BJD Strategy: କଂଗ୍ରେସ ଆଣିଲା ସାଂଘାତିକ ଅଭିଯୋଗ;'ଦିଲ୍ଲୀରେ ନବୀନଙ୍କୁ ନେଇ ଡିଲ୍ କରିଛନ୍ତି ମାନସପୁତ୍ର'

କେଉଁ ପରିସ୍ଥିତିରେ କାହିଁକି ବଦଳିଗଲା ବିଜେଡିର ଷ୍ଟାଣ୍ଡ ? କୁଆଡ଼େ ଗଲା ସମଦୂରତା ? ସଂଖ୍ୟାଲଘୁଙ୍କ ସ୍ବାର୍ଥ ଦୃଷ୍ଟିରୁ ପ୍ରଥମ ଥର ପାଇଁ କେନ୍ଦ୍ରର ଏନଡିଏ ସରକାର ବିପକ୍ଷରେ ଯାଇ ୱକଫ୍ ବିଲ୍‌କୁ ବିରୋଧ କରିବାର ନିଷ୍ପତ୍ତିପରେ ହଠାତ୍ ୟୁଟର୍ଣ୍ଣ ନେବା ପଛର କାରଣ କଣ ?

ପ୍ରଥମଥର ପାଇଁ ବିଜେଡି ବିବାକୁନୁମୋଦିତ ଭୋଟ୍‌ର ଘଳିଆକୁ ଖୋଲା ରଖି ବିଜେପିକୁ ସମର୍ଥଦେବା ଘଟଣାକୁ ନେଇ ତେଜିଛି ରାଜନୀତି । ପିସିସି ସଭାପତି ଭକ୍ତଦାସ ସିଧାସଳଖ କହିଛନ୍ତି, ଏହା ପଛରେ ରହିଛି ବଡ଼ ଡିଲ୍ । ପାଣ୍ଡିଆନଙ୍କ ନାଁ ନନେଇ କହିଛନ୍ତି ଦିଲ୍ଲୀରେ ନବୀନଙ୍କୁ ନେଇ ଡିଲ୍ କରିଛନ୍ତି ତାଙ୍କ ମାନସପୁତ୍ର ।

ଏମିତିକି ବିଜେପି ନିକଟରେ ନବୀନଙ୍କୁ ତାଙ୍କ ମାନସପୁତ୍ର ବିକି ଦେଇଥିବା ଏବଂ ତାଙ୍କୁ ବଞ୍ଚାଇବା ପାଇଁ ନବୀନ ବିଜେପି ସହ ଏଭଳି ଡିଲ୍ କରିଥିବାର ଅଭିଯୋଗ ଆଣିଛନ୍ତି ଭକ୍ତ । ସେପଟେ ବରିଷ୍ଠ କଂଗ୍ରେସ ନେତା ପ୍ରସାଦ ହରିଚନ୍ଦନ ଆହୁରି ସାଂଘାତିକ ବୟାନ ରଖି କହିଛନ୍ତି ଇଡି-ସିବିଆଇ ଭୟରେ ନବୀନ ଏପରି ନିଷ୍ପତ୍ତି ନେଇଛନ୍ତି ।

କେନ୍ଦ୍ର ଚାପରେ ଚେପା ହୋଇ ଦିଲ୍ଲୀରୁ ଫେରିବା ପରେ ମତ ବଦଳାଇଛନ୍ତି ନବୀନ । ତେବେ ପାଣ୍ଡିଆନଙ୍କ ସହିତ ନବୀନ ଦିଲ୍ଲୀ କାହିଁକି ଯାଇଥିଲେ? ସେଠି କାହାକୁ ଭେଟିଥିଲେ, କଣ ଚର୍ଚ୍ଚା ହୋଇଥିଲା? ସେସବୁ ଏବେ ବି ରହସ୍ୟ ଭିତରେ ଥିବାବେଳେ ବିଜେଡିର ଏ ନିଷ୍ପତ୍ତିକୁ ନେଇ ଅନ୍ୟ ଚର୍ଚ୍ଚା ଜୋର ଧରିଛି । ଚର୍ଚ୍ଚା ଏହା ବି ହେଉଛି କି, ୱକଫ୍ ବିଲକୁ ସମର୍ଥନ କରି ସଂଖ୍ୟାଲଘୁ ଖ୍ରୀଷ୍ଟିଆନ୍ ସଂପ୍ରଦାୟକୁ ଖୁସ୍ କରିବାକୁ ଇଏ ବିଜେଡିର ଯୋଜନାବଦ୍ଧ ଚାଲ୍ ।

କାରଣ ରାଜ୍ୟରେ ମୁସଲିମ୍ ଭୋଟ୍ ୨.୧୪ ପ୍ରତିଶତ ଥିବା ବେଳେ ଖ୍ରୀଷ୍ଟିଆନ୍ ସଂପ୍ରଦାୟର ଭୋଟ୍ ହାର ହେଉଛି ୨.୭୭ ପ୍ରତିଶତ । ଚର୍ଚ୍ଚା ହେଉଛି ୱକଫ୍ ବିଲ୍ ଖ୍ରୀଷ୍ଟିଆନ୍ ସଂପ୍ରଦାୟକୁ ଫାଇଦା ଦେବାକୁଥିବା ଯୁକ୍ତି ରଖି ଖ୍ରୀଷ୍ଟିଆନ୍ ସଂପ୍ରଦାୟର କିଛି ତୁଙ୍ଗ ନେତା ନବୀନଙ୍କୁ ଭେଟି ଏହା ସପକ୍ଷରେ ଭୋଟ୍ ଦେବାକୁ ଅନୁରୋଧ କରିଥିଲେ ।

ତେଣୁ ଇଏ ବି ଏକ କାରଣ ବୋଲି କୁହାଯାଉଛି । ଏସବୁ ଚର୍ଚ୍ଚା ଭିତରେ ବିଜେଡିର ଏ ନିଷ୍ପତ୍ତି ଦଳର ଭବିଷ୍ୟତକୁ କେଉଁ ଦିଗକୁ ନେଉଛି, ତା’ ଉପରେ ସମସ୍ତଙ୍କ ନଜର ।

ଅଧିକ ପଢ଼ନ୍ତୁ: ରାଜ୍ୟସଭାରେ ବି ପାସ୍ ୱାକଫ୍ ବିଲ୍, ସପକ୍ଷରେ ପଡିଲା ୧୨୮ ଭୋଟ୍