କଂଗ୍ରେସର ବରିଷ୍ଠ ନେତା ନିରଞ୍ଜନ ପଟ୍ଟନାୟକଙ୍କ ଆଉ ଏକ ଘରେ ପୁଣି ଚୋର ପଶିବାକୁ ଉଦ୍ୟମ କରିଛି । ପୁତୁଲ୍ ନାମରେ ପରିଚିତ ନିରଞ୍ଜନଙ୍କ ଘରେ କାହିଁକି ବାରମ୍ୱାର ପଶୁଛି ଚୋର, ତାକୁ ନେଇ ନୟାପଲ୍ଲୀ ଅଞ୍ଚଳରେ ଢେର୍ ଚର୍ଚ୍ଚା । ସୋମବାର ରାତି ପ୍ରାୟ ୧୧.୩୫ରେ ଆଉ ଜଣେ ଚୋର ପଶିଥିବା ସିସିଟିଭିରେ କଏଦ୍ ହୋଇଛି I
ଚୋର ଜଣକ କିଛି ସମୟ ରେକୀ କରିବା ପରେ ଘରର ଝରକା ଖୋଲି ଘର ଭିତରେ ପଶିବାକୁ ଉଦ୍ୟମ କରିଥିଲା I ସେହି ସମୟରେ ଘରର ଷ୍ଟାଫ ଦେଖି ଦେବାରୁ ଦୌଡିବାକୁ ଆରମ୍ଭ କରିଥିଲା ଚୋର I ତେବେ ଅଭିଯୁକ୍ତ ଚୋରକୁ କାବୁ କରାଯାଇଛି । ତାକୁ ଥାନାକୁ ନେଇ ପଚରାଉଚରା କରୁଛି କମିଶନରେଟ୍ ପୋଲିସ୍ ।
ଗତ ୨୬ ତାରିଖ ତାରିଖରେ ବଡ଼ି ଭୋରରୁ ନିରଞ୍ଜନଙ୍କ N/29 ବାସଭବନରୁ ବଡ଼ ଧରଣର ଚୋରି ହୋଇଥିଲା । ବରିଷ୍ଠ ପୁଲିସ ଅଧିକାରୀଙ୍କ ସମେତ ଦୁଇ ଡିସିପି ଘଟଣାସ୍ଥଳରେ ଥିଲେ I କିନ୍ତୁ ଏହି ଘରଠାରୁ ୩ ଟି ଘର ଛାଡି N/25ରେ ଥିବା ତାଙ୍କର ଆଉ ଏକ ଘରୁ ଚୋର ପୁଣି ଲୁଟ ପାଇଁ ପ୍ଲଟ ତିଆରି କରୁଥିଲା I ଏହାକୁ ନେଇ ସ୍ଥାନୀୟ ଲୋକମାନେ ଭୟଭୀତ ହୋଇପଡିଛନ୍ତି ।
ଅଧିକ ପଢ଼ନ୍ତୁ: ନିରଞ୍ଜନ ପଟ୍ଟନାୟକଙ୍କ ଘରୁ ଲୁଟ୍, ୫୦ ଲକ୍ଷର ଗହଣା ଓ ନଗଦ ଟଙ୍କା ଧରି ଲୁଟେରା ଛୁ’
ଚୋରି ତ ଚୋରି, ପୁଣି ହାଇପ୍ରୋଫାଇଲ୍ ନେତା ନିରଞ୍ଜନ ପଟ୍ଟନାୟକଙ୍କ ଘରୁ ଚୋରି । ନୟାପଲ୍ଲୀ IRC ଭିଲେଜ୍ ଭଳି ହାଇସିକ୍ୟୁରିଟି ଜୋନରେ ଥିବା ଘରେ ରାତି ଅଧରେ ପଶିଛି ମୁଖାପିନ୍ଧା ଲୁଟେରା । ମାଷ୍ଟର୍ ବେଡରୁମରେ ପଶି ଲୁଟିଛି ନଗଦ ଟଙ୍କା ସହ ୫୦ ଲକ୍ଷର ସୁନା ଗହଣା। ଯାହାର ପ୍ରତିଟି ଦୃଶ୍ୟ କଏଦ୍ ହୋଇଛି ସିସିଟିଭିରେ । କିନ୍ତୁ ଏଯାଏଁ ଲୁଟେରାର ପତ୍ତା ମିଳିନି । ତାକୁ ଧରିବା ପାଇଁ ଜୀ ଜାନ୍ ଲଗାଇଦେଇଛି କମିଶନରେଟ୍ ପୋଲିସ। ସେପଟେ ମୁଖ୍ୟମନ୍ତ୍ରୀ ବି ନିରଞ୍ଜନ ପଟ୍ଟନାୟକଙ୍କ ସହ କଥା ହୋଇଛନ୍ତି ।
ରାଜଧାନୀରେ ହଇଚଇ...ସବୁଠି ଆଜି ଗୋଟିଏ ଚର୍ଚ୍ଚା...ବରିଷ୍ଠ କଂଗ୍ରେସ ନେତା ତଥା ପୂର୍ବତନ ମନ୍ତ୍ରୀ ନିରଞ୍ଜନ ପଟ୍ଟନାୟକଙ୍କ ଘରୁ ହୋଇଛି ଚୋରି । ଲୁଟ୍ ହୋଇଛି ୫୦ ଲକ୍ଷ ଟଙ୍କାର ଗହଣା ଗାଣ୍ଠି....ନଗଦ ଅଢ଼େଇ ଲକ୍ଷ ଟଙ୍କା । ଯିଏ ବି ଶୁଣୁଛନ୍ତି ତାଜୁବ୍ ହେଉଛନ୍ତି । ହାଇପ୍ରୋଫାଇଲ୍ ନେତାଙ୍କ ଘରୁ ଚୋରିକୁ ନେଇ ଆଶ୍ଚର୍ଯ୍ୟ ହେଉଛନ୍ତି । ତେବେ ଅଭିଯୋଗ ଯେତେବେଳେ ସାମ୍ନାକୁ ଆସିଛି, କମିଶନରେଟ୍ ପୋଲିସର ଲାଗିରହିଛି ଧାଁ ଦୌଡ଼ ।
ପୂର୍ବତନ ମନ୍ତ୍ରୀ ନିରଞ୍ଜନ ପଟ୍ଟନାୟକଙ୍କ ନୟାପଲ୍ଲୀ N-2 ସ୍ଥିତ ଘର । ଯେଉଁ ଘରେ ପୁଅ ଦେବଜ୍ୟୋତି ପଟ୍ଟନାୟକଙ୍କ ସହ ନିରଞ୍ଜନ ସପରିବାର ରୁହନ୍ତି । କିନ୍ତୁ ଏହି ଭିଭିଆଇପିଙ୍କ ଘରେ ପଶି ଦୁର୍ବୃତ୍ତ ବୁଲାଇଦେଇଛି କଳାକନା । ଗତ ରାତିରେ ପୁଅବୋହୂ ସାତପଡ଼ା ଯାଇଥିବାବେଳେ ଦୁର୍ବୃତ୍ତ ଘରେ ପଶି ଲୁଟପାଟ କରିଥିବା ନିରଞ୍ଜନ କହିଛନ୍ତି । ଘରେ ସିକ୍ୟୁରିଟି ଗାର୍ଡ ବି ରହିଛନ୍ତି ଏବଂ ନିରଞ୍ଜନ ପଟ୍ଟନାୟକ ମଧ୍ୟ ଫାଷ୍ଟଫ୍ଲୋରରେ ଶୋଇପଡ଼ିଥିଲେ। ତା’ସତ୍ତ୍ବେ କେହି ଜାଣିପାରିଲେନି ।
ରାତି ପ୍ରାୟ ୨ଟା ୪୦ ମିନିଟ୍ । ଅନୁମାନ ଲଗାନ୍ତୁ ନିରଞ୍ଜନଙ୍କ ଘରେ ପଶି କଳାକନା ବୁଲାଇଥିବା ଏହି ଲୁଟେରାର ହୁଲିଆକୁ। ପୁରା ହାଟାକାଟା। ହାତରେ ଗ୍ଲୋବ୍ସ, ଟର୍ଚ୍ଚଲାଇଟ୍ ଏବଂ ମୁହଁରେ ମାସ୍କ । ପାଦରୁ ମୁଣ୍ଡ ଯାଏଁ ଘୋଡ଼ାଇରଖିଛି । ପାଦ ଚିପି ଚିପି କେମିତି ନିରଞ୍ଜନଙ୍କ ଘରେ ଚୋର ପଶୁଛି । ନିରଞ୍ଜନଙ୍କ ପୁଅ ଦେବଜ୍ୟୋତିଙ୍କ ମାଷ୍ଟର ବେଡରୁମ୍ । ସିଧା ସେଇଠି ପହଞ୍ଚି ଯାଇଛି ଚୋର ଆଉ ଆଖିବୁଜି ଆଲମାରୀ ଖୋଲି ଚଳାଇଛି ମିଶନ୍ ଲୁଟ୍ । ଏଭଳି ପ୍ରାୟ ଘଣ୍ଟାଏ ଧରି ଘର ଭିତରୁ ଲୁଟପାଟ୍ ସାରି ରାତି ପ୍ରାୟ ୩ଟାବେଳେ ଇମର୍ଜେନସି ଏକଜିଟ୍ ଭଳି ଥିବା ଯେଉଁ ସରୁ ବାଟ ଦେଇ ପଶିଥିଲା, ସେହି ବାଟଦେଇ ଖସିଯାଇଛି ଆରାମରେ ।
ତେବେ ଘରେ ନିୟୋଜିତ ସିକ୍ୟୁରିଟି ଗାର୍ଡ ଏବଂ ଫାଷ୍ଟଫ୍ଲୋରରେ ଶୋଇପଡ଼ିଥିବା ନିରଞ୍ଜନ କେମିତି ଜାଣିପାରିଲେନି ? ଚାରିଆଡ଼େ ସିସିଟିଭି ଏବଂ ସିକ୍ୟୁରିଟି ଗାର୍ଡ ଥିବା ଜାଣି ବି ଜଣେ ଭିଭିଆଇପିଙ୍କ ଘରେ ପଶିବାକୁ ଚୋର ଏତେବଡ଼ ସାହସ କଲା କେମିତି ? ସାଧାରଣତନ୍ତ୍ର ଦିବସ ପାଇଁ ରାତି ତମାମ୍ ସହର ସାରା ପୋଲିସ ପଇଁତରା ମାରୁଥିବା ଜାଣି ବି ନିର୍ଭୟରେ ଘଣ୍ଟାଏ ଧରି ନିରଞ୍ଜନଙ୍କ ଘରେ କେମିତି ରଚିପାରିଲା ଏତେବଡ଼ ମିଶନ୍ ? ଏଭଳି ନାନା ପ୍ରଶ୍ନ ଭିତରେ ପୋଲିସ କମିଶନର, ଉଭୟ କଟକ ଓ ଭୁବନେଶ୍ବର ଡିସିପି ପହଞ୍ଚି ଖୋଳତାଡ଼ ଚଳାଇଛନ୍ତି। କହିଛନ୍ତି, ସୁରାଗ୍ ମିଳିଛି। ଖୁବଶୀଘ୍ର ଚୋର ଧରାପଡ଼ିବ। ଏହି ଘଟଣାକୁ ନେଇ ମୁଖ୍ୟମନ୍ତ୍ରୀ ମଧ୍ୟ ଉଦବେଗ ପ୍ରକାଶ କରିବା ସହ ଫୋନ କରି ନିରଞ୍ଜନ ପଟ୍ଟନାୟକଙ୍କ ସହ କଥା ହୋଇଛନ୍ତି ।