Jatra controversy କାହ୍ନାଙ୍କ ଡାଇଲଗ ନେଇ ଚିହିଁକିଲେ ମୀରା

ଯାତ୍ରା ବହିର ନାଁ ଜାନୱର । ଯାତ୍ରା ପାର୍ଟି ଅପେରା ଶ୍ରୀମନ୍ଦିର । କଳାକାର କାହ୍ନା ସ୍ବାଇଁ । ଯାତ୍ରା ଅଭିନୟରେ କାହ୍ନା ସାଥୀ କଳାକାରଙ୍କୁ କହୁଥିଲେ ହିଞ୍ଜଡ଼ା, ମାଇଚିଆ ଏବଂ ଆଉ କିଛି ଏହିଭଳି ଶବ୍ଦ । ବାସ୍ ଏତିକିରେ ଲାଗିଗଲା ନିଆଁ । ଏଭଳି ଡାଇଲଗ କହି କାହ୍ନା ଅପମାନିତ କରିଛନ୍ତି ବୋଲି ଅଭିଯୋଗ କଲା କିନ୍ନର ସମାଜ । ଆଉ ଯଦି କାହ୍ନା ସର୍ବସମ୍ମୁଖରେ ଏଥିପାଇଁ କ୍ଷମା ନମାଗନ୍ତି ତେବେ ତାଙ୍କୁ ଖଣ୍ଡଗିରି ମଞ୍ଚ ଚଢ଼ାଇ ଦେବୁନି କହିଛନ୍ତି କିନ୍ନର ସମାଜ ଉପଦେଷ୍ଟା ମୀରା ପରିଡ଼ା ।

ଗତକାଲି ରାତିରେ ଖଣ୍ଡଗିରି ଯାତ୍ରା ଅଞ୍ଚଳରେ ପହଞ୍ଚି ଯାଇଥିଲେ ମୀରା । ସିଧା ସିଧା କହିଥିଲେ କାହ୍ନା କ୍ଷମା ମାଗନ୍ତୁ । ମୀରାଙ୍କ କହିବା କଥା କାହ୍ନା ପୂର୍ବରୁ ବି ବାରମ୍ବାର ଏଭଳି ଆପତ୍ତିଜନକ ଡାଇଲଗ୍ କହିଛନ୍ତି । ବାରମ୍ବାର କିନ୍ନରମାନଙ୍କୁ ଅପମାନିତ କରିଛନ୍ତି । ଆଉ ତାଙ୍କୁ ଛଡ଼ା ଯିବନି । ଯଦି ଆଜି ସୁଦ୍ଧା କ୍ଷମା ନମାଗନ୍ତି ତେବେ ତାଙ୍କୁ ଖଣ୍ଡଗିରି ମଞ୍ଚ ଚଢ଼ାଇ ଦେବୁନି । 

ମୀରାଙ୍କ ଅଭିଯୋଗ ନେଇ କ୍ୟାମେରା ସାମ୍ନାରେ କିଛି କହିନଥିଲେ ବି ନିଜ ମତାମତ ଜଣାଇଛନ୍ତି ସଂପୃକ୍ତ ଯାତ୍ରା ପାର୍ଟି ମାଲିକ । ଯଦି ବିବାଦ ହେଉଛି ତେବେ ଆମେ ସେ ଡାଇଲଗ ବଦଳାଇ ଦେବୁ ବୋଲି କହିଛନ୍ତି ପାର୍ଟି ମାଲିକ । ତେବେ ଏନେଇ କଳାକାର କାହ୍ନା ସ୍ବାଇଁଙ୍କ ପ୍ରତିକ୍ରିୟା ମିଳିନଥିଲା ବେଳେ କାହ୍ନା ହିଁ କ୍ଷମା ମାଗିବେ ବୋଲି ଅଡ଼ି ବସିଛନ୍ତି ମୀରା । ଆମେ କୌଣସି ମାଲିକ ବା ଲେଖକଙ୍କୁ ଚିହ୍ନିନୁ, କାହ୍ନାଙ୍କ ମୁହଁରେ ଲାଇଲଗ ଶୁଣିଥିବାରୁ ସେ ହିଁ କ୍ଷମା ମାଗିବେ କହିଛନ୍ତି ମୀରା । ନହେଲେ ହଜାର ହଜାର କିନ୍ନର ଏକାଠି ହୋଇ ବିରାଟ ପ୍ରତିବାଦ କରିବୁ, କାହ୍ନାଙ୍କୁ ଖଣ୍ଡଗିରି ପୂରାଇ ଦେବୁନି ବୋଲି ଚେତାବନୀ ଦେଇଛନ୍ତି । 

ଭୁବନେଶ୍ବରରୁ ନିରଞ୍ଜନ ରେଡ୍ଡୀଙ୍କ ରିପୋର୍ଟ