Manja Killed Doctor: ଡାକ୍ତରଙ୍କ ତଣ୍ଟି କାଟିଲା ମାଞ୍ଜା ସୂତା, ଦିନକରେ ୩ ମୁଣ୍ଡ ଗଡ଼ିଲା

ଡାକ୍ତରଙ୍କ ତଣ୍ଟି କାଟିଲା ମାଞ୍ଜା ସୂତା । ରାସ୍ତାରେ ଛଟପଟ ହୋଇ ଚାଲିଗଲା ଜୀବନ । ମାଞ୍ଜା ସୂତା ନା ମୃତ୍ୟୁର ଫାଶ ! ବେକରେ ଲାଗିବା ମାତ୍ରେ ଚଟ୍‌କିନା କାଟିଦେଉଛି । ଡାକ୍ତରଖାନା ପହଞ୍ଚିବା ବେଳକୁ ଚାଲିଯାଉଛି ଜୀବନ । କିଏ ମେଡିକାଲରୁ ଘରକୁ ଫେରୁଥିଲା ତ ଆଉ କିଏ ଝିଅକୁ ସ୍କୁଲ୍‌ରୁ ଆଣିବାକୁ ଯାଉଥିଲା । ହେଲେ ବାଟରେ ଜୀବନ ନେଇଗଲା ମାଞ୍ଜା ସୂତା ।

ରକ୍ତ ପିଉଛି ମାଞ୍ଜା ସୂତା:

ମକରରେ ଚାଇନିଜ୍ ମାଞ୍ଜା ସୂତା ଲାଗି ଦିନକରେ ୩ ଜଣଙ୍କ ମୃତ୍ୟୁ ହୋଇଛି । ଶତାଧିକ ଲୋକେ ଆହତ ହୋଇଛନ୍ତି । ମୃତକଙ୍କ ମଧ୍ୟରେ ରହିଛନ୍ତି ଉତ୍ତରପ୍ରଦେଶର ଜଣେ ୨୮ ବର୍ଷୀୟ ଡାକ୍ତର । ସେ ବାଇକ୍‌ରେ ଘରକୁ ଫେରୁଥିଲେ । ବାଟରେ ଚାଇନିଜ୍‌ ମାଞ୍ଜା ସୂତା ଲାଗି ତାଙ୍କ ବେକ କଟିଯାଇଥିଲା । ରକ୍ତ ଜୁଡୁବୁଡୁ ଅବସ୍ଥାରେ ସେ ଛଟପଟ ହେଉଥିବା ଦେଖି ସ୍ଥାନୀୟ ଲୋକେ ତାଙ୍କୁ ନିକଟସ୍ଥ ମେଡିକାଲକୁ ନେଇଥିଲେ । ହେଲେ ତାଙ୍କର ଜୀବନ ବଞ୍ଚିପାରିନଥିଲା । ମୃତ ଡାକ୍ତର ହେଲେ ସମୀର ହାସମି।

ଦିନକରେ ୩ ମୁଣ୍ଡ ଗଡିଲା:

ସେହିପରି କର୍ଣ୍ଣାଟକ ବିଦାର ଜିଲ୍ଲାରେ ଆଉ ଜଣେ ୪୮ ବର୍ଷୀୟ ଗ୍ରାମ ପଞ୍ଚାୟତକର୍ମୀଙ୍କ ମାଞ୍ଜା ସୂତା ଲାଗି ମୃତ୍ୟୁ ହୋଇଛି । ସେ ବାଇକ୍‌ରେ ଝିଅକୁ ସ୍କୁଲରୁ ଆଣିବାକୁ ଯାଉଥିଲେ । କିନ୍ତୁ ଝିଅ ପାଖରେ ପହଞ୍ଚିବା ଆଗରୁ ତାଙ୍କର ତଣ୍ଟି କାଟି ଦେଇଥିଲା ମାଞ୍ଜା ସୂତା ।
ତେଲେଙ୍ଗାନା ସଙ୍ଗାରେଡ୍ଡୀ ଜିଲ୍ଲାରେ ଜଣେ ପ୍ରବାସୀ ଶ୍ରମିକଙ୍କର ବି ମାଞ୍ଜା ସୂତାରେ ତଣ୍ଟି କରିବାରୁ ପ୍ରାଣ ହରାଇଛନ୍ତି । ମୃତକ ଉତ୍ତରପ୍ରଦେଶରେ ହୋଇଥିବା ବେଳେ କାମ ପାଇଁ ତେଲେଙ୍ଗାନା ଯାଇଥିଲେ ।

ଦେଶରେ ବ୍ୟାନ୍ ହୋଇଛି ଚାଇନିଜ୍ ମାଞ୍ଜା ସୂତା । ହେଲେ ବାରମ୍ବାର ରେଡ୍‌, ଧରପଗଡ଼ ପରେ ବି ବନ୍ଦ ହେଉନି ବିକ୍ରି । ଫଳରେ ମକରରେ ଥରକୁ ଥର ଏମିତି ବଡ଼ ବଡ଼ ଅଘଟଣ ଘଟିଚାଲିଛି । ଓଡ଼ିଶାରେ ବି ମାଞ୍ଜା ସୂତା ଲାଗି ମୃତାହତ ହେବାର ଅନେକ ଘଟଣା ଆସୁଛି ସାମ୍ନାକୁ ।  

ବ୍ୟୁରୋ ରିପୋର୍ଟ, ଓଟିଭି