Miraculous Recovery: ସିଂହଦ୍ବାରରେ କାନ୍ଦିଥିଲା ବାପା, କୋମାରୁ ଫେରିଲା କୁନିପୁଅ

ଏ ବାପାଟା ସେ ଦିନ ଜଗାକୁ ରାଣ ଦେଇଥିଲା । ସିଂହଦ୍ବାରେ କାନ୍ଦି କାନ୍ଦି ମଣିମା ମଣିମା ଡାକିଥିଲା । ପୁଅର ଜୀବନ ପାଇଁ ଭିକ ମାଗିଥିଲା । ଜଗତର ମାଲିକ ଏ ବାପାଟାର ଡାକ ଶୁଣିଛନ୍ତି । ତାଙ୍କ ପୁଅର ଜୀବନ ଫେରାଇ ଦେଇଛନ୍ତି । ଶତ ପ୍ରତିଶତ ପିଲାଟି ସୁସ୍ଥ ହୋଇନି ସତ, ହେଲେ କିନ୍ତୁ ଧୀରେ ଧୀରେ ସେ ଭଲ ହେଉଛି । ଏ ଦୁଃଖି ବାପାଙ୍କ ନାଁ ପ୍ରକାଶ ଭୋଇ, ଆଉ ଏ ଅସୁସ୍ଥ ପୁଅର ନାଁ ନିଖିଲ । ଦୁହେଁ ସୁଦୂର ରାଜସ୍ଥାନରୁ ଆସିଛନ୍ତି ମହାପ୍ରଭୁଙ୍କ ପାଖକୁ । ସେଦିନ ସିଂହଦ୍ବାରରେ କାନ୍ଦିଥିଲେ, ଆଜି ବଡ଼ଦାଣ୍ଡରେ ମୁରୁକି ମୁରୁକି ହସି ଜଗାର ନାଁ ଜପୁଛନ୍ତି । କାରଣ, ମହାପ୍ରଭୁ ଯେମିତି ନିଜେ ଏ ବାପାଙ୍କୁ ଶ୍ରୀମନ୍ଦିରର ଗର୍ଭଗୃହ ନିକଟକୁ ଡାକି ପୁଅର ଜୀବନ ଫେରାଇ ଦେଇଛନ୍ତି ।

ପ୍ରକାଶଙ୍କ, କହିବା କଥା ବର୍ଷେ ପୂର୍ବରୁ ତାଙ୍କ ପୁଅକୁ ଫିଡ୍ସ ମାରିଥିଲା । ଦୀର୍ଘଦିନ ଧରି ଅହମଦାବାଦର ଏକ ହସ୍ପିଟାଲରେ ପୁଅର ଚିକିତ୍ସା ଚାଲିଥିଲା । କିନ୍ତୁ ପୁଅର ସ୍ବାସ୍ଥ୍ୟରେ ଉନ୍ନତି ଆସିବା ବଦଳରେ ଅବନତି ଘଟିଲା । ଡାକ୍ତରମାନେ ହାତ ଟେକି ଦେଲେ । ବିଜ୍ଞାନ ଫେଲ୍ ମାରିବା ପରେ ମହାପ୍ରଭୁଙ୍କ ଶରଣକୁ ଗଲେ ପ୍ରକାଶ । ପୁଅର ଜୀବନ ପାଇଁ କାନ୍ଦି କାନ୍ଦି ନେହୁରା ହେଲେ । ଆଉ କାଳିଆର ପାଦୁକ ଟିକକ ପାଇ କୋମାରେ ଥିବା ପୁଅଟା ହାତଗୋଡ଼ ହଲାଇଲା । ଆଖି ଖୋଲି ଜଗା ଆଖିକୁ ଚାହିଁଲା । ମହାପୁଭୁଙ୍କ ଏ ଚମତ୍କାର ଦେଖି ଭକ୍ତଠୁ ସେବାୟତ ସମସ୍ତଙ୍କ ଆଖିରେ ଆସିଥିଲା ଭକ୍ତି ଭାର ଲୁହ । 

ପିଲାଟିର ସ୍ବାସ୍ଥ୍ୟରେ ସାମାନ୍ୟ ଉନ୍ନତି ଆସିବା ପରେ ପୁଣି ଥରେ ପୁଅକୁ ଜଗା ଦର୍ଶନ କରାଇଛନ୍ତି ବାପା । ସିଂହଦ୍ଵାର ସମ୍ମୁଖରେ ଅନନ୍ତ କୋଟି ବିଶ୍ବ ବ୍ରହ୍ମାଣ୍ଡର ଅଧିନାୟକଙ୍କୁ ପ୍ରଣିପାତ କରି ହସି ଦେଇଛନ୍ତି । ତା’ ସହ କହିଛନ୍ତି, ଖୁବଶୀଘ୍ର ମୋ ପୁଅକୁ ପୂରା ସୁସ୍ଥ କରିଦେରେ କାଳିଆ । ସେପଟେ ପିଲାଟି ଧୀରେ ଧୀରେ ସୁସ୍ଥ ହେଉଥିବାରୁ ତା’କୁ ପୁଣି ଥରେ ମେଡିକାଲରେ ଭର୍ତ୍ତି କରାଯାଇଛି