Transport Scam: ରାଜା ଚକ୍ରଙ୍କ ୧୦ଟି ସ୍ଥାନରେ ରେଡ୍, EOW ଓ STF ର ମିଳିତ ଚଢ଼ାଉ

କୋଟି କୋଟି ଟଙ୍କାର ଟ୍ରାନ୍ସପୋର୍ଟ ଠକେଇ ଅଭିଯୋଗ ମାମଲାରେ କେନ୍ଦୁଝରର ବିଜେଡି ନେତା ରାଜା ଚକ୍ରଙ୍କ ୧୦ଟି ସ୍ଥାନରେ ରେଡ୍ । ମିଳିତ ଭାବେ ଚଢ଼ାଉ କରିଛି EOW ଓ STF। ରାଜ୍ୟର ସମସ୍ତ ମାଇନ୍ସ କରିଡରର ଚେକ୍ ପଏଣ୍ଟରେ ରେଡ୍ ହେଉଛି। ସୁନ୍ଦରଗଡ଼, ସମ୍ବଲପୁର, କେନ୍ଦୁଝର, ଗଞ୍ଜାମର ଗୋପାଳପୁରରେ ମଧ୍ୟ ରେଡ୍ କରିଛନ୍ତି EOW ଏବଂ STF । ଗତକାଲି ବି ସୌମ୍ୟଶଙ୍କର ଚକ୍ର ଓରଫ୍ ରାଜା ଚକ୍ରଙ୍କୁ ୧୧ ଘଣ୍ଟା ଧରି ଜେରା କରିଥିଲା କ୍ରାଇମବ୍ରାଞ୍ଚ EOW । ଗନ୍ଧମାର୍ଦ୍ଦନ ଲୋଡିଂ ଏଜେନସି ଆଣ୍ଡ ଟ୍ରାନ୍ସପୋର୍ଟ କୋଅପରେଟିଭ ସୋସାଇଟିରେ କୋଟି କୋଟି ଟଙ୍କାର ଟ୍ରାନ୍ସପୋର୍ଟ ଘୋଟାଲା ମାମଲାରେ ବିଜେଡି ନେତା ରାଜା ଚକ୍ରଙ୍କୁ ଜେରା କରିଥିଲା EOW । 

ଏହି ଠକେଇ ମାମଲାରେ ସୋସାଇଟିର ପୂର୍ବତନ ସଭାପତି ମାନସ ରଞ୍ଜନ ବାରିକ ଓ ସମ୍ପାଦକ ଉତ୍କଳ ଦାସଙ୍କୁ ଗତ ୯ ତାରିଖରେ ଗିରଫ କରିଥିଲା ଇଓଡବ୍ଲୁ । ପରେ ରିମାଣ୍ଡରେ ଆଣି ଉଭୟଙ୍କୁ ପଚରାଉଚୁରାରୁ ମିଳିଥିଲା ଅନେକ ଚାଞ୍ଚଲ୍ୟକର ତଥ୍ୟ। ଆଉ ତାରି ଆଧାରରେ ଇଓଡବ୍ଲୁ ରାଜାଙ୍କୁ ଜେରା କରିଛି । ଅନ୍ୟପକ୍ଷରେ ଗିରଫଦାରୀ ଏଡାଇବାକୁ ରାଜା ହାଇକୋର୍ଟରୁ ଆଗୁଆ ଜାମିନ ପାଇଛନ୍ତି ଏବଂ କୋର୍ଟଙ୍କ ନିର୍ଦ୍ଦେଶକ୍ରମେ ତଦନ୍ତକାରୀ ଅଫିସରଙ୍କ ନିକଟରେ ହାଜର ହୋଇଥିବା କହିଛନ୍ତି ରାଜାଙ୍କ ଓକିଲ । କେନ୍ଦୁଝର ବିଜେଡିର ଏ ପାୱାରଫୁଲ୍ ନେତାଙ୍କ ସହ ଥିବା ତତ୍କାଳୀନ ବିଜେଡି ପାୱାର ସେଣ୍ଟରର ଟପ୍ ଲିଡରଙ୍କ ଫଟୋଗୁଡ଼ିକୁ ଦେଖିଲେ ରାଜାଙ୍କର ବିଜେଡିରେ ଭଲ ପତିଆରା ରହିଥିବା ସ୍ପଷ୍ଟ ଅନୁମେୟ । କେତେବେଳେ ବବି ତ କେବେ ପାଣ୍ଡିଆନ୍ । ସବୁବେଳେ କ୍ଷମତାକେନ୍ଦ୍ରର ପାଖେ ପାଖେ ରହୁଥିଲେ ରାଜା ।

ଅଧିକ ପଢ଼ନ୍ତୁ: ଇଓଡବ୍ଲୁ ପଞ୍ଝାରେ ବିଜେଡି ନେତା ରାଜା ଚକ୍ର; ସାମ୍ନାକୁ ଆସିବ ପ୍ରଭାବଶାଳୀ ନେତାଙ୍କ ଲିଙ୍କ୍ 

ଗନ୍ଧମାର୍ଦନ ଲୋଡିଂ ଏଜେନସି ଆଣ୍ଡ ଟ୍ରାନ୍ସପୋର୍ଟ କୋଅପରିଟିଭ୍ ସୋସାଇଟିରେ ହୋଇଥିବା ଘୋଟାଲା ସଂପର୍କରେ ଇଓଡବ୍ଲୁ ତଦନ୍ତ କହୁଛି ୨୦୦୬ ରେ ଗଠିତ ଏହି ସୋସାଇଟି କେନ୍ଦୁଝର ଶୁଆକାଟିରେ ଖଣିଜ ପଦାର୍ଥ ଲୋଡ଼ିଂ କାମ କରିଆସୁଛି । ଏହି ସମବାୟ ସମିତି ଗଠନ କରିବାର ଏକମାତ୍ର ଉଦ୍ଦେଶ୍ୟ ଥିଲା ଲୁହାପଥର ଖଣି ଉତ୍ତୋଳନରେ ସ୍ଥାନୀୟ ଶ୍ରମିକ ନିଯୁକ୍ତି ସହ ଆଇରନ୍ ଓର୍ ପରିବହନ ବ୍ୟବସ୍ଥାକୁ ବ୍ୟବସ୍ଥିତ କରିବା ।

ଲୋକଙ୍କ ଆର୍ଥିକ ସ୍ଥିତି ସୁଦୃଢ କରିବା । ହେଲେ କାମହେଲା ଓଲଟା । ଅଭିଯୋଗ ହେଉଛି ବିଜେଡିର ତତ୍କାଳୀନ ପାୱାର ସେଣ୍ଟରର ହାତ ବାରିସୀ ସାଜିଥିବା ରାଜାଙ୍କ ଜରିଆରେ ଏଇଠୁ ଲୁଟ୍ ହେଉଥିଲା କୋଟି କୋଟି ଟଙ୍କା । ଶ୍ରମିକଙ୍କ ଟଙ୍କା ଆସୁଥିଲା ବିଜେଡି ପାର୍ଟି ଅଫିସକୁ ଏବଂ ବାହୁବଳୀ ନେତାଙ୍କ ଆକାଉଣ୍ଟକୁ । ଜାଲ କାଗଜପତ୍ର ପ୍ରସ୍ତୁତ କରି ଶ୍ରମିକଙ୍କ ଅର୍ଥ ବାଟମାରଣାଠୁ ନେଇ ଇପିଏଫ୍ ଟଙ୍କା ଖାଇଯିବା ଭଳି ସଂଗୀନ ଅଭିଯୋଗ ବି ପୂର୍ବ ସରକାର ସମୟରେ ଉଠିଥିଲା । ହେଲେ ତାହାକୁ ଚାପି ଦିଆଯାଇଥିବାର ଅଭିଯୋଗ କରିଛନ୍ତି କେନ୍ଦୁଝର ସ୍ଥାନୀୟ ବିଜେପି ନେତା ।

କେବଳ ସେତିକି ନୁହେଁ, ଇଓଡବ୍ଲୁର ପ୍ରେସରିଲିଜ୍ କହୁଛି ସୋସାଇଟି ସହ ଆଦୌ ଜଡ଼ିତ ନଥିବା କିଛି ବ୍ୟକ୍ତିଙ୍କ ନାଁରେ କୋଟି କୋଟି ଟଙ୍କା ଚେକ୍ ଇସ୍ୟୁ କରାଯାଇଥିଲେ ବି କାହିଁକି ସେ ଅର୍ଥ ଦିଆଯାଇଛି, ତାର ସନ୍ତୋଷ ଜନକ ଉତ୍ତର ମିଳିନି । ଏପରିକି ସ୍ଥାନୀୟ ଅଭିଯୋଗ ଆଧାରରେ କେବଳ ୨୦୨୨ରେ ଏକ ସ୍ପେଶାଲ୍ ଅଡିଟ୍ ଛଡ଼ା ୨୦୧୨ରୁ ଏପର୍ଯ୍ୟନ୍ତ ସୋସାଇଟିର ଅଡିଟ୍ ହୋଇନଥିବା ତଦନ୍ତରୁ ଜଣାପଡ଼ିଛି । ତେଣୁ ଅଭିଯୋଗ ଆଧାରରେ ରାଜା ଚକ୍ରଙ୍କୁ ଜେରା କରି ଗନ୍ଧମାର୍ଦ୍ଦନ ଲୋଡିଂ ଏଜେନ୍ସିରୁ କୋଟି କୋଟି ଲୁଟିଥିବା ସେଇ ପ୍ରଭାବଶାଳୀ ନେତାଙ୍କ ଲିଙ୍କ୍ ଖୋଜୁଛି ଇଓଡବ୍ଲୁ ।

( ଭୁବନେଶ୍ୱରରୁ ଚନ୍ଦନ ପାଇକରାୟ ଓ କେନ୍ଦୁଝରରୁ ପ୍ରଣୟ ପାଣିଙ୍କ ରିପୋର୍ଟ )

ଅଧିକ ପଢ଼ନ୍ତୁ: ୫ ଶହ କୋଟିର ଟ୍ରାନ୍ସପୋର୍ଟ ଘୋଟାଲା ମାମଲା: ବିଜେଡି ନେତା ରାଜା ଚକ୍ରଙ୍କୁ EOW ଜେରା