LIVE TV
୨୦୨୫ର ଏହା ଏକ ଛାତିଥରା ଅପରାଧ କାହାଣୀ । ସାରା ଦେଶକୁ ସ୍ତବ୍ଧ କରିଦେଇଛି । ଦୁର୍ନୀତିର ପର୍ଦ୍ଦାଫାସ କରିଥିବା ଜଣେ ସାମ୍ବାଦିକଙ୍କୁ ଗୁଣ୍ଡା ଲଗାଇ ହତ୍ୟା କରିଛନ୍ତି ଛତିଶଗଡ଼ର ଜଣେ ଠିକାଦାର । ଅଭିଯୁକ୍ତ ଠିକାଦାର ସୁରେଶ ଚନ୍ଦ୍ରାକାରଙ୍କ ପାଇଖାନା ଟାଙ୍କିରୁ ମିଳିଥିଲା ସାମ୍ୱାଦିକ ମୁକେଶ ଚନ୍ଦ୍ରାକାରଙ୍କ ମୃତଦେହ । ଶବ ବ୍ୟବଚ୍ଛେଦ କରିଥିବା ଡାକ୍ତର କହିଛନ୍ତି, ଦୁର୍ବୃତ୍ତମାନେ ମୁକେଶଙ୍କ ବେକ ମୋଡି ଭାଙ୍ଗି ଦେଇଛନ୍ତି । ହାର୍ଟ ବାହାର କରିଦେଇଛନ୍ତି । ଲିଭରକୁ ୪ ଖଣ୍ଡ କରିଦେଇଛନ୍ତି । ମୁଣ୍ଡକୁ ପ୍ରବଳ ପ୍ରହାର କରିଛନ୍ତି । ମୁଣ୍ଡରେ ୧୫ଟି ଫ୍ରାକ୍ଚର ଅଛି । ପିଟି ପିଟି ପଞ୍ଜରା ହାଡ଼ ଭାଙ୍ଗି ଦେଇଛନ୍ତି । ଏହି ଡାକ୍ତରଜଣକ କହିଛନ୍ତି, ମୋ ଜୀବନରେ ମୁଁ ଅନେକ ଶବ ବ୍ୟବଚ୍ଛେଦ କରିଛି । କିନ୍ତୁ ଏଭଳି ଶବ ବ୍ୟବଚ୍ଛେଦ କେବେ କରିନାହିଁ । ୨୮ ବର୍ଷୀୟ ଏହି ସାମ୍ୱାଦିକଙ୍କୁ ହତ୍ୟା ଘଟଣା ଜଣେ ଅଭିଯୁକ୍ତ ଦ୍ୱାରା କେବେ ବି ହୋଇନଥିବ । ଏଥିରେ ଦୁଇରୁ ଅଧିକ ଅଭିଯୁକ୍ତ ନିଶ୍ଚିତ ଭାବେ ସାମିଲ୍ ଥିବେ ବୋଲି ଡାକ୍ତର କହିଛନ୍ତି ।
ଏହି ଘଟଣାର ମାଷ୍ଟରମାଇଣ୍ଡ ଠିକାଦାର ସୁରେଶ ଚନ୍ଦ୍ରାକାରକୁ ପୋଲିସ ହାଇଦ୍ରାବାଦରୁ ଗିରଫ କରିଛି । ତେବେ କେତେ ବୀଭତ୍ସ ଥିଲା ଏହି ହତ୍ୟାକାଣ୍ଡ, ତାହା ଏହି ଶବ ବ୍ୟବଚ୍ଛେଦ ରିପୋର୍ଟ ହିଁ ବୟାନ କରୁଛି ।
ଛତିଶଗଡ଼ରେ ୧୨୦ କୋଟି ଟଙ୍କାର ସଡ଼କ ବିକାଶ ପ୍ରକଳ୍ପରେ ହୋଇଥିବା ଦୁର୍ନୀତିକୁ ସାମନାକୁ ଆଣିଥିଲେ ସାମ୍ୱାଦିକ ମୁକେଶ । ପ୍ରତିଶୋଧ ପରାୟଣ ହୋଇ ସୁରେଶ ଏହା ହତ୍ୟାକାଣ୍ଡ ଭିଆଇଥିବା ପୋଲିସ୍ କହିଛି । ଗତ ୩ ତାରିଖରେ ଏହି ହତ୍ୟା ଘଟଣା ପଦାକୁ ଆସିବା ପରେ ସଂପୃକ୍ତ ଠିକାଦାର ନିଖୋଜ ଥିଲେ । ଛତିଶଗଡ଼ର ସ୍ପେଶାଲ ଟାସ୍କ ଫୋର୍ସ ଏହି ପ୍ରଭାବଶାଳୀ ଠିକାଦାରଙ୍କୁ ଗିରଫ କରିବାରେ ସକ୍ଷମ ହୋଇଛି ।
ଅଧିକ ପଢ଼ନ୍ତୁ: ଦୁର୍ନୀତିକୁ ପଦାକୁ ଆଣିଲେ ସାମ୍ବାଦିକ; ହତ୍ୟା କରି ପାଇଖାନା ଟାଙ୍କିରେ ଫୋପାଡ଼ି ଦେଲେ କଣ୍ଟ୍ରାକ୍ଟର...
ନକ୍ସଲ ପ୍ରଭାବିତ ବସ୍ତର ଜିଲ୍ଲାରେ ଏହି ରାସ୍ତା କାମ ହେଉଥିଲା । ମୁକେଶଙ୍କୁ ହତ୍ୟା ଘଟଣାର ବିଧିବଦ୍ଧ ତଦନ୍ତ ଦାବି କରିଛି ବେଆଇନ ଘୋଷିତ ସଂଗଠନ ‘ଭାରତୀୟ କମ୍ୟୁନିଷ୍ଟ ପାର୍ଟି ଅଫ୍ ଇଣ୍ଡିଆ ( ମାଓଇଷ୍ଟ )’। ସାମ୍ୱାଦିକ ମୁକେଶ ରାସ୍ତାକାମର ଦୁର୍ନୀତି ଘଟଣାର ପର୍ଦ୍ଦାଫାସ କରି ଓ ଲୋକଙ୍କ ସମସ୍ୟା ପ୍ରସଙ୍ଗ ଉଠାଇ ତାଙ୍କ କର୍ତ୍ତବ୍ୟ ପାଳନ କରିଛନ୍ତି ବୋଲି ସଂଗଠନ ପକ୍ଷରୁ କୁହାଯାଇଛି ।
ପାଇଖାନା ଟାଙ୍କିରୁ ମିଳିଥିଲା ମୃତଦେହ
ଗତ ୩ ତାରିଖରେ ଠିକାଦାର ସୁରେଶଙ୍କ ଘର ଅଗଣାରେ ଥିବା ପାଇଖାନା ଟାଙ୍କିରୁ ମୁକେଶଙ୍କ ମୃତଦେହ ଉଦ୍ଧାର କରାଯାଇଥିଲା । ଏକ ସ୍ଥାନୀୟ ଘରୋଇ ଚାନେଲରେ କାମ କରୁଥିବା ମୁକେଶ ରାସ୍ତା କାମରେ ହୋଇଥିବା ଦୁର୍ନୀତି ନେଇ ଖବର ପ୍ରସାରଣ କରିଥିଲେ । ଏହି ରିପୋର୍ଟ ଆଧାରରେ ରାଜ୍ୟ ସରକାର ସଂପୃକ୍ତ ଠିକାଦାରଙ୍କ ବିରୋଧରେ ତଦନ୍ତ ନିର୍ଦ୍ଦେଶ ଦେଇଥିଲେ ।
ଜାନୁଆରୀ ୧ ତାରିଖରୁ ନିଖୋଜ ଥିଲେ ମୁକେଶ ଚନ୍ଦ୍ରାକାର । ମୁକେଶଙ୍କ ଫୋନ୍ ସ୍ୱିଚଅଫ୍ ଥିବାରୁ ତାଙ୍କ ବଡ ଭାଇ ଯୁକେଶ ଥାନାରେ ଏକ ମିସିଂ ରିପୋର୍ଟ କରିଥିଲେ । ଏହା ପରେ ଜଣାପଡିଥିଲା ଯେ, ଠିକାଦାର ସୁରେଶଙ୍କ ଭାଇ ରିତେଶ ଏକ ବୈଠକର ଆୟୋଜନ କରିଥିଲେ । ସେଥିରେ ମୁକେଶ ଯୋଗ ଦେଇଥିଲେ । ତା ପରଠୁ ତାଙ୍କର ଆଉ ପତ୍ତା ମିଳୁନାହିଁ । ତେଣୁ ସନ୍ଦେହରେ ପୋଲିସ୍ ଠିକାଦାରଙ୍କ ଘରେ ପହଞ୍ଚିଥିଲା । ଠିକାଦାରଙ୍କ ଉପରେ ସନ୍ଦେହ ଦୃଢୀଭୂତ ହେଉଥିବାରୁ ପୋଲିସ୍ ପାଇଖାନା ଟାଙ୍କି ମଧ୍ୟ ଯାଞ୍ଚ କରିଥିଲା । ପାଇଖାନା ଟାଙ୍କିରୁ ମିଳିଥିଲା ମୃତଦେହ ।
ଏହାପରଠୁ ଫେରାର ଥିଲେ ଠିକାଦାର ସୁରେଶ । ବର୍ତ୍ତମାନ ସୁଦ୍ଧା ଏହି ଘଟଣାରେ ପୋଲିସ୍ ୩ ଜଣଙ୍କୁ ଗିରଫ କରିଛି । ଏହା ଉପରେ ଅଧିକ ତଦନ୍ତ ଜାରି ରହିଛି ।
