Traffic Challan : ହେଲମେଟ ପିନ୍ଧିନଥିବାରୁ ୧୦ଲକ୍ଷ ୫୦୦ ଟଙ୍କାର ଚାଲାଣ କାଟିଲା ପୋଲିସ୍

ଟ୍ରାଫିକ୍ ନିୟମ ନମାନି ହଟହଟା ହେଲେ ଚାଳକ । ଟ୍ରାଫିକ୍ ନିୟମ ମାନୁନଥିଲେ ହୋଇଯା'ନ୍ତୁ ସାବଧାନ । କାରଣ ହେଲମେଟ ନପିନ୍ଧିଥିବାରୁ ଜଣେ ଆଇନ ଛାତ୍ରଙ୍କଠାରୁ ୧୦ ଲକ୍ଷରୁ ଉର୍ଦ୍ଧ୍ବ ଟଙ୍କାର ଚାଲାଣ କାଟିଛି ପୋଲିସ । ଗୁଜୁରାଟ ଅହମ୍ମଦାବାଦରୁ ଆସିଛି ଏଭଳି ଅଭାବନୀୟ ଘଟଣା । ଟ୍ରାଫିକ୍ ନିୟମକୁ ଉଲ୍ଲଙ୍ଘନକରି ହେଲମେଟ ପିନ୍ଧିନଥିବାରୁ ଅନିଲ ନାମକ ଜଣେ ଯୁବକଙ୍କ ଠାରୁ ୧୦ ଲକ୍ଷ ୫୦୦ ଟଙ୍କାର ଜରିମାନା କଟାଯାଇଛି ।

ସମ୍ପୃକ୍ତ ଛାତ୍ର ଜଣକ ଶାନ୍ତିପୁର ଟ୍ରାଫିକ ଛକରେ ବିନା ହେଲମେଟରେ ଯାତ୍ରା କରୁଥିଲେ । ତେଣୁ ଅନିଲଙ୍କୁ ଅଟକାଇଥିଲା ଟ୍ରାଫିକ୍ ପୋଲିସ୍। ପରେ ଟ୍ରାଫିକ ପୋଲିସ ଅନିଲଙ୍କର ଡ୍ରାଇଭିଂ ଲାଇସେନ୍ସ ଏବଂ ଅନ୍ୟାନ୍ୟ ଡକ୍ୟୁମେଣ୍ଟ ଯାଞ୍ଚ କରିଥିଲା । ଏହାପରେ ଅନିଲଙ୍କୁ ଛାଡି ଦିଆଯାଇଥିଲା । କିଛି ସମୟ ପରେ ଜରିମାନା ପାଇଁ ଅନିଲଙ୍କ ପାଖକୁ ମେସେଜ ଯାଇଥିଲା ।

ଅନିଲ ମେସେଜ ଦେଖିବା ପରେ ଥାନାର ଦ୍ବାରସ୍ଥ ହୋଇଥିଲେ । କାରଣ ୫୦୦ ଟଙ୍କା ବଦଳରେ ୧୦ ଲକ୍ଷ ୫୦୦ ଟଙ୍କାର ଜରିମାନା କଟାଯାଇଥିଲା । ଏହି ଘଟଣାକୁ ପ୍ରାୟ ୧୧ମାସ ବିତିଯାଇଥିଲେ ମଧ୍ୟ ଆଜି ଯାଏଁ କୌଣସି ସମାଧାନ ହୋଇପାରିନାହିଁ । ଅନିଲ ଆଇନ ବିଭାଗର ଚତୁର୍ଥ ସେମିଷ୍ଟାରର ଛାତ୍ର ହୋଇଥିବା ବେଳେ ତାଙ୍କ ବାପା ଜଣେ କ୍ଷୁଦ୍ର ବ୍ୟବସାୟୀ ।

ଅନିଲଙ୍କ କହିବାନୁଯାୟୀ, ସେ ଘରର ଖର୍ଚ୍ଚ ଉଠାଇବା ପାଇଁ ନିଜ ଘରଠାରୁ କିଛି ଦୂରରେ ଗୋଟିଏ ପାନ ଦୋକାନ କରିଛନ୍ତି । ୧୧ ଏପ୍ରିଲ ୨୦୨୪ ସନ୍ଧ୍ୟା ସମୟରେ ତାଙ୍କ ଆକ୍ଟିଭାରେ ଜିନିଷ ଲୋଡ୍ କରି ଗନ୍ତବ୍ୟ ସ୍ତଳକୁ ଯାଉଥିଲେ । ଶାନ୍ତିପୁର ଟ୍ରାଫିକ ଛକରେ ଟ୍ରାଫିକ ପୋଲିସ ତାଙ୍କୁ ଅଟକାଇଥିଲା ଏବଂ ଗାଡିର କାଗଜପତ୍ର ଯାଞ୍ଚ କରି ଅନିଲଙ୍କୁ ଛାଡିଦେଇଥିଲା । କିନ୍ତୁ ସେ ଘରେ ପହଞ୍ଚିବା ପରେ ତାଙ୍କ ମୋବାଇଲକୁ ଜରିମାନା କଟାଯାଇଥିବାର ଏକ ମେସେଜ ଆସିଥିଲା ।

ଅଧିକ ପଢ଼ନ୍ତୁ: ଧନୀ ଲୋକଙ୍କୁ ପସନ୍ଦ ଆସୁନି କି ନିଜ ଦେଶ...୨୨ ପ୍ରତିଶତ ଲୋକ ଭାରତ ଛାଡ଼ିବାକୁ ଚାହାନ୍ତି

ଏହାପରେ ଅନିଲ ଏବଂ ତାଙ୍କ ବାପା ଉଭୟେ ମିଶି ପୋଲିସ କମିଶନରଙ୍କ କାର୍ଯ୍ୟାଳୟରେ ପହଞ୍ଚିଥିଲେ । ଅନିଲ କାହିଁକି ଚାଲାଣ କଟାଯାଇଛି ବୋଲି ପୋଲିସଙ୍କୁ ପ୍ରଶ୍ନ କରିଥିଲେ । ପୋଲିସ କର୍ମୀମାନେ ତାଙ୍କ ଠାରୁ ପ୍ରଥମେ ଚାଲାଣ ନେବାକୁ ମନା କରିଥିଲେ ଏବଂ ଅନଲାଇନ୍ ମାଧ୍ୟମରେ ଚାଲାଣ କାଟିବାକୁ କହିଥିଲେ । କିନ୍ତୁ ସେ ପରେ ଜାଣିବାକୁ ପାଇଲେ ଯେ ତାଙ୍କୁ ୧୦ଲକ୍ଷ ୫୦୦ ଟଙ୍କାର ଜୋରିମାନା ଲାଗିଛି ।

ଅପରପକ୍ଷରେ ଦଣ୍ଡ ପାଇଁ ୫୦୦ଟଙ୍କା ଚାଲାଣ ବଦଳରେ କିନ୍ତୁ ୧୦ଲକ୍ଷ ୫୦୦ ଟଙ୍କାର ଜୋରିମାନା କଟାଯାଇଛି । ଭୁଲବଶତଃ ଅଧିକ ଟଙ୍କା ଚାଲାଣ କରାଯାଇଥିବାରୁ, ସଂଶୋଧନ ପାଇଁ ଅନେକ ଥର ମିର୍ଜାପୁର କୋର୍ଟରେ ପହଞ୍ଚିଥିଲେ ଅନିଲ । ତାଙ୍କ ଚାଲାଣକୁ ବାତିଲ କରିବା ପାଇଁ ଇ-ଚାଲାଣ ବିଭାଗକୁ ଅନୁରୋଧ ମଧ୍ୟ କରିଥିଲେ । ତାଙ୍କୁ ଇମେଲ ମାଧ୍ୟମରେ ସମସ୍ୟାର ସମାଧାନ ପାଇଁ ଆବେଦନ କରିବାକୁ ପରାମର୍ଶ ଦିଆଯାଇଥିଲା । କିନ୍ତୁ ସମସ୍ୟାର ସମାଧାନ ଆଜି ପର୍ଯ୍ୟନ୍ତ ହୋଇପାରିନାହିଁ ।

ତେବେ ଛାତ୍ର ଜଣକ ଏତେ ବଡ ଅର୍ଥ ରାଶି ଦେବା ପାଇଁ ସକ୍ଷମ ନୁହନ୍ତି ବୋଲି କହିଛନ୍ତି । ଏତେ ମୋଟା ଅର୍ଥରାଶିର ଚାଲାଣ ତାଙ୍କୁ ଏବଂ ତାଙ୍କ ପରିବାରକୁ ଶକ୍ତ ଝଟକା ଦେଇଛି । ଅର୍ଥରାଶିକୁ ନବଢାଇ ପୋଲିସ କର୍ମୀ ଭୁଲକୁ ସଂଶୋଧନ କରିବେ ବୋଲି ଆଶାବାଦୀ ରହିଛନ୍ତି ଅନିଲ ।

ଏହି ମାମଲାରେ ଅହମ୍ମଦାବାଦ ସହରର ଟ୍ରାଫିକ୍ ଯୁଗ୍ମ ପୋଲିସ କମିଶନର (ଜେସିପି) ଏନଏନ ଚୌଧୁରୀ କହିଛନ୍ତି 'ଏହି ମାମଲା କିଛି ଦିନ ପୂର୍ବରୁ ଆମ ପାଖକୁ ଆସିଥିଲା । ଯେହେତୁ ନିର୍ଦ୍ଧାରିତ ସମୟ ମଧ୍ୟରେ ଜରିମାନା ପୈଠ କରାଯାଇନଥିଲା, ତେଣୁ ଏହାକୁ କୋର୍ଟକୁ ପଠାଯାଇଥିଲା । ଏହା ଏକ ଟାଇପିଂ ଭୁଲ୍ ହୋଇଥାଇପାରେ, ଯାହା ୫୦୦ ଟଙ୍କାକୁ ୧୦,୦୦,୫୦୦ ଟଙ୍କାରେ ପରିଣତ କରିଥାଇପାରେ ।'

ଅଧିକ ପଢ଼ନ୍ତୁ: ନିଜେ କରିଥିବା ଭୁଲ୍ ପାଇଁ ପସ୍ତେଇଲେ ମହମ୍ମଦ ୟୁନୁସ : ସାହାଯ୍ୟ ପାଇଁ ଭାରତ ପାଖରେ ପତେଇଲେ ହାତ