Bangladesh New Political Party: ହସିନାଙ୍କୁ ତଡ଼ିଥିଲେ, ଏବେ ଗଢ଼ିବେ ନୂଆ ଦଳ

ବାଂଲାଦେଶରେ ଲାଗି ରହିଛି ରାଜନୈତିକ ଅସ୍ଥିରତା । ଯେଉଁ ଛାତ୍ର ନେତାମାନଙ୍କ ଯୋଗୁଁ ଶେଖ ହସିନାଙ୍କ ସରକାରର ପତନ ଘଟିଥିଲା, ସେହି ନେତାମାନେ ଏବେ ଏକ ନୂତନ ରାଜନୈତିକ ଦଳ ଗଠନ କରିବା ନେଇ ଘୋଷଣା କରିଛନ୍ତି। ଶେଖ ହାସିନାଙ୍କ ସରକାରକୁ ଭାଙ୍ଗିବା ପାଇଁ ଆନ୍ଦୋଳନର ନେତୃତ୍ୱ ନେଇଥିବା ଜାତୀୟ ନାଗରିକ ସମିତି ଏବଂ ଭେଦଭାବ ବିରୋଧୀ ଛାତ୍ର ଆନ୍ଦୋଳନ ଦେଶର ରାଜନୀତିରେ ପ୍ରବେଶ କରିବା ନେଇ ଘୋଷଣା କରିଛନ୍ତି। ରିପୋର୍ଟ ଅନୁସାରେ, ନୂତନ ଦଳ ଗଠନର ଘୋଷଣା ଶୁକ୍ରବାର (ବାଂଲାଦେଶୀ ସମୟ) ଅପରାହ୍ନ ୩ଟାରେ କରାଯିବ। ଏନେଇ ସାମ୍ବାଦିକ ସମ୍ମିଳନୀରେ ଜାତୀୟ ନାଗରିକ ସମିତିର ମୁଖ୍ୟ ସଂଗଠକ ସରଜିସ୍ ଆଲାମ୍ ସୂଚନା ଦେଇଛନ୍ତି।

ଅଧିକ ପଢ଼ନ୍ତୁ: ଯୁଦ୍ଧ ନିଆଁରେ ମାଲାମାଲ ହେଉଛି ଆମେରିକା, ଏତେ ଟଙ୍କାର ବେପାର କରୁଛି ଯେମିତି ଦେଶ କିଣି ଦେବ

ଗତବର୍ଷ, ବାଂଲାଦେଶରେ ସରକାରୀ ଚାକିରିରେ ସଂରକ୍ଷଣ ଉଚ୍ଛେଦ ପାଇଁ ଏକ ଆନ୍ଦୋଳନ ଆରମ୍ଭ ହୋଇଥିଲା, ଯାହା ଖୁବଶୀଘ୍ର ଶେଖ ହାସିନାଙ୍କ ଇସ୍ତଫା ଦାବିରେ ପରିଣତ ହୋଇଥିଲା। ଏହି ଆନ୍ଦୋଳନକୁ ଦମନ କରିବା ପାଇଁ ହସିନା ସରକାର କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିଥିଲେ। ସେହି ସମୟରେ, ଆନ୍ଦୋଳନରତ ଛାତ୍ରମାନେ ମଧ୍ୟ ସରକାରଙ୍କ ବିରୁଦ୍ଧରେ ହିଂସାତ୍ମକ ପ୍ରତିବାଦ ଆରମ୍ଭ କରିଥିଲେ। ଜାତିସଂଘ ରିପୋର୍ଟ ଅନୁଯାୟୀ, ଏହି ହିଂସାତ୍ମକ ପ୍ରତିବାଦରେ ୧୨୦୦ରୁ ଅଧିକ ଲୋକଙ୍କ ମୃତ୍ୟୁ ହୋଇଥିଲା। ଶେଖ୍ ହସିନା ଗତବର୍ଷ ଅଗଷ୍ଟ ମାସରେ ବାଂଲାଦେଶ ଛାଡିଥିଲେ ଏବଂ ସେବେଠାରୁ ଭାରତରେ ରହୁଛନ୍ତି।

ଜାତୀୟ ନାଗରିକ ସମିତି ଏବଂ ଭେଦଭାବ ବିରୋଧୀ ଛାତ୍ର ଆନ୍ଦୋଳନର ନେତାମାନେ ଫେବୃଆରୀ ୫ ତାରିଖରୁ ଏକ ନୂତନ ଦଳ ଗଠନ କରିବା ସମ୍ପର୍କରେ ଜନମତ ଜାଣିବା ପାଇଁ ଏକ ସର୍ଭେ କରୁଛନ୍ତି। ବାଂଲାଦେଶର ଛାତ୍ର ନେତାମାନେ ଦେଶର ପ୍ରାୟ ସମସ୍ତ ଜିଲ୍ଲାର ଲୋକଙ୍କଠାରୁ ଅନଲାଇନରେ ମତାମତ ଲୋଡିଥିଲେ। ଏହି ଆଧାରରେ, ଏକ ନୂତନ ଦଳ ଗଠନ କରିବାକୁ ନିଷ୍ପତ୍ତି ନିଆଯାଇଛି। ଆନ୍ଦୋଳନରତ ଛାତ୍ର ନେତାମାନେ କହିଛନ୍ତି ଯେ ରବିବାର ଅପରାହ୍ନ ସୁଦ୍ଧା ପ୍ରାୟ ୩ଲକ୍ଷ ଲୋକ ଅନଲାଇନରେ ସେମାନଙ୍କ ମତାମତ ସେୟାର କରି ସାରିଛନ୍ତି।

ମହମ୍ମଦ ୟୁନୁସଙ୍କ ମଧ୍ୟବର୍ତ୍ତୀକାଳୀନ ସରକାରଙ୍କ ପରାମର୍ଶଦାତା ନାହିଦ ଇସଲାମ ତାଙ୍କ ପଦବୀରୁ ଇସ୍ତଫା ଦେଇଛନ୍ତି। ନାହିଦ ଇସଲାମଙ୍କୁ କ୍ୟାବିନେଟରେ ସୂଚନା ପରାମର୍ଶଦାତା ଭାବରେ ନିଯୁକ୍ତି ଦିଆଯାଇଥିଲା। ସେ ମଙ୍ଗଳବାର ଦିନ ମହମ୍ମଦ ୟୁନୁସଙ୍କୁ ତାଙ୍କ ଇସ୍ତଫାପତ୍ର ପ୍ରଦାନ କରିଛନ୍ତି। ବାଂଲାଦେଶୀ ଗଣମାଧ୍ୟମ ଜାତୀୟ ନାଗରିକ ସମିତିର ଜଣେ ନୀତି ନିର୍ଦ୍ଧାରକ କହିଛନ୍ତି, ନାହିଦ ଇସଲାମ ବର୍ତ୍ତମାନର ମଧ୍ୟବର୍ତ୍ତୀକାଳୀନ ସରକାରରୁ ଇସ୍ତଫା ଦେଇ ନୂତନ ରାଜନୈତିକ ଦଳର ସଂଯୋଜକ ଭାବରେ ଦାୟିତ୍ୱ ଗ୍ରହଣ କରିପାରନ୍ତି। ଇତିମଧ୍ୟରେ, ନୂତନ ଦଳର ସଦସ୍ୟ ସଚିବ ଭାବରେ ଜାତୀୟ ନାଗରିକ ସମିତିର ସଦସ୍ୟ ସଚିବ ଅଖତାର ହୁସେନଙ୍କ ନାମ ପ୍ରାୟ ଚୂଡ଼ାନ୍ତ ହୋଇଛି।

ବାଂଲାଦେଶର ନେତାମାନଙ୍କ ମଧ୍ୟରେ କନ୍ଦଳ ସୃଷ୍ଟି ହୋଇଛି। ବାଂଲାଦେଶ ସେନା ମୁଖ୍ୟ ମଧ୍ୟ ସମସ୍ତ ନେତାଙ୍କୁ ଚେତାବନୀ ଦେଇଛନ୍ତି। ସେନା ମୁଖ୍ୟ ୱାକର-ଉଜ୍ଜମାନ କହିଛନ୍ତି, "ଦେଶରେ ଆଇନ ଶୃଙ୍ଖଳା ପରିସ୍ଥିତି ବିଗିଡ଼ିବାର କିଛି କାରଣ ଅଛି। ପ୍ରଥମ କାରଣ ହେଉଛି ଆମେ ନିଜ ନିଜ ମଧ୍ୟରେ ଲଢ଼ିବାରେ ବ୍ୟସ୍ତ। ଯଦି ଆମେ ମତଭେଦକୁ ଭୁଲି ନ ଯାଆନ୍ତି, ତେବେ ଏହା ଆଗକୁ ସମସ୍ୟା ସୃଷ୍ଟି କରିବ। ଦେଶର ସାର୍ବଭୌମତ୍ୱ ବିପଦରେ ପଡ଼ିବ। ମୁଁ ସମସ୍ତଙ୍କୁ ଚେତାବନୀ ଦେଉଛି। ଏସବୁ ବନ୍ଦ କର। ଏପରି ନକଲେ ପରିସ୍ଥିତି ବିଗିଡିବାର ଆଶଙ୍କା କରାଯାଉଛି। ଏହା ପଛରେ କୌଣସି ବ୍ୟକ୍ତିଗତ ଏଜେଣ୍ଡା ନାହିଁ। ମୁଁ ଦେଶର କଲ୍ୟାଣ ପାଇଁ ଏହା କହୁଛି। କେବଳ ଶାନ୍ତି ପୁନଃସ୍ଥାପିତ ହେଉ ବୋଲି ମୁଁ ଚାହେଁ।"

ବାଂଲାଦେଶରେ କେବେ ନିର୍ବାଚନ ହେବ?

ଆପଣଙ୍କୁ କହି ରଖୁଛୁ ଯେ ବାଂଲାଦେଶର ମଧ୍ୟବର୍ତ୍ତୀକାଳୀନ ସରକାରଙ୍କ ମୁଖ୍ୟ ପରାମର୍ଶଦାତା ମହମ୍ମଦ ୟୁନୁସ ପୂର୍ବରୁ ସ୍ପଷ୍ଟ କରିଦେଇଥିଲେ ଯେ ତାଙ୍କର ନିର୍ବାଚନ ଲଢ଼ିବାରେ କୌଣସି ଆଗ୍ରହ ନାହିଁ। ପ୍ରଶ୍ନ ହେଉଛି, ଦେଶରେ କେବେ ନିର୍ବାଚନ ହେବ ସେ ବିଷୟରେ ଏପର୍ଯ୍ୟନ୍ତ ଅନିଶ୍ଚିତତା ରହିଛି। ସାମ୍ପ୍ରତିକ ସମୟରେ ୟୁନୁସ୍ କହିଛନ୍ତି ଯେ ୨୦୨୫ ଶେଷ ସୁଦ୍ଧା ନିର୍ବାଚନ ହୋଇପାରେ। ସେହି ସମୟରେ, ଅନେକ ରାଜନୈତିକ ବିଶ୍ଳେଷକ ବିଶ୍ୱାସ କରନ୍ତି ଯେ ଏକ ଯୁବ ନେତୃତ୍ୱାଧୀନ ଦଳ ଦେଶର ରାଜନୈତିକ ଦୃଶ୍ୟପଟ୍ଟକୁ ଯଥେଷ୍ଟ ପରିବର୍ତ୍ତନ କରିପାରିବ।

ଅଧିକ ପଢ଼ନ୍ତୁ: ଗୀତା ଛୁଇଁ ଶପଥ ନେଇଥିବା କାଶ୍ ପଟେଲ କିଏ ? କେମିତି ହେଲେ FBI ନିର୍ଦ୍ଦେଶକ