୁର୍ବ୍ୟବହାର କରିଥିବା ଅଭିଯୋଗ ହୋଇଛି । ଅଫିସ ପରିସରରେ ଏବଂ ବାହାରେ ଲୋକଙ୍କ ସହ ମୁହାଁମୁହିଁ ହୋଇଥିଲେ ଉପ ଜିଲ୍ଲାପାଳ ରବୀନ୍ଦ୍ରନାଥ କଅଁର ।
Also Read
ଅଧିକ ପଢ଼ନ୍ତୁ: BJPର ଡାଇରେକ୍ଟ ଆଟାକ୍, ପ୍ରଣବଙ୍କ କ୍ରୀତଦାସ ମନ୍ତବ୍ୟକୁ ବିରୋଧ; 5T ସଚିବ କେମିତି ହେଲେ CMO?
ସେହିଭଳି ଭଦ୍ରକ ଜିଲ୍ଲା ବନ୍ତ ବ୍ଲକର ବିଡିଓଙ୍କ ଦାଦାଗିରି ତ ସାରା ରାଜ୍ୟ ଦେଖିଥିଲା ଏଇ କିଛିଦିନ ତଳେ । ଶିକ୍ଷକ ବଦଳି ବାତିଲ ସହ ସ୍କୁଲର 5T କାର୍ଯ୍ୟ ସ୍ଥଗିତ ରଖିବାକୁ ଦାବି ଉଠାଇ ଥିବାବେଳେ ସ୍କୁଲ କମିଟି ସଭାପତି ରଞ୍ଜନ ବାରିକଙ୍କୁ ସେ ଯେଭଳି ବ୍ରହ୍ମ ଚାପୁଡ଼ା ମାରିଥିଲେ ଚାରିଆଡ଼େ ଭାଇରାଲ ହୋଇଯାଇଥିଲା । ଏପଟେ ସପ୍ତାହେ ବିତିଲା କେନ୍ଦୁଝର ଜିଲ୍ଲା କୋଇଡ଼ା ବିଡ଼ିଓଙ୍କ ବିରୋଧରେ ଜାରି ରହିଥିବା ଆନ୍ଦୋଳନ । ବିଡିଓ ପଲ୍ଲବୀ ରାଣୀ ରାଜଙ୍କ ବଦଳି ଦାବିରେ ବିଧାନସଭାରୁ କୋଇଡା ଯାଏଁ ହୁଲସ୍ତୁଲ ହେଉଛି । ଉନ୍ନୟନମୂଳକ ପାଣ୍ଠିର ବିନିଯୋଗ ନହେବା, ଜନସାଧାରଣ ଓ ଜନ ପ୍ରତିନିଧିଙ୍କୁ ଦୁର୍ବ୍ୟବହାର, ଭାଇ ଓ ମା’ ନାଁରେ ଠିକା କାର୍ଯ୍ୟ କରିବା ଆଦି ଅନେକ ଅଭିଯୋଗ ଉଠାଇ ଜନତାଙ୍କଠୁ ନିର୍ବାଚିତ ଜନପ୍ରତିନିଧିଙ୍କ ଯାଏଁ ଆନ୍ଦୋଳନ କରିଆସୁଛନ୍ତି ।
ଏମିତିକି କଲମଛାଡ଼ ଆନ୍ଦୋଳନ ବି କରିଛନ୍ତି କର୍ମଚାରୀ । ଆଜି କୋଇଡାରେ ୧୨ ଘଣ୍ଟିଆ ବନ୍ଦ ପାଳନ ବି କରିଛି ସିପିଆଇଏମ୍ । ଅଥଚ ରାଜ୍ୟ ସରକାର ନିର୍ବିକାର ସାଜିଥିବା ଅଭିଯୋଗ ଉଠିଛି । ତେବେ ଏ ସଂପର୍କରେ କୌଣସି ପ୍ରତିକ୍ରିୟା ଦେବାକୁ ମନା କରିଦେଇଛନ୍ତି କୋଇଡ଼ା ବିଡିଓ ।
ରାଜ୍ୟରେ ଅଫିସର ରାଜ୍ ପ୍ରସଙ୍ଗକୁ ନେଇ ଚଳିତ ବିଧାନସଭା ଅଧିବେଶନରେ ହଙ୍ଗାମା ମଚାଇଥିଲେ ବିରୋଧୀ । ମନ୍ତ୍ରୀ ରୀତା ସାହୁ ଓ ନିରଞ୍ଜନ ପୂଜାରୀଙ୍କ ଫଟୋ ଦେଖାଇ ବିରୋଧୀ ହମଲା କରିଥିଲେ । ସେପଟେ ବ୍ଲକ ଓ ତହସିଲ ଗୁଡ଼ିକରେ ସରକାରୀ ଅଧିକାରୀ ମାନଙ୍କ ମନମାନୀ ଶାସନ, ଦାୟିତ୍ୱହୀନତା ଏବଂ ବିଶୃଙ୍ଖଳିତ ଆଚରଣ ଅଭିଯୋଗ ସାମ୍ନାକୁ ଆସିଥିବାବେଳେ ଏହାକୁ ନେଇ ବର୍ଷିଛନ୍ତି ବିରୋଧୀ ବିଜେପି ଓ କଂଗ୍ରେସ ।
