Global Horror: ମହାପ୍ରଳୟ... ଚାରିଆଡେ କୁଢ କୁଢ ଶବ, ପ୍ରକୃତିର କରାଳ ରୂପରେ ଛାରଖାର୍ ୫ ଦେଶ

ଗଲାଣି ୧୭୦୦ରୁ ଅଧିକ ଜୀବନ, ଏବେ ବି ସରୁନି ଶବ ଖୋଜା । ଗ୍ଲୋବାଲ ୱାର୍ମିଂର ପ୍ରଭାବ ଏମିତି କାଳ ହୋଇଆସିବ ତା' ଦେଖିଲେ ଲୋମଟାଙ୍କୁରି ଯିବ । ଗତ କିଛି ସପ୍ତାହ ହେଲା ଦକ୍ଷିଣ-ପୂର୍ବ ଓ ଦକ୍ଷିଣ ଏସିଆରେ ତାଣ୍ଡବ ରଚିଛି ବନ୍ୟା, ବାତ୍ୟା ଭଳି ପ୍ରାକୃତିକ ବିପର୍ଯ୍ୟୟ । 

ପଛକୁ ପଛ ବାତ୍ୟା ଶ୍ରୀଲଙ୍କାଠୁ ନେଇ ଇଣ୍ଡୋନେସିଆ, ଭିଏତନାମ, ମାଲେସିଆ ଓ ଥାଇଲାଣ୍ଡକୁ କରିଛି ଛିନଛତ୍ର । ଯେଉଁଥିରେ ୧,୭୯୦ରୁ ଅଧିକ ଲୋକଙ୍କ ମୃତ୍ୟୁ ହୋଇଥିବା ବିଭିନ୍ନ ମିଡିଆ ରିପୋର୍ଟରୁ ଜଣାପଡିଛି ।

ମହାବାତ୍ୟାଠୁ ବି ଭୟଙ୍କର

ସର୍ବାଧିକ କ୍ଷତିଗ୍ରସ୍ତ ହୋଇଛି ଇଣ୍ଡୋନେସିଆ । ସପ୍ତାହ ତଳେ ଏଠି ମାଡ ହୋଇଥିଲା ବାତ୍ୟା ସେନୟାର । ଏହାପରେ ଭୟଙ୍କର ବନ୍ୟା ଭୂସ୍ଖଳନରେ ପୂରା ଦେଶ ଯେମିତି ଛାର୍‌ଖାର୍‌ । କେବଳ ଇଣ୍ଡୋନେସିଆରେ ୯୦୦ରୁ ଅଧିକ ଲୋକଙ୍କ ମୃତ୍ୟୁ ଘଟିଛି । ସାମ୍ନାକୁ ଆସିଥିବା ଏହାର ଦୃଶ୍ୟ ୧୯୯୯ ମହାବାତ୍ୟାଠୁ ବି ଆହୁରି ଭୟଙ୍କର... ସବୁଠି ପ୍ରଳୟର ପଦଚିହ୍ନ । ଶହ ଶହ ମୃତ୍ୟୁ । ଚାରିଆଡେ ପୋକ ମାଛି ଭଳି ମରିପଡିଛନ୍ତି ମଣିଷ । ଶବ ଗଣି ହେଉନି, ଏବେ ବି ମାଟି କାଦୁଅ ତଳେ ଚାଲିଛି ଜୀବନ ଖୋଜା । 

ବନ୍ୟା ପରେ ଏବେ ଅନାହାରରେ ଆଉଟୁପାଉଟୁ ହେଉଛନ୍ତି ଇଣ୍ଡୋନେସିଆବାସୀ । ରହିବାକୁ ଘର ନାହିଁ, ଖାଇବାକୁ ଖାଦ୍ୟ ନାହିଁ । ବନ୍ୟା ପରେ ବର୍ତ୍ତମାନ ଲୋକମାନେ ଭୋକ ଉପାସରେ ଆଖି ବୁଜୁଥିବାର ଜଣାପଡିଛି । ବନ୍ୟାରେ ଅନେକ ଗାଁକୁ ଯୋଗାଯୋଗ ପୂରାପୂରି ବିଚ୍ଛିନ୍ନ ହୋଇଯାଇଥିବାରୁ ସରକାରୀ ସହାୟତା ପହଞ୍ଚିପାରୁନି ।

କିଛି ଦିନ ତଳେ ଶ୍ରୀଲଙ୍କାରେ ତାଣ୍ଡବ କରିଥିଲା ବାତ୍ୟା ଡିଟୱା । ଯେଉଁଥିରେ ୬୦୭ ଜଣଙ୍କ ମୃତ୍ୟୁ ହୋଇଛି । ଏବେ ଯାଏଁ ବି ଅନେକ ଲୋକଙ୍କ ପତ୍ତା ମିଳିନି । ଦକ୍ଷିଣ ଭାରତକୁ ବି ପ୍ରଭାବିତ କରିଥିଲା ଡିଟୱା । ସେହିପରି ଥାଇଲାଣ୍ଡରେ ବନ୍ୟାରେ ୨୭୬ ଜଣ, ଭିଏତନାମ ଓ ମାଲେସିଆରେ ଭୂସ୍ଖଳନରେ ୪ ଜଣଙ୍କ ଜୀବନ ଯାଇଛି । ଏସବୁ ଦେଶରେ ମୃତ୍ୟୁ ସଂଖ୍ୟା ଦେଖିଲେ ମୋଟ ୧୭୯୦ ଜଣଙ୍କ ମୃତ୍ୟୁ ଘଟିଛି । ଶହ ଶହ ଲୋକେ ଏବେ ବି ନିଖୋଜ ।