Zohran Mamdani: ନ୍ୟୁୟର୍କ ସିଟି ମେୟର ହେଲେ ଜୋହରାନ ମମଦାନି...ଓଡିଶା ସହ କ’ଣ ରହିଛି ସମ୍ପର୍କ

ଆମେରିକାର ନ୍ୟୁୟର୍କ ସିଟି (New York City) ର ମେୟର ନିର୍ବାଚନର ଫଳାଫଳ ଘୋଷଣା କରାଯାଇଛି। ଭାରତୀୟ ବଂଶୋଦ୍ଭବ ପ୍ରାର୍ଥୀ ଜୋହରାନ ମମଦାନି ବିଜୟୀ ହୋଇଛନ୍ତି। ମାମଦାନି ଆରମ୍ଭରୁ ନ୍ୟୁୟର୍କ ସିଟି ମେୟର ଦୌଡ଼ରେ ଆଗୁଆ ଥିଲେ। ଏହି ବିଜୟ ସହିତ, ଜୋହରାନ ମାମଦାନି ନ୍ୟୁୟର୍କ ସିଟିର ସବୁଠାରୁ ଯୁବ, ପ୍ରଥମ ମୁସଲିମ ଏବଂ ପ୍ରଥମ ଦକ୍ଷିଣ ଏସୀୟ ମେୟର ହୋଇଛନ୍ତି। ତାଙ୍କ ବିଜୟକୁ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ପାଇଁ ଏକ ବଡ଼ ଝଟକା ବୋଲି ବିବେଚନା କରାଯାଉଛି।

ଜୋହରାନ୍ ମମଦାନିଙ୍କ ବୟସ ୩୪ ବର୍ଷ। ସେ ଆଫ୍ରିକୀୟ ଦେଶ ଉଗାଣ୍ଡାରେ ଜନ୍ମଗ୍ରହଣ କରିଥିଲେ ଏବଂ ନ୍ୟୁୟର୍କ ସହରରେ ବଢିଥିଲେ। ସେ ନ୍ୟୁୟର୍କ ଷ୍ଟେଟ୍ ଆସେମ୍ବଲିର ସଦସ୍ୟ ଏବଂ ଜଣେ ଡେମୋକ୍ରାଟିକ୍ ସଦସ୍ୟ। ମମଦାନି ପୂର୍ବତନ ନ୍ୟୁୟର୍କ ରାଜ୍ୟପାଳ ଆଣ୍ଡ୍ରୁ କୁମୋଙ୍କ ସହ ମୁକାବିଲା କରିଥିଲେ, ଯିଏ ଜଣେ ସ୍ୱାଧୀନ ପ୍ରାର୍ଥୀ ଭାବରେ ପ୍ରତିଦ୍ୱନ୍ଦ୍ୱିତା କରୁଥିଲେ ଏବଂ ରିପବ୍ଲିକାନ୍ ପାର୍ଟି ପ୍ରାର୍ଥୀ କର୍ଟିସ୍ ସ୍ଲିୱା ମଧ୍ୟ ଥିଲେ। ପୂର୍ବତନ ନ୍ୟୁୟର୍କ ରାଜ୍ୟପାଳ ଆଣ୍ଡ୍ରୁ କୁମୋଙ୍କୁ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏବଂ ଏଲୋନ୍ ମସ୍କଙ୍କ ଭଳି ପ୍ରମୁଖ ବ୍ୟକ୍ତିମାନେ ସମର୍ଥନ କରିଥିଲେ।

ଭାରତ ସହିତ ଜୋହରାନ୍ ମମଦାନୀଙ୍କ ସଂଯୋଗ

ଜୋହରାନ୍ ମମଦାନି ଉଗାଣ୍ଡାରେ ଜନ୍ମଗ୍ରହଣ କରିଥିଲେ। କିନ୍ତୁ ଭାରତ ସହିତ ତାଙ୍କର ସମ୍ପର୍କ ରହିଛି। ତାଙ୍କ ମାଆ ମୀରା ନାୟାର ଜଣେ ହିନ୍ଦୁ ଏବଂ ଓଡ଼ିଶାର ରାଉରକେଲାରେ ଜନ୍ମିତ। ମୀରା ନାୟାରଙ୍କର ଜନ୍ମ ୧୯୫୭ ମସିହାରେ ହୋଇଥିଲା। ୧୮ ବର୍ଷ ଯାଏଁ ଭୁବନେଶ୍ବରରେ ରହି ପାଠ ପଢ଼ିଛନ୍ତି ମୀରା ନାୟାର୍। ଏବେ ସେ ଜଣେ ଆମେରିକୀୟ ନାଗରିକ ହୋଇଥିବା ବେଳେ, ତାଙ୍କୁ ପଦ୍ମଭୂଷଣରେ ମଧ୍ୟ ସମ୍ମାନିତ କରାଯାଇଛି। ସେ ଜଣେ ପ୍ରସିଦ୍ଧ ଚଳଚ୍ଚିତ୍ର ପ୍ରଯୋଜିକା ମଧ୍ୟ। ସେ ସଲାମ୍ ବମ୍ବେ (୧୯୮୮), ମିସିସିପି ମସଲା (୧୯୯୧), ମନସୁନ୍ ୱେଡିଂ (୨୦୦୧) ଭଳି ଚଳଚ୍ଚିତ୍ର ନିର୍ମାଣ କରିଛନ୍ତି।

ଯେତେବେଳେ ଜୋହରାନ୍‌ଙ୍କ ପିତା ମହମୁଦ୍ ମମଦାନି ଜଣେ ଉଗାଣ୍ଡା ନାଗରିକ। ସେ କଲମ୍ବିଆ ବିଶ୍ୱବିଦ୍ୟାଳୟରେ ନୃବିଜ୍ଞାନର ପ୍ରଫେସର। ମହମୁଦ୍ ମମଦାନି ୧୯୪୬ ମସିହାରେ ମୁମ୍ବାଇରେ ଜନ୍ମଗ୍ରହଣ କରିଥିଲେ। ସେ ଉଗାଣ୍ଡାର ରାଜଧାନୀ କାମ୍ପାଲାରେ ଭାରତୀୟ ପ୍ରବାସୀ ସମ୍ପ୍ରଦାୟରେ ବଢ଼ିଥିଲେ।

ଜୋହରାନ୍ ମମଦାନିଙ୍କ ପିତା, ମହମୁଦ୍ ମମଦାନି, ୧୯୭୨ ମସିହାରେ ଉଗାଣ୍ଡାର ଏକଛତ୍ରବାଦୀ ଇଦି ଅମିନଙ୍କ ଦ୍ୱାରା ବହିଷ୍କୃତ ପ୍ରାୟ ୬୦,୦୦୦ ଏସୀୟଙ୍କ ମଧ୍ୟରୁ ଜଣେ ଥିଲେ। ଜୋହରାନ୍ ମାତ୍ର ୭ ବର୍ଷ ବୟସର ହେବା ସମୟରେ ତାଙ୍କ ପରିବାର ପ୍ରଥମେ କେପ୍ ଟାଉନ୍ ଏବଂ ପରେ ନ୍ୟୁୟର୍କ ସହରରେ ବସତି ସ୍ଥାପନ କରିଥିଲେ।

୧୯୯୧ ମସିହାରେ ଉଗାଣ୍ଡାର କମ୍ପାଲାରେ ଜନ୍ମଗ୍ରହଣ କରିଥିବା ମମଦାନି ସାତ ବର୍ଷ ବୟସରେ ନ୍ୟୁୟର୍କ ଚାଲି ଯାଇଥିଲେ। ସେ ମେନରେ ବୋଡୋଇନ କଲେଜରୁ ଆଫ୍ରିକାନ ଷ୍ଟଡିଜରେ ସ୍ନାତକ ହାସଲ କରିଛନ୍ତି। ରାଜନୀତିରେ ପ୍ରବେଶ କରିବା ପୂର୍ବରୁ ଘରୋଇ ପରାମର୍ଶଦାତା ଭାବେ କାର୍ଯ୍ୟ କରୁଥିଲେ। ୨୦୨୦ରେ ନ୍ୟୁୟର୍କ ରାଜ୍ୟ ବିଧାନସଭା ନିର୍ବାଚନରେ ସେ ନିର୍ବାଚିତ ହୋଇଥିଲେ। ଚଳିତ ବର୍ଷ ପ୍ରାରମ୍ଭରେ ସେ ସିରିୟାର ଜଣେ ୨୭ ବର୍ଷୀୟା ଚିତ୍ରଶିଳ୍ପୀ ରାମା ଦୁୱାଜୀଙ୍କୁ ବିବାହ କରିଛନ୍ତି।

ନିର୍ବାଚନ ପ୍ରଚାର ସମୟରେ ମମଦାନି ମୁଖ୍ୟତଃ ଗାଜାରେ ଇସ୍ରାଏଲର ଆକ୍ରମଣକୁ ସମାଲୋଚନା କରିବା ସହ ପାଲେଷ୍ଟାୟିନୀଙ୍କ ଅଧିକାରକୁ ନେଇ ସ୍ୱର ଉତ୍ତୋଳନ କରୁଥିବା ନଜର ଆସିଥିଲେ। ନିର୍ବାଚନରେ ସେ ୨୦୨୭ ସୁଦ୍ଧା ସମସ୍ତ ଯାତ୍ରୀଙ୍କ ପାଇଁ ଭଡା ମୁକ୍ତ ସିଟି ବସ୍ ଯୋଗାଇ ଦେବା ଭଳି ପ୍ରତିଶ୍ରୁତି ଦେଇଥିଲେ। ସେ ସୋସିଆଲ ହାଉସିଙ୍ଗ ଡେଭଲପମେଣ୍ଟ ଏଜେନ୍ସି ଗଠନ କରିବାକୁ ପ୍ରତିଶ୍ରୁତି ଦେଇଥିଲେ, ଯେଉଁଥିରେ ସମସ୍ତଙ୍କୁ ସୁଲଭ ମୂଲ୍ୟରେ ଭଡା ଘର ମିଳିପାରିବ। ଏଥି ସହ ପ୍ରତି ମ୍ୟୁନିସିପାଲିଟି ଅଞ୍ଚଳରେ ଗୋଟିଏ ଲେଖାଏଁ ଗ୍ରୋସେରୀ ଷ୍ଟୋର ଖୋଲିବାକୁ କହିଥିଲେ, ଯେଉଁଠାରେ କମ ଟଙ୍କାରେ ଉତ୍ତମ ଖାଦ୍ୟ ମିଳିପାରିବ। ସେହିଭଳି ସ୍କୁଲରେ ଦିଆଯାଉଥିବା ମାଗଣା ଖାଦ୍ୟ ଭଳି ସିଟି କଲେଜମାନଙ୍କରେ ମଧ୍ୟ ଯୋଗାଇ ଦେବା ପାଇଁ ପ୍ରତିଶ୍ରୁତି ଦେଇଥିଲେ।