ସାଧାରଣ ନିର୍ବାଚନକୁ ୮ ମାସ ବିତି, ବିଜେଡିରେ ସାଙ୍ଗଠନିକ ନିର୍ବାଚନ ପାଇଁ ଦଳ ପ୍ରସ୍ତୁତ ହେଲାଣି । କିନ୍ତୁ ଏବେ ବି ପରାଜୟକୁ ଗ୍ରହଣ କରିପାରୁନାହାନ୍ତି ଦଳର କିଛି ପୁରୁଖା ନେତା । ନିତି ନୂଆ ନୂଆ କାରଣ ଆଣି ଦଳକୁ ଅଡୁଆରେ ପକାଉଛନ୍ତି । ଗତକାଲି ଟିକେଟ ବଣ୍ଟନ ଭୁଲ୍ ନିଷ୍ପତ୍ତି ପାଇଁ ବିଜେଡି ହାରିଲା ବୋଲି ପୂର୍ବତନ ସାଂସଦ ମହେଶ ସାହୁ କହିବା ପରେ ଆଜି ତାଙ୍କ କଥାକୁ ପରୋକ୍ଷରେ ସମର୍ଥନ ଜଣାଇଛନ୍ତି ଭୂପିନ୍ଦର ସିଂ ।
Also Read
ବିଜେଡି ପରାଜୟ ନେଇ ଜଣଙ୍କ ପରେ ଜଣେ ବରିଷ୍ଠ ନେତା ମୁହଁ ଖୋଲିବା ପରେ ଗତକାଲି ମହେଶ ସାହୁ ଆଉ ଆଜି ଭୂପିନ୍ଦର ସିଂ ବି ହାରିବା କାରଣ ବଖାଣିଛନ୍ତି । ଦଳର ପରାଜୟ ପଛରେ ଭୁଲ୍ ଟିକେଟ ବଣ୍ଟନ ବ୍ୟବସ୍ଥା ବୋଲି ଦାବି କରିଛନ୍ତି ପୂର୍ବତନ ସାଂସଦ ମହେଶ ସାହୁ। ସମ୍ବଲପୁରରୁ ସଂଗଠନ ସଂପାଦକ ପ୍ରଣବ ପ୍ରକାଶ ଦାସଙ୍କ ଲଢିବା ନିଷ୍ପତ୍ତି ଭୁଲ୍ ଥିଲା, ଯାଜପୁରରେ ଲଢିଥିଲେ ଅଧିକ ଲାଭ ହୋଇଥାନ୍ତା । ଏମିତି କି ଉପକୂଳରେ ୧୦ରୁ ୧୨ ସିଟ୍ ହାତେଇ ସରକାର ହୋଇପାରିଥାନ୍ତା ବୋଲି କହିଥିଲେ ମହେଶ ।
ଅଧିକ ପଢ଼ନ୍ତୁ: ଗ୍ରାଉଣ୍ଡରେ କେତେ ପହଞ୍ଚୁଛି ସରକାରଙ୍କ ଯୋଜନା? ସ୍ଥିତି ପରଖିବାକୁ ଗାଁକୁ ଯିବେ ବାବୁ
ତାଙ୍କ କଥାକୁ ପରୋକ୍ଷରେ ସ୍ୱୀକାର କରି ଆଜି ବରିଷ୍ଠ ବିଜେଡି ନେତା ଭୂପିନ୍ଦର ସିଂ କହିଛନ୍ତି, ଯାହା ଭୁଲ୍ ଅଛି ତାକୁ ସୁଧାରିବାର ସମୟ ଆସିଛି । ଗଣତନ୍ତ୍ରରେ ଲୋକ କାହାକୁ ପସନ୍ଦ କରୁଛନ୍ତି, ତାକୁ ଆଖି ଆଗରେ ନିଷ୍ପତ୍ତି ନେବାର ଆବଶ୍ୟକତା ରହିଛି । ଲୋକ କାହାକୁ ଚାହୁଁଛନ୍ତି ତାଙ୍କର ପ୍ରାର୍ଥୀ ହେବା ପାଇଁ ସେ ଦିଗକୁ ଆସନ୍ତା ଦିନରେ ଦଳର ନେତୃତ୍ୱ ଗୁରୁତ୍ୱ ଦେବ । ଯାହା ବି ତ୍ରୁଟି ରହିଲା ସେ ସଂପର୍କରେ ଦଳର ନେତାମାନେ ସୂଚନା ଦେଇ ସାରିଛନ୍ତି।
ଏଠି ପ୍ରଶ୍ନ ଉଠୁଛି ବିଜେଡିରେ ଟିକେଟ ବାଣ୍ଟୁଥିଲା କିଏ ? ଏଥିପାଇଁ କାହାକୁ ନିଶାନା କରୁଛନ୍ତି ନେତା ? କିଏ ନେଲା ଏମିତି ଭୁଲ ନିଷ୍ପତ୍ତି ? ସୁପ୍ରିମୋ ନବୀନ ନା ଆଉ କିଏ ? କୁହାଯାଏ ୨୪ ନିର୍ବାଚନରେ ନବୀନଙ୍କୁ ଆଢୁଆଳରେ ରଖି ସବୁ ନିଷ୍ପତ୍ତି ନେଉଥିଲେ ଦଳର ଦ୍ୱିତୀୟ କ୍ଷମତା କେନ୍ଦ୍ର ଭି.କେ. ପାଣ୍ଡିଆନ । ତେଣୁ ଭୁଲ ଟିକେଟ ବଣ୍ଟନ ପଛରେ ପାଣ୍ଡିଆନଙ୍କୁ ନିଶାନା କି ? ରାଜନୈତିକ ସମୀକ୍ଷକଙ୍କ ମତରେ ଟିକେଟ ବଣ୍ଟନରେ ଓଭର କନ୍ଫିଡେଣ୍ଟ ବିଜେଡି ପରାଜୟର ଏକ ବଡ଼ କାରଣ ।
ଯଦିଓ ପରାଜୟ ନେଇ ଅନେକ ନେତା ଦଳ ଭିତରେ ଏବଂ ବାହାରେ ମୁହଁ ଖୋଲୁଛନ୍ତି କିନ୍ତୁ ଏ ଯାଏଁ ପରାଜୟର ବିଧିବଦ୍ଧ ସମୀକ୍ଷା କରିପାରୁନାହାନ୍ତି ସୁପ୍ରିମୋ । କୁହାଯାଉଛି ପରାଜୟର କାରଣ କୁହାଯାଉଥିବା ଗ୍ରୁପ୍ ଏବେ ବି ଦଳକୁ କବଜାରେ ରଖିଛନ୍ତି । ଆଉ ତାଙ୍କୁ ସୁରକ୍ଷା ଦେବାକୁ ଯାଇ ପରାଜୟ ପୋଷ୍ଟମର୍ଟମ କରିବାକୁ ଏଡାଇ ଯାଇଥିଲେ ବି ଦଳର ବରିଷ୍ଠ ନେତାମାନେ ପରାଜୟକୁ ଗ୍ରହଣ ନକରିପାରି ମଝିରେ ମଝିରେ ଏମିତି ବାଣ ମାରୁଛନ୍ତି ।