BJD Executive Committee Tensions: ନବୀନଙ୍କ ତଣ୍ଟିରେ କାର୍ଯ୍ୟକାରିଣୀ କମିଟି କଣ୍ଟା, ବିଦ୍ରୋହ ଡରରେ ଟେନସନରେ ବିଜେଡି ମୁଖିଆ

ଟିମ୍ ଗଢିପାରୁ ନାହାନ୍ତି ନବୀନ । ତଣ୍ଟିରେ ଲାଗିଛି କାର୍ଯ୍ୟକାରିଣୀ କଣ୍ଟା । ୮୧ ଜଣିଆ ଏକ୍‌ଜିକ୍ୟୁଟିଭ୍ କମିଟିରେ କାହାକୁ ସ୍ଥାନ ଦେବେ, କାହାକୁ ବାଦ ଦେବେ ତାକୁ ନେଇ ଟେନସନରେ ମୁଖିଆ । କାହିଁକି ନା ଅସନ୍ତୁଷ୍ଟ ବାଦ୍ ପଡ଼ିଲେ ବିଦ୍ରୋହ ଅଧିକ ହେବାର ଆଶଙ୍କା ରହିଛି । ଅମାନିଆ ନେତା ଆଉ ଆଗଭଳି ସୁପ୍ରିମୋଙ୍କ ନାଲି ଆଖିକୁ ଭୟ କରୁନାହାନ୍ତି । ସେପଟେ ନବୀନ ଚୂଡାନ୍ତ ନିଷ୍ପତ୍ତି ନେବା ପୂର୍ବରୁ ଆଜି ବରିଷ୍ଠ ନେତାଙ୍କ ସହ କରିଛନ୍ତି ରୁଦ୍ଧଦ୍ବାର ବୈଠକ ।

ଅଧିକ ପଢ଼ନ୍ତୁ: ରାଜନୀତିରୁ ସନ୍ୟାସ ନେଲେ କି ରଘୁନନ୍ଦନ? କହିଲେ...

ଛିଡୁନି ବିଜେଡି ଅଙ୍କ । ସ୍ଥିତି ଅଧିକ ଗୋଳମାଳିଆ । ବରିଷ୍ଠ ନେତାଙ୍କୁ ନେଇ ନବୀନଙ୍କ ବୈଠକ । ଦଳ ଭିତରେ ଛକାପଞ୍ଝା । ନବମ ଥର ଲାଗି ନବୀନ ସଭାପତି ଭାବେ ନିର୍ବାଚିତ ହେବା ପରେ ବି ବିଚ୍ଛୁରିତ ଅବସ୍ଥାରେ ସଂଗଠନ । ନା ଗଢିହେଉଛି କାର୍ଯ୍ୟକାରିଣୀ ନା ଛାମୁଆ ସଂଗଠନ । କାର୍ଯ୍ୟକାରିଣୀ ଗଢାଯାଇ ପାରୁନଥିବାରୁ ଆଜି ନବୀନ ନିବାସରେ ନବୀନ, ବରିଷ୍ଠଙ୍କ ସହ ଆଲୋଚନା କରିଛନ୍ତି । ପ୍ରାୟ ଘଣ୍ଟାଏ ଧରି ଆଲୋଚନା କରି ଫେରିଥିଲେ ନେତା । ତେବେ ବୈଠକରେ ଉପସ୍ଥିତ ଥିବା ନେତା କିନ୍ତୁ କାର୍ଯ୍ୟକାରିଣୀ ସଂପର୍କରେ ଆଦୌ ମୁହଁ ଖୋଲି ନାହାନ୍ତି । ଯାହା ଚର୍ଚ୍ଚାକୁ ଅଧିକ ଖୋରାକ୍ ଯୋଗାଇଛି । ତାଳି ପକାଇ ଦଳର ନେତା କହୁଛନ୍ତି ଠିକ୍ ସମୟରେ କାର୍ଯ୍ୟକାରିଣୀ ଓ ଛାମୁଆ ସଂଗଠନ ସହ ରାଜ୍ୟ କମିଟି ଘୋଷଣା ହେବ। ଦଳରେ କେହି ଅସନ୍ତୁଷ୍ଟ ନାହାନ୍ତି ।

ବିଶ୍ବସ୍ତ ସୂତ୍ରରୁ ମିଳିଥିବା ସୂଚନା ଅନୁଯାୟୀ ଏହି ବରିଷ୍ଠ ନେତାମାନେ ନବୀନଙ୍କୁ ନିଜ ଆଡୁ ଭେଟିଛନ୍ତି । ଅସନ୍ତୁଷ୍ଟ ବରିଷ୍ଠ ଓ ଯୁବ ନେତାଙ୍କୁ କାର୍ଯ୍ୟକାରିଣୀରୁ ବର୍ତ୍ତମାନ ସ୍ଥିତିରେ ବାଦ ନ ଦେବାକୁ ପରାମର୍ଶ ଦେଇଛନ୍ତି । ବାଦ୍ ଦେଲେ ଦଳ ଅଧିକ କ୍ଷତିଗ୍ରସ୍ତ ହେବ ବୋଲି ବୁଝାଇଛନ୍ତି । ପୂର୍ବରୁ ୱକ୍‌ଫ ପ୍ରସଙ୍ଗରେ ପାଣ୍ଡିଆନଙ୍କୁ ଟାର୍ଗେଟ୍ କରିଥିବା ସାଂସଦ ଦେବାଶିଷ ସାମନ୍ତରାୟଙ୍କୁ ନିଲମ୍ବନ ପାଇଁ ସଜବାଜ ନିଷ୍ପତ୍ତି ବରିଷ୍ଠଙ୍କ ବିରୋଧ ପାଇଁ ସ୍ଥଗିତ ରହିଥିଲା । ଆଉ ଏବେ ବରିଷ୍ଠଙ୍କୁ କାର୍ଯ୍ୟକାରିଣୀରୁ ବାଦ୍ ନିଷ୍ପତ୍ତିକୁ ବିରୋଧ । ଏଠି ପ୍ରଶ୍ନ ବିଜେଡିରେ ପ୍ରକୃତରେ ନିଷ୍ପତ୍ତି ନେଉଛି କିଏ ? ନବୀନ କ’ଣ ଏହି ନିଷ୍ପତ୍ତି ଏକାକି ନେଲେ ନା ଏହା ପଛରେ ଦ୍ବିତୀୟ କ୍ଷମତା କେନ୍ଦ୍ର ? ସେପଟେ ଦଳ ଛାଡିଥିବା ଅମର ଶତପଥୀ ବିସ୍ଫୋରକ ବୟାନ ଦେଇ କହିଛନ୍ତି ବିଜେଡିରେ ଗଣତନ୍ତ୍ର ନଥିବା କଥା ମୁଁ ପ୍ରଥମେ କହିଥିଲି, ଏବେ ଅନ୍ୟମାନେ କହୁଛନ୍ତି । ଦଳ ମୁଖ୍ୟ ଲକ୍ଷ୍ୟ ଠାରୁ ଦୂରରେ, ଯେଉଁଥିପାଇଁ ଦଳ ପ୍ରତିଦିନ ଛିଡୁଛି ।

ଦେବୀ, ବବି, ଅରୁଣ, ଅତନୁ, ସଞ୍ଜୟ, ପ୍ରତାପ ଦେବ ଓ ପ୍ରତାପ ଜେନା । ବିଜେଡିର ଇଏ ହେଉଛନ୍ତି ସପ୍ତରଥୀ । ପୂର୍ବରୁ ଏମାନଙ୍କ ଉପରେ ନବୀନ ନିର୍ଭର କରୁଥିଲେ, ଆଉ ଏବେବି ଏମାନଙ୍କ ଗୁରୁତ୍ବ ରହିଛି । ଯେଉଁଥିପାଇଁ ଅନ୍ୟ ନେତାଙ୍କ ଭିତରେ ପ୍ରବଳ ବିଦ୍ରୋହ ଦେଖାଦେଉଛି । ଦେଖିବାର କଥା ହେଉଛି ରାଜ୍ୟ କାରିଣୀ ଗଠନ ପରେ ବିଜେଡିରେ କନ୍ଦଳ ଥମୁଛି ନା ଆହୁରି ତୀବ୍ର ହେଉଛି ।

ଅଧିକ ପଢ଼ନ୍ତୁ: କାହିଁକି ଘୋଷଣା ହେଲାନି ବିଜେଡି କାର୍ଯ୍ୟକାରିଣୀ କମିଟି ? ବିଦ୍ରୋହ ଆଶଙ୍କାରେ ଚାପି ଦେଲେ କି ତାଲିକା?