Skip Breakfast: ଜାଣନ୍ତୁ କେତେ ସମୟ ଅନ୍ତରରେ ଖାଇବେ...ଖାଦ୍ୟ ଛାଡିଲେ ଶରୀରରେ କ’ଣ ହୁଏ ?

ସକାଳ ଜଳଖିଆ, ମଧ୍ୟାହ୍ନ ଭୋଜନ ଏବଂ ରାତ୍ରୀ ଭୋଜନ କରିବି ନାହିଁ। ଦୀର୍ଘ ସମୟ ଧରି ଭୋକିଲା ରହିବି। ଓଜନ କମିଯିବ । ଯେଉଁମାନେ ଓଜନ କମାଇବାକୁ ଚାହାଁନ୍ତି, ସେମାନଙ୍କ ମନରେ ଏହି ଚିନ୍ତା ନିଶ୍ଚିତ ଆସେ। ଅନେକ ଲୋକ ଏହି ଚିନ୍ତାକୁ ବାସ୍ତବରେ ପରିଣତ କରିଦିଅନ୍ତି। ସେମାନେ ଘଣ୍ଟା ଘଣ୍ଟା ଧରି ଭୋକିଲା ରହନ୍ତି। କେତେବେଳେ ସକାଳର ଜଳଖିଆ ଖାଆନ୍ତି ନାହିଁ, କେତେବେଳେ ମଧ୍ୟାହ୍ନ ଭୋଜନ ଛାଡନ୍ତି, ତ କେତେବେଳେ ରାତ୍ରୀ ଭୋଜନ ଛାଡି ଦିଅନ୍ତି।

ଆପଣ ଭାବୁଛନ୍ତି ଯେ ଖାଦ୍ୟ ଛାଡିଲେ ଓଜନ କମିବ, ତେବେ ଆପଣ ଭୁଲ୍‌ କରୁଛନ୍ତି। ଖାଦ୍ୟ ଛାଡିଲେ କୌଣସି ଲାଭ ହୁଏ ନାହିଁ। ବରଂ କ୍ଷତି ହୁଏ। ଆପଣ ସକାଳର ଜଳଖିଆ, ମଧ୍ୟାହ୍ନ ଭୋଜନ କିମ୍ବା ରାତ୍ରୀ ଭୋଜନ ନ ଖାଆନ୍ତି, ତେବେ ଶରୀରରେ କ’ଣ ହୁଏ। ଦୀର୍ଘ ସମୟ ଧରି ଭୋକିଲା ରହିଲେ କ’ଣ କ୍ଷତି ହୁଏ। ବିଶେଷ କରି ସକାଳର ଜଳଖିଆ କାହିଁକି ଛାଡିବା ଉଚିତ୍‌ ନୁହେଁ ଏବଂ କେତେ ସମୟ ଅନ୍ତରରେ ଖାଦ୍ୟ ଖାଇବା ଉଚିତ୍‌। ଖାଦ୍ୟ ଛାଡିଲେ ଶରୀରରେ କ’ଣ ହୁଏ?

ଡାଇଟିସିଆନ୍‌ ବନ୍ଦନା ବର୍ମା କହିଛନ୍ତି ଖାଦ୍ୟ ଛାଡିଲେ ଶରୀର ଉପରେ ଖରାପ ପ୍ରଭାବ ପଡ଼େ। ଆମର ଶରୀର ଏକ ମେସିନ୍‌ ପରି, ଯାହାକୁ ଇନ୍ଧନର ଆବଶ୍ୟକତା ଥାଏ। ଯେତେବେଳେ ଆମେ ମଧ୍ୟାହ୍ନ ଭୋଜନ କିମ୍ବା ରାତ୍ରୀ ଭୋଜନ ଖାଆନ୍ତି ନାହିଁ, ତେବେ ଶରୀର ଚାପଗ୍ରସ୍ତ ହୋଇଯାଏ। ଏହା ଦ୍ୱାରା ରକ୍ତରେ ଶର୍କରାର ମାତ୍ରା କମିଯାଏ। ମୁଣ୍ଡବିନ୍ଧା ହୁଏ। ଥକ୍କାପଣ ଅନୁଭବ ହୁଏ। ମନରେ ଅସ୍ଥିରତା ଆସେ। ଶକ୍ତି ମଧ୍ୟ କମିଯାଏ।

ଅଧିକ ପଢନ୍ତୁ: ବିନା ଡାଏଟିଂରେ କମିବ ଓଜନ, ଜଳଖିଆରେ ସାମିଲ କରନ୍ତୁ ଏହି ଖାଦ୍ୟ...

ଲୋକମାନେ ଭାବନ୍ତି ଖାଦ୍ୟ ଛାଡିଲେ ସେମାନଙ୍କର ଓଜନ କମିଯିବ। କିନ୍ତୁ ଏହା ଠିକ୍‌ ନୁହେଁ। ଏହା ଦ୍ୱାରା ମେଟାବୋଲିଜିମ ଧୀମା ହୋଇଯାଏ। ଶରୀର ଶକ୍ତି ସଞ୍ଚୟ କରିବା ପାଇଁ ଷ୍ଟାରଭେସନ୍‌ ମୋଡ୍‌କୁ ଚାଲିଯାଏ। ଅର୍ଥାତ୍‌ ଏହା କମ୍‌ କ୍ୟାଲୋରୀ ଖର୍ଚ୍ଚ କରେ। ଏହା ଦ୍ୱାରା ଓଜନ କମାଇବା ଆହୁରି କଷ୍ଟକର ହୋଇଯାଏ।

ଗବେଷଣା କହୁଛି ଯେ ଯେତେବେଳେ ଆମେ ଖାଦ୍ୟ ଛାଡୁଛୁ, ଆମକୁ କମ୍‌ ଶକ୍ତି ମିଳେ। ସ୍ୱାସ୍ଥ୍ୟ ଉପରେ ମଧ୍ୟ ଖରାପ ପ୍ରଭାବ ପଡ଼େ। ଦୀର୍ଘ ସମୟ ଧରି ଖାଦ୍ୟ ନ ଖାଇଲେ ହଠାତ୍‌ ଖୁବ୍‌ ଦୁର୍ବଳତା ଅନୁଭବ ହୁଏ। ଧ୍ୟାନ କେନ୍ଦ୍ରିତ କରିବାରେ ଅସୁବିଧା ହୁଏ। ରକ୍ତ ଶର୍କରାର ମାତ୍ରା ଅସ୍ଥିର ହୋଇଯାଏ। ଏସିଡିଟି, ପେଟ ଫୁଲିବା ହୋଇପାରେ।

ଆମେ ସବୁବେଳେ ସନ୍ତୁଳିତ ଖାଦ୍ୟ ଗ୍ରହଣ କରିବା ଉଚିତ୍‌। ଏଥିରେ ତିନୋଟି ମୁଖ୍ୟ ଭୋଜନ ଏବଂ ଦୁଇଟି ସ୍ନାକ୍ସ ଅନ୍ତର୍ଭୁକ୍ତ ହେବା ଉଚିତ୍‌। ଏହା ଦ୍ୱାରା ଶରୀରକୁ ସମସ୍ତ ଆବଶ୍ୟକୀୟ ପୁଷ୍ଟିକର ପଦାର୍ଥ ମିଳେ। ଖାଦ୍ୟର ସମୟ ଠିକ୍‌ ରଖିବା ବହୁତ ଜରୁରୀ।

ଯେପରି ସକାଳ ୭-୮ଟା ସୁଦ୍ଧା ଜଳଖିଆ କରିନିଅନ୍ତୁ। ସକାଳ ୧୦-୧୧ଟା ବେଳେ ଫଳ ଖାଇପାରନ୍ତି। ନଡ଼ିଆ ପାଣି କିମ୍ବା ଜୁସ୍‌ ମଧ୍ୟ ନେଇପାରନ୍ତି। ଏହା ଦ୍ୱାରା ଶକ୍ତି ବଜାୟ ରହେ ଏବଂ ଧ୍ୟାନ କେନ୍ଦ୍ରିତ କରିବାରେ ସାହାଯ୍ୟ ମିଳେ। ଦିନ ୧ଟା ବେଳେ ମଧ୍ୟାହ୍ନ ଭୋଜନ କରିନିଅନ୍ତୁ। ରାତି ୮ଟା ସୁଦ୍ଧା ରାତ୍ରୀ ଭୋଜନ ସାରିନିଅନ୍ତୁ। ଶୋଇବା ପୂର୍ବରୁ କ୍ଷୀର ପିଇପାରନ୍ତି।

ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଉଛି ସକାଳର ଜଳଖିଆ। ଜଳଖିଆର ଅର୍ଥ ହେଉଛି- ବ୍ରେକ୍‌ ଦ ଫାଷ୍ଟ (ଅର୍ଥାତ୍‌ ରାତି ସାରା ଉପବାସ ଭାଙ୍ଗିବା)। ତେଣୁ ଆମେ ପ୍ରତିଦିନ ଜଳଖିଆ ନିଶ୍ଚିତ କରିବା ଉଚିତ୍‌। ଯଦି ଆମେ ଜଳଖିଆ ନ ଖାଆନ୍ତି, ତେବେ ଦିନସାରା ଥକ୍କାପଣ ଲାଗେ। ଚିଡ଼ଚିଡ଼ାପଣ ରହେ ଏବଂ ଧ୍ୟାନ କେନ୍ଦ୍ରିତ କରିବା କଷ୍ଟକର ହୁଏ।

ଅନେକ ରୋଗୀ ଏସିଡିଟିର ଅଭିଯୋଗ କରନ୍ତି କାରଣ ସେମାନେ ଜଳଖିଆ ଖାଆନ୍ତି ନାହିଁ। ଖାଲି ପେଟ ରହିଲେ ଛାତିରେ ଜଳାପୋଡ଼ା ହୁଏ। ତେଣୁ, ସକାଳେ ଏକ ସନ୍ତୁଳିତ ଖାଦ୍ୟ ଗ୍ରହଣ କରିବା ଉଚିତ୍‌। ଗବେଷଣାରେ ମଧ୍ୟ ଦେଖାଯାଇଛି ଯେ ଯେଉଁମାନେ ଜଳଖିଆ ଖାଆନ୍ତି ନାହିଁ, ସେମାନଙ୍କୁ ମୋଟାପଣ, ଡାଇବେଟିସ୍‌, ଏବଂ ଉଚ୍ଚ ରକ୍ତଚାପ ଭଳି ରୋଗର ଆଶଙ୍କା ଅଧିକ ଥାଏ।

ଅଧିକ ପଢନ୍ତୁ: ଓଜନ ହ୍ରାସରୁ ହୃଦରୋଗ ଯାଏଁ ସବୁ କରିଦେବ ମୂଳପୋଛ, ଶରୀର ପାଇଁ ବରଦାନ ଏହି ଫଳ...