LIVE TV
ବେଦ, ଉପନିଷଦ, ପୁରାଣଶାସ୍ତ୍ର ପାଇଁ ସମଗ୍ର ବିଶ୍ୱରେ ପୂଜିତ ଆମ ଦେଶ ଭାରତ । ଯୋଗ ଓ ଧ୍ୟାନର ଦେଶ ହେଉଛି ଭାରତ, ଯେଉଁ ଠାରେ ଶାନ୍ତିର ଦୂତ ଗୌତମ ବୁଦ୍ଧଙ୍କ ଜନ୍ମ । ଜ୍ଞାନ ହେଉକି ବିଜ୍ଞାନ ସବୁଥିରେ ଆଗରେ.. ବିବିଧତା ଭିତରେ ଏକତାର ନିଦର୍ଶନ ହେଉଛି ଭାରତ। ବହୁ ଉପାଦାନରେ ଗଢ଼ା ଏହାର କଳା ସଂସ୍କୃତି। ଯେଉଁଥିରେ ଭାରତର ଦୀର୍ଘ ଇତିହାସ, ଅଦ୍ବିତୀୟ ଭୂଗୋଳ ଏବଂ ସିନ୍ଧୁ-ଘାଟୀର ପ୍ରାଚୀନ ସଭ୍ୟତା ସାମିଲ । ଏକ ସଶକ୍ତ, ସମୃଦ୍ଧ ଦେଶ ଭାବେ ମଧ୍ୟ ଚାରିଆଡ଼େ ପରିଚିତ ।
ଭାରତ ହେଉଛି ପୃଥିବୀର ସବୁଠାରୁ ବଡ଼ ଗଣତାନ୍ତ୍ରିକ ଦେଶ । ଭାରତର ସଂସ୍କୃତ ଭାଷା ପୃଥିବୀର ସବୁ ଭାଷାଠାରୁ ପ୍ରାଚୀନ ଭାଷା ଭାବେ ପରିଚିତ। ବିଶ୍ୱର ସର୍ବପ୍ରଥମ ବିଶ୍ୱ ବିଦ୍ୟାଳୟ ନାଳନ୍ଦା ଭାରତର ତକ୍ଷଶୀଳାରେ ଥିଲା, ଯାହାକି ଖ୍ରୀ.ପୂ. ୭୦୦ରେ ନିର୍ମିତ ହୋଇଥିଲା। କେବଳ ଏତିକି ନୁହେଁ ଭାରତ ହେଉଛି ପୃଥିବୀର ସବୁଠାରୁ ଅଧିକ ଡାକଘର ଥିବା ଦେଶ। ଏହାବାଦ୍ ବି ଆହୁରି ଅନେକ କିଛି ଅଛି ଯାହା ପ୍ରମାଣିତ କରେ ଯେ କୋଟିକରେ ଗୋଟିଏ ହେଉଛି ଭାରତ ।
ହେଲେ ବିଡ଼ମ୍ବନାର ବିଷୟ ଭାରତୀୟ ଧନାଢ଼୍ୟ ବ୍ୟକ୍ତିମାନେ ଏବେ ଦେଶରେ ରହିବାକୁ ପସନ୍ଦ କରୁନାହାନ୍ତି । ଏଇଠାରେ ଜନ୍ମ ଆଉ ଏଇ ମାଟି ପାଣି ପବନରେ ବଡ଼ ହୋଇଥିଲେ ସୁଦ୍ଧା ଲୋକେ ବିଦେଶମୁହାଁ ହେଉଛନ୍ତି । ଏହି ଦେଶରେ ରୋଜଗାର କରି ଟଙ୍କା, ସମ୍ମାନ ଓ ଆଭିଜାତ୍ୟ ହାସଲ ପରେ ସେମାନଙ୍କୁ ଆଉ ଭାରତ ଭଲଲାଗୁନି । ଅନେକ ସଂଖ୍ୟାରେ ଭାରତୀୟ ଦେଶ ଛାଡ଼ି ବିଦେଶରେ ସବୁଦିନ ରହିବା ପାଇଁ ନିଷ୍ପତ୍ତି ନେଉଛନ୍ତି । ଏହା ପଛରେ ରହିଛି ଉତ୍ତମ ଜୀବନ, ଭଲ ଶିକ୍ଷା ଏବଂ ବ୍ୟବସାୟ କରିବାର ସୁଯୋଗ ଭଳି କାରଣ । ଏକ ସର୍ଭେରୁ ଜଣାପଡିଛି, ଆମେରିକା, ବ୍ରିଟେନ, ଅଷ୍ଟ୍ରେଲିଆ, କାନାଡା ଏବଂ ୟୁଏଇ ସେମାନଙ୍କର ପ୍ରିୟ ସ୍ଥାନ ହୋଇପାରିଛି । ପ୍ରତିବର୍ଷ ପ୍ରାୟ ୨୫ ଲକ୍ଷ ଭାରତୀୟ ଅନ୍ୟ ଦେଶକୁ ପ୍ରବାସ କରନ୍ତି।
Also Read
ଏକ ସର୍ବେକ୍ଷଣରୁ ଜଣାପଡିଛି ଯେ ବହୁ ସଂଖ୍ୟକ ଧନୀ ଭାରତୀୟ ବିଦେଶରେ ବସବାସ କରିବାକୁ ଚିନ୍ତା କରୁଛନ୍ତି। କୋଟାକ୍ ପ୍ରାଇଭେଟ ଏବଂ ଋଣ ନାମକ କମ୍ପାନୀ ମିଳିତ ଭାବେ ଏହି ସର୍ଭେ କରିଥିଲେ । ଏହି ସର୍ଭେରେ ୧୫୦ ଧନୀ ବ୍ୟକ୍ତିଙ୍କ ସହ ଆଲୋଚନା ହୋଇଥିଲା । ଏଥିରୁ ଜଣାପଡ଼ିଛି ଦେଶର ଅତି କମରେ ୨୨% ଧନୀ ଲୋକ ଏବେ ବିଦେଶରେ ବସବାସ କରିବାକୁ ଚାହୁଁଛନ୍ତି।
କାହିଁକି ଦେଶ ଛାଡ଼ୁଛନ୍ତି ଭାରତୀୟ ?
ବିଦେଶ ଯିବାର ଅନେକ କାରଣ ରହିଛି । କିଛି ଲୋକଙ୍କ ଅନୁସାରେ ବିଦେଶରେ ଜୀବନଶୈଳୀ ଉନ୍ନତ । ପରମ୍ପରାଗତ ରୂପରେ କମ ଶୁଳ୍କ ,ଆର୍ଥିକ ଅବସର, ରାଜନୈତିକ ସ୍ଥିରତା ଆଦି କୋଟିପତିଙ୍କ ଦେଶ ଛାଡ଼ିବାର ମୁଖ୍ୟ କାରଣ । ତେବେ ହେନଲେ ଆଣ୍ଡ ପାର୍ଟନର୍ସ ୨୦୨୪ ରିପୋର୍ଟ ଅନୁସାରେ ମୌଳିକ ସୁବିଧା ସୁଯୋଗ ବିକଶିତ ହେଉଛି । ଜୀବନର ଗୁଣବତ୍ତା, ପିଲାମାନଙ୍କ ପାଇଁ ଶିକ୍ଷାଗତ ସୁଯୋଗ ଏବଂ ଜଳବାୟୁ ପରିବର୍ତ୍ତନ ପାଇଁ ସ୍ଥିରତା ମଧ୍ୟ ବିଚାରକୁ ନିଆଯାଇପାରେ । ସେହିପରି ଗତ ଦଶନ୍ଧିରେ ଖାଦ୍ୟ ସାମଗ୍ରୀର ମୂଲ୍ୟ ଦ୍ବିଗୁଣିତ ହୋଇଛି । ତେବେ କୌଣସି ବି ଦେଶରେ ଅତ୍ୟାବଶ୍ୟକ ସାମଗ୍ରୀର ମୂଲ୍ୟ ବୃଦ୍ଧି ଓ ହ୍ରାସ ସାଧାରଣ ।
କିନ୍ତୁ ଯେତେବେଳେ ଲୋକେ ଅନୁଭବ କରନ୍ତି ଯେ ସେମାନଙ୍କର ଆୟ ସହିତ ବୃଦ୍ଧି ପାଉଥିବା ମୁଦ୍ରାସ୍ଫୀତିକୁ ପୂରଣ କରିବା କଷ୍ଟସାଧ୍ୟ, ସେତେବେଳେ ସେମାନଙ୍କର ଚିନ୍ତାଧାରାରେ ପରିବର୍ତ୍ତନ ଆସିଥାଏ । ଅତିରିକ୍ତ ଭାବରେ ଭବିଷ୍ୟତ ପିଢ଼ି ପାଇଁ ଧନ ରକ୍ଷା କରିବାର କ୍ଷମତା ଏକ ଚିନ୍ତାର ବିଷୟ । ୟୁଏଇ ପରି ଦେଶ ଗୋଲ୍ଡେନ ଭିସା ଚଳାଉଛି । ଏହା ଧନୀ ଲୋକଙ୍କ ପାଇଁ ସେଠାରେ ବସବାସ କରିବା ସହଜ କରିଥାଏ । ତେଣୁ ଏହି ଦେଶଗୁଡ଼ିକ ଧନୀ ଲୋକଙ୍କର ପସନ୍ଦ ହୋଇପାରିଛି । ଏଥିରୁ ରକ୍ଷା ପାଇବା ପାଇଁ ବିଶେଷ କରି ସ୍ବାସ୍ଥ୍ୟ, ଶିକ୍ଷା କ୍ଷେତ୍ରରେ ସରକାର ଗୁରୁତ୍ବାରୋପ କରିବା ଦରକାର । ଏହି ୨ କ୍ଷେତ୍ରରେ ବହୁଳ ମାତ୍ରାରେ ନିବେଶ କରିବାର ଆବଶ୍ୟକ ରହିଛି । ଏହାସହିତ ସମସ୍ତ ବର୍ଗର ଲୋକଙ୍କ ପାଇଁ ସମାନ ସୁଯୋଗ ସୃଷ୍ଟି କରିବା ଦରକାର ।
୫ଜଣରୁ ଜଣେ ବିଦେଶ ଯିବାକୁ ଚାହାନ୍ତି..!
ସର୍ଭେରେ ସାମିଲ ହୋଇଥିବା ପାଞ୍ଚ ଜଣ ଧନୀ ବ୍ୟକ୍ତିଙ୍କ ମଧ୍ୟରୁ ଜଣେ ବିଦେଶ ଯିବାକୁ ଯୋଜନା କରୁଛନ୍ତି । ଅଧିକାଂଶ ଲୋକ ସେମାନଙ୍କର ଭାରତୀୟ ନାଗରିକତ୍ୱ ଛାଡିବାକୁ ଚାହାଁନ୍ତି ନାହିଁ। ସେମାନେ କେବଳ ଅନ୍ୟ ଦେଶରେ ରହିବାକୁ ଅନୁମତି ଚାହୁଁଛନ୍ତି । ଏହି ସର୍ଭେରେ ଲୋକମାନେ କହିଛନ୍ତି ଯେ ସେମାନେ ନିଜ ଜୀବନରେ ଉନ୍ନତି ଆଣିବାକୁ ଚାହୁଁଛନ୍ତି। ସେମାନେ ଭଲ ସ୍ୱାସ୍ଥ୍ୟ ସେବା, ଉନ୍ନତ ଶିକ୍ଷା ଏବଂ ଏକ ଭଲ ଜୀବନଶୈଳୀ ଚାହୁଁଛନ୍ତି । ଦୁଇ ତୃତୀୟାଂଶରୁ ଅଧିକ ଲୋକ କହିଛନ୍ତି,ବ୍ୟବସାୟ କରିବା ସୁଯୋଗ ମଧ୍ୟ ଏକ ପ୍ରମୁଖ କାରଣ। ସର୍ଭେ କରାଯାଇଥିବା ଲୋକମାନେ ବିଦେଶ ଯିବାକୁ 'ଭବିଷ୍ୟତର ବିନିଯୋଗ' ବୋଲି ବର୍ଣ୍ଣନା କରିଛନ୍ତି। କିଛି ଲୋକଙ୍କ ଅନୁସାରେ ସେମାନେ ନିଜ ପିଲାମାନଙ୍କୁ ଭଲ ଶିକ୍ଷା ଦେବାକୁ ଚାହୁଁଛନ୍ତି। ସେଥିପାଇଁ ସେମାନେ ବିଦେଶ ଯିବାକୁ ପସନ୍ଦ କରୁଛନ୍ତି।
ସରକାରଙ୍କ ପକ୍ଷରୁ ପ୍ରସ୍ତୁତି..
କୋଟାକ୍ ମହିନ୍ଦ୍ରା ବ୍ୟାଙ୍କର ଚେୟାରମ୍ୟାନ୍ କହିଛନ୍ତି, ବିଦେଶ ଯିବା ଯୋଗୁଁ ଦେଶର ଟଙ୍କା ବାହାରକୁ ଚାଲିଯାଉଛି ବୋଲି ଚିନ୍ତା କରିବା ଉଚିତ ନୁହେଁ । ସରକାର ଏପରି ନିୟମ କରିଛନ୍ତି ଯାହା ସୁନିଶ୍ଚିତ କରେ, ଜଣେ ବ୍ୟକ୍ତି ବିଦେଶରେ ବସବାସ କଲେ ମଧ୍ୟ ଅଧିକ ଟଙ୍କା ଦେଶ ବାହାରକୁ ଯାଇପାରିବ ନାହିଁ । ଭାରତରେ ରହୁଥିବା ଯେକୌଣସି ବ୍ୟକ୍ତି ପ୍ରତିବର୍ଷ କେବଳ ୨,୫୦,୦୦୦ ଆମେରିକୀୟ ଡଲାର ବିଦେଶ ପଠାଇ ପାରିବେ । କିନ୍ତୁ, ଯେଉଁମାନେ ବିଦେଶକୁ ଯାଇ ବସବାସ କରନ୍ତି ସେମାନଙ୍କୁ ୧ ମିଲିୟନ ଆମେରିକୀୟ ଡଲାର ପର୍ଯ୍ୟନ୍ତ ପଠାଇବାକୁ ଅନୁମତି ଦିଆଯାଇଛି । ଏହା ସୁନିଶ୍ଚିତ କରେ ମନଇଚ୍ଛା ଟଙ୍କା ବିଦେଶକୁ ପଠାଯାଇ ପାରିବ ନାହିଁ ।
କୁଆଡ଼େ ଯାଉଛନ୍ତି ଧନୀକ ଭାରତୀୟ ?
ଅନ୍ୟ ଦେଶର କୋଟିପତିଙ୍କ ପରି ଭାରତୀୟମାନେ ମଧ୍ୟ ୟୁଏଇକୁ ପସନ୍ଦ କରୁଥିବା ଜଣାପଡିଛି। ୟୁଏଇରେ ବ୍ୟକ୍ତିବିଶେଷଙ୍କ ପାଇଁ ଏକ ଶୂନ ଆୟକର ନୀତି ରହିଛି ଏବଂ ସେଠାରେ ସାମଗ୍ରୀ ଏବଂ ସେବା କ୍ରୟ ଉପରେ ମାତ୍ର ୫ ପ୍ରତିଶତ ମୂଲ୍ୟଯୁକ୍ତ ଟିକସ ଆଦାୟ କରାଯାଏ, ଯାହା କୋଟିପତିଙ୍କ ପାଇଁ ଏକ ପ୍ରମୁଖ ଗନ୍ତବ୍ୟସ୍ଥଳ ପାଲଟିଛି । ୨୦୨୪ ମସିହାରେ ୟୁଏଇକୁ ୬,୭୦୦ ଏଚଏନଆଇ ପହଞ୍ଚିଥିବା ଆକଳନ କରାଯାଉଛି । ଅନ୍ୟ ଲୋକପ୍ରିୟ ବିକଳ୍ପ ମଧ୍ୟରେ ଅଷ୍ଟ୍ରେଲିଆ, ସିଙ୍ଗାପୁର, ଆମେରିକା, ସ୍ୱିଜରଲ୍ୟାଣ୍ଡ ଆଦି ସାମିଲ ଅଛନ୍ତି । ଏହି ଦେଶଗୁଡିକ ଧନୀମାନଙ୍କ ପାଇଁ ଅଧିକ ଗୁରୁତ୍ୱପୂର୍ଣ୍ଣ କାରକ ଗୁଡିକ ପ୍ରଦାନ କରନ୍ତି, ଯେପରିକି ରାଜନୈତିକ ସ୍ଥିରତା, ସ୍ୱଳ୍ପ କର, ଉତ୍କୃଷ୍ଟ ଶିକ୍ଷା ବ୍ୟବସ୍ଥା ଏବଂ ଏକ ଉଚ୍ଚ ଗୁଣର ଜୀବନ ।
ହେନଲେ ଆଣ୍ଡ ପାର୍ଟନର୍ସର ରିପୋର୍ଟ ଅନୁଯାୟୀ, ଚୀନ ଓ ୟୁନାଇଟେଡ କିଙ୍ଗଡମ ପରେ ଭାରତର କୋଟିପତିମାନେ ପ୍ରବାସ ମାମଲାରେ ତୃତୀୟ ଶୀର୍ଷରେ ଅଛନ୍ତି । ୨୦୨୪ରେ ଚୀନରୁ ୧୫,୨୦୦ HNWI ଦେଶ ଛାଡ଼ିଥିଲେ, ଯାହା ଏକ ଦେଶ ପାଇଁ ସର୍ବୋଚ୍ଚ ଅଟେ । ଏହା ଚୀନ୍ ପାଇଁ ଏକ ନୂତନ ରେକର୍ଡ ସଂଭାବନାକୁ ନିଶ୍ଚିତ କରେ । ଗତ କିଛି ବର୍ଷ ମଧ୍ୟରେ ଚୀନରେ ସାଧାରଣ ଧନ ଅଭିବୃଦ୍ଧି ଧୀର ହୋଇଯାଇଛି, ଅର୍ଥାତ୍ ଏହି ପ୍ରବାହ ସାଧାରଣ ଅପେକ୍ଷା ଅଧିକ କ୍ଷତିକାରକ ହୋଇପାରେ । ୨୦୦୦ ରୁ ୨୦୧୭ ପର୍ଯ୍ୟନ୍ତ ଚୀନର ଅର୍ଥନୀତି ଦ୍ରୁତଗତିରେ ବୃଦ୍ଧି ପାଇଥିଲା, କିନ୍ତୁ ସେବେ ଠାରୁ ଦେଶରେ ଧନୀ ଏବଂ କୋଟିପତିଙ୍କ ଅଭିବୃଦ୍ଧି ମନ୍ଥର ହୋଇଗଲା। ଚୀନ ଛାଡୁଥିବା କୋଟିପତିଙ୍କ ପାଇଁ ପାରମ୍ପାରିକ ଭାବରେ ଲୋକପ୍ରିୟ ଗନ୍ତବ୍ୟସ୍ଥଳ ହେଉଛି ସିଙ୍ଗାପୁର, ଆମେରିକା, କାନାଡା ଓ ଜାପାନ ପରି ଦେଶ ।
ରିପୋର୍ଟ ଅନୁଯାୟୀ, ଭାରତୀୟ ଧନୀମାନେ ବିଶେଷ ଭାବରେ ୟୁଏଇକୁ ଯାଇ ବସବାସ କରୁଛନ୍ତି । ହେଲେ ଏହି ସ୍ଥାନାନ୍ତର ଯୋଗୁଁ ଭାରତ କୌଣସି କ୍ଷତି ସହିବ ନାହିଁ । କାରଣ ଦେଶରେ ଦିନକୁ ଦିନ କୋଟିପତିଙ୍କ ସଂଖ୍ୟା ବଢ଼ିବାରେ ଲାଗିଛି । ଏଥିସହ ଭାରତ ଛାଡିଥିବା କୋଟିପତିଙ୍କ ମଧ୍ୟରୁ ଅଧିକାଂଶ ଦେଶରେ ଦ୍ୱିତୀୟ ଘର ରଖିଛନ୍ତି, ଯାହା ଏକ ସକରାତ୍ମକ ସଙ୍କେତ ଅଟେ।"
ରିପୋର୍ଟ ଅନୁଯାୟୀ ଚୀନ୍, ବ୍ରିଟେନ ଏବଂ ଭାରତ ପରେ ବହୁ ସଂଖ୍ୟାରେ କୋଟିପତି ବିଦେଶ ଯାଇଥିବା ଦେଶଗୁଡ଼ିକ ହେଲା ଦକ୍ଷିଣ କୋରିଆ, ଋଷ, ବ୍ରାଜିଲ, ଦକ୍ଷିଣ ଆଫ୍ରିକା, ତାଇୱାନ, ନାଇଜେରିଆ ଏବଂ ଭିଏତନାମ। ଅନ୍ୟପକ୍ଷରେ ଏତେ ସଂଖ୍ୟକ କୋଟିପତି ୟୁଏଇ, ଆମେରିକା, ସିଙ୍ଗାପୁର, କାନାଡା, ଅଷ୍ଟ୍ରେଲିଆ, ଇଟାଲୀ, ସ୍ୱିଜରଲ୍ୟାଣ୍ଡ, ଗ୍ରୀସ୍, ପର୍ତ୍ତୁଗାଲ ଏବଂ ଜାପାନ ପରି ଦେଶକୁ ଯାଇ ବସବାସ କରୁଥିବା ଜଣାପଡ଼ିଛି ।
