LIVE TV
ବହୁଚର୍ଚ୍ଚିତ ପୂର୍ବତନ ମନ୍ତ୍ରୀ ନବ ଦାସଙ୍କ ହତ୍ୟା ମାମଲାରେ ରହସ୍ୟର ଯେମିତି ଅନ୍ତ ନାହିଁ । ମର୍ଡର ପ୍ଲଟ୍ଠୁ ନେଇ ହସ୍ପିଟାଲ ଯାଏଁ ସବୁଠି ଯେମିତି ଖାଲି ଷଡ଼ଯନ୍ତ୍ର ଆଉ ଷଡ଼ଯନ୍ତ୍ରର ଗନ୍ଧ । ୟା ଭିତରେ ସାମ୍ନାକୁ ଆସିଥିବା ତଥ୍ୟ ବି ମୁଣ୍ଡ ଘୂରେଇ ଦେଲାଭଳି । ନବଙ୍କ ରକ୍ତଭିଜା ସାର୍ଟକୁ କୁଆଡ଼େ ପୋଡ଼ି ଦେଇଥିଲେ ହସ୍ପିଟାଲ କର୍ତ୍ତୃପକ୍ଷ । ଖାଲି ନବଙ୍କ ସାର୍ଟ ପୋଡାଯାଇନି, ଜଣେ ପ୍ରମୁଖ ସାକ୍ଷୀଙ୍କ ସାର୍ଟର ରଙ୍ଗ ବି ହଳଦୀରୁ ଧଳା ହୋଇଯାଇଛି । ଆଉ ସବୁଠୁ ବଡ଼ କଥା ହେଉଛି, ତଦନ୍ତରେ ଏସବୁ ଛିଦ୍ର ବାବଦରେ ଖବର ପ୍ରସାରଣ ପରେ ଆଜି ହିଁ ତଦନ୍ତକାରୀ ଅଧିକାରୀଙ୍କୁ ରିପୋର୍ଟ ତଲବ କରୁଛି କ୍ରାଇମବ୍ରାଞ୍ଚ ।
Also Read
ପୂରା ଯୋଜନାବଦ୍ଧ ଥିଲା କି ପୂର୍ବତନ ମନ୍ତ୍ରୀ ନବ ଦାସଙ୍କ ହତ୍ୟା ? ପ୍ରମାଣ ନଷ୍ଟ ପାଇଁ ପାଦେ ପାଦେ ହୋଇଥିଲା କି ଷଡ଼ଯନ୍ତ୍ର ? କାରଣ ହତ୍ୟା ଘଟଣାଠୁ ଶବ ବ୍ୟବଚ୍ଛେଦ ପର୍ଯ୍ୟନ୍ତ ସବୁଥିରେ ପ୍ରମାଣ ନଷ୍ଟ ପାଇଁ ଭରା ଉଦ୍ୟମର ମିଳିବାରେ ଲାଗୁଛି ପୁଳା ପୁଳା ତଥ୍ୟ । ମର୍ଡର ପ୍ଲଟ୍ଠୁ ହସ୍ପିଟାଲ ଯାଏଁ ସବୁଠି ଯେମିତି ପାଖେ ପାଖେ ରହି, ନିଜ ଇଚ୍ଛା ମୁତାବକ ତଦନ୍ତର ଦିଗକୁ ମୋଡ଼ୁଥିଲା ହତ୍ୟା ଷଡ଼ଯନ୍ତ୍ରକାରୀ । କେମିତି ନଜର ପକାନ୍ତୁ ଏ ତିନିଟି ବିନ୍ଦୁ ଉପରେ।
- ଗୁଳିମାଡ଼ରେ ମୃତ ମନ୍ତ୍ରୀ ନବଙ୍କ ରକ୍ତଜୁଡୁବୁଡୁ ସାର୍ଟକୁ ହସ୍ପିଟାଲରେ ପୋଡ଼ି ଦିଆଯିବା
- ଗୁଳିମାଡ଼ର ପ୍ରମୁଖ ସାକ୍ଷୀଙ୍କ ହଳଦିଆ ସାର୍ଟ ବୟାନ ରେକର୍ଡ ବେଳେ ଧଳା ହୋଇଯିବା
- ଖବର ପ୍ରସାରଣକୁ ଦେଖି ତଦନ୍ତକାରୀ ଅଧିକାରୀଙ୍କୁ କ୍ରାଇମବ୍ରାଞ୍ଚ ଏବେ ରିପୋର୍ଟ ତଲବ କରିବା
ଅଧିକ ପଢ଼ନ୍ତୁ: ପ୍ରେମିକକୁ ବିଷ ଦେଇ ହତ୍ୟା, ପ୍ରେମିକାକୁ ଫଶୀ ଦଣ୍ଡ ଶୁଣାଇଲେ କୋର୍ଟ
ବ୍ରଜରାଜନଗର ଗାନ୍ଧିଛକରେ ନବଙ୍କୁ ଗୁଳିମାଡ଼ ସମୟରେ ରକ୍ତରେ ବୁଡ଼ିଯାଇଛି ନବ ପିନ୍ଧିଥିବା ଧଳା ସାର୍ଟ । କିନ୍ତୁ ମୃତ୍ୟୁ ପରେ ନା କ୍ରାଇମବ୍ରାଞ୍ଚ ପାଖରେ ରକ୍ତଭିଜା ସାର୍ଟ ରହିଛି, ନା ପରୀକ୍ଷା ପାଇଁ ଫୋରେନ୍ସିକ୍ ଲାବ୍କୁ ପଠାଯାଇଛି । ଆଉ ଏ ଭିତରେ କ୍ରାଇମବ୍ରାଞ୍ଚ୍ ସୂତ୍ରରୁ ମିଳିଥିବା ଚାଞ୍ଚଲ୍ୟକର ତଥ୍ୟଟି ହେଉଛି ଝାରସୁଗୁଡ଼ାରୁ ଭୁବନେଶ୍ବର ଆସିବା ପରେ ଯେଉଁ ଆପୋଲୋ ହସ୍ପିଟାଲରେ ତାଙ୍କୁ ଭର୍ତ୍ତି କରାଯାଇଥିଲା, କୋଭିଡ୍ ଆଳରେ କୁଆଡ଼େ ଆପୋଲୋ ହସ୍ପିଟାଲ କର୍ତ୍ତୃପକ୍ଷ ତାକୁ ପୋଡ଼ି ଦେଇଛନ୍ତି । ଆହୁରି ସାଂଘାତିକ କଥାଟି ହେଉଛି କି ନବଙ୍କ ହତ୍ୟାର ୩ ମାସ ପୂର୍ବରୁ କୋଭିଡ୍ କଟକଣାକୁ ହଟାଇ ସାରିଥିଲେ ରାଜ୍ୟ ସରକାର ।
ତେଣୁ ପ୍ରଶ୍ନ ପୂରା ସରକାର ହସ୍ପିଟାଲରେ ଉପସ୍ଥିତ ଥିଲା ବେଳେ ଜଣେ କ୍ୟାବିନେଟ୍ ମନ୍ତ୍ରୀଙ୍କୁ ଗୁଳିମାଡ଼ ଭଳି ସାଂଘାତିକ ଘଟଣାର ଗୁରୁତ୍ବପୂର୍ଣ୍ଣ ପ୍ରମାଣକୁ କେମିତି ଜାଳି ଦିଆଯାଇ ପାରିଲା ? ହସ୍ପିଟାଲ୍ କର୍ତ୍ତୃପକ୍ଷ ଜାଣିଶୁଣି ଏମିତି କରିଛନ୍ତି ନା କାହା ନିର୍ଦ୍ଦେଶରେ ପ୍ରମାଣ ଲିଭେଇ ଦେଇଛନ୍ତି ? ହେଲେ ଏନେଇ କ୍ୟାମେରା ସାମ୍ନାରେ ମୁହଁ ଖୋଲି ନାହାନ୍ତି ଆପୋଲୋ ହସ୍ପିଟାଲ୍ କର୍ତ୍ତୃପକ୍ଷ ।
ପୁଣି ସେଇ ଦୃଶ୍ୟ ପାଖକୁ ଫେରନ୍ତୁ । ନବଙ୍କୁ ଗୁଳିମାଡ଼ ବେଳେ ତାଙ୍କୁ ଧରିଥିବା ବ୍ୟକ୍ତି ହେଉଛନ୍ତି ଶୁଭେନ୍ଦୁ ପଟ୍ଟନାୟକ । ସ୍ପଷ୍ଟ ଦିଶୁଥିଲା ଶୁଭେନ୍ଦୁ ପିନ୍ଧିଛନ୍ତି ହଳଦିଆ ରଙ୍ଗର ସାର୍ଟ । ପ୍ରପର୍ଟି ସିଜର ଲିଷ୍ଟରେ ବି ସେଇ ସମାନ କଥା ଉଲ୍ଲେଖ ଅଛି । ହେଲେ ସାକ୍ଷୀଙ୍କ ବୟାନ ରେକର୍ଡ ବେଳେ ହଳଦୀ ରଙ୍ଗ ସାର୍ଟ ବଦଳି ଧଳା ହେଇଯାଉଛି । ଧାରା ୧୬୧ ଅନୁସାରେ ତଦନ୍ତକାରୀ ଅଧିକାରୀଙ୍କ ଦ୍ବାରା ରେକର୍ଡ କରାଯାଇଥିବା ସାକ୍ଷୀଙ୍କ ଏ ବୟାନ୍ । ଏଠି ପ୍ରଶ୍ନ ପ୍ରପର୍ଟି ସିଜରରେ ହଳଦିଆ ଥିବା ସାର୍ଟ ବୟାନ ରେକର୍ଡ ସମୟରେ ଧଳା କେମିତି ହେଲା? ଏତେ ବଡ଼ ତ୍ରୁଟି କେମିତି କଲା କ୍ରାଇମବ୍ରାଞ୍ଚ ? ଏମିତି କରିବାକୁ ଚାପ ନଥିଲା ତ କ୍ରାଇମବ୍ରାଞ୍ଚ ଉପରେ ? ସବୁଠୁ ବଡ଼ କଥା ହେଉଛି ଓଟିଭିକୁ ଏକ୍ସକ୍ଲୁସିଭ୍ ଇଣ୍ଟରଭ୍ୟୁ ଦେଇ ସାକ୍ଷୀ ଶୁଭେନ୍ଦୁ ବି କହିଛନ୍ତି ମୁଁ ହଳଦିଆ ସାର୍ଟ ହିଁ ପିନ୍ଧିଥିଲି ।
ଆହୁରି ଗୁରୁତ୍ବପୂର୍ଣ୍ଣ କଥା ହେଉଛି ନବ ଦାସଙ୍କୁ ହତ୍ୟା ଘଟଣାକୁ ୨ ବର୍ଷ ପୂରିବାକୁ ବସିଥିବା ବେଳେ ଗଣମାଧ୍ୟମରେ ତଦନ୍ତରେ ଏତେସବୁ ତ୍ରୁଟି ଉଜାଗରକୁ ଦେଖି ଏବେ ତଦନ୍ତକାରୀ ଅଧିକାରୀଙ୍କୁ ଆଜି ରିପୋର୍ଟ ତଲବ କରିଛି କ୍ରାଇମବ୍ରାଞ୍ଚ । କାହିଁକି ଏସବୁ ଚର୍ଚ୍ଚା ଚାଲିଛି, ସତ୍ୟାସତ୍ୟ କ’ଣ ଜାଣିବାକୁ ଚାହିଁଛି କ୍ରାଇମବ୍ରାଞ୍ଚ ମୁଖ୍ୟାଳୟ । କେବଳ ଏତିକି ନୁହେଁ, କାହା ଗୁଳିରେ ଯାଇଛି ନବ ଦାସଙ୍କ ଜୀବନ, ତାହା ବି ଏବେ ବଡ଼ପ୍ରଶ୍ନ ହୋଇ ଠିଆ ହୋଇଛି । କାରଣ ଫରେନସିକ୍ ରିପୋର୍ଟ କହୁଛି ନବଙ୍କ ପିଏସ୍ଓ ଗାଡ଼ିରେ ବି ରହିଛି ପାଞ୍ଚ ପାଞ୍ଚଟି ଗନ୍ ସଟ୍ ହୋଲ୍ । ଏପରିକି ନବଙ୍କ ଛାତିରେ ବାଜିଥିବା ଗୁଳି ବି ନ ମିଳିବା ସନ୍ଦେହକୁ ଆହୁରି ବଢ଼ାଇ ଚାଲିଛି । ତେଣୁ ଏଭଳି ସ୍ଥିତିରେ ପରିବାରର ଦାବି ପରେ ମାମଲାର ସିବିଆଇ ତଦନ୍ତ ହେଉଛି କି ନାହିଁ, ଷଡ଼ଯନ୍ତ୍ରର ଗୁମର ପଦାକୁ ବାହାରୁଛି କି ନାହିଁ, ଏବେ ତା ଉପରେ ନଜର ।
