ଧର୍ମେନ୍ଦ୍ର ସାହୁଙ୍କ ମୃତ୍ୟୁ ପୂର୍ବର ଅଡିଓକୁ ନେଇ ଘମାସାନ : ଗଣଶିକ୍ଷା ମନ୍ତ୍ରୀଙ୍କ ବହିଷ୍କାର ଓ ଗିରଫ ଦାବିରେ ହଲ୍ଲାବୋଲ୍

ଜିଲ୍ଲା ପରିଷଦ ସଭ୍ୟ ଧର୍ମେନ୍ଦ୍ର ସାହୁଙ୍କ ମୃତ୍ୟୁ ପୂର୍ବର ଅଡିଓକୁ ନେଇ ତେଜିଲା ରାଜନୀତି । ଘଟଣାରେ ଗଣଶିକ୍ଷା ମନ୍ତ୍ରୀ ସମୀର ଦାସଙ୍କ ସଂପୃକ୍ତି ଅଭିଯୋଗ ଆଣି ତାଙ୍କୁ ବହିଷ୍କାର ସହ ଗିରଫ କରିବାକୁ ଜୋର୍ ଧରିଛି ଦାବି । ନିମାପଡା ଓ ପିପିଲିରେ ଆଜି ବିଜେପି ପ୍ରତିବାଦ କରିଥିବା ବେଳେ ଭୁବନେଶ୍ୱର ରେ ମନ୍ତ୍ରୀଙ୍କ ଘର ଉପରକୁ ଅଣ୍ଡା ଓ ଟମାଟୋ ମାଡ କରିଛି ଛାତ୍ର କଂଗ୍ରେସ ।

ଜିଲ୍ଲା ପରିଷଦ ସଭ୍ୟ ଧର୍ମେନ୍ଦ୍ର ସାହୁ ମୃତ୍ୟୁ ମାମଲାରେ କୁହୁଳିଲା ପ୍ରତିବାଦର ନିଆଁ । ଘଟଣାରେ ମନ୍ତ୍ରୀ ସମୀର ଦାସଙ୍କ ସଂପୃକ୍ତି ଅଭିଯୋଗ ଆଣି ରାସ୍ତାକୁ ଓହ୍ଲାଇଛି ଛାତ୍ର କଂଗ୍ରେସ । ମନ୍ତ୍ରୀ ବିରୋଧୀ ନାରା, ଜୋରଦାର ପ୍ରତିବାଦ ସମୀର ଦାସଙ୍କ ସରକାରୀ ବାସଭବନକୁ ଧସେଇ ପଶିବାକୁ ଉଦ୍ୟମ କରିଥିଲେ ଉତ୍ତେଜିତ କର୍ମୀ । ବିରୋଧ ସେତିକିରେ ଅଟକିନି, ମନ୍ତ୍ରୀଙ୍କ ଘରକୁ ଅଣ୍ଡା ଓ ଟମାଟୋ ମାଡ଼ ବି ହୋଇଛି । ସମୀର ଦାସଙ୍କ ଇସ୍ତଫା ସହ ଗିରଫ ଦାବି କରିଛି ଛାତ୍ର କଂଗ୍ରେସ । ଏପରିକି ମନ୍ତ୍ରୀ ସମୀର ଦାସଙ୍କୁ ମୁଖ୍ୟମନ୍ତ୍ରୀ ସୁରକ୍ଷା ଦେଉଥିବା ଅଭିଯୋଗ କରିବା ସହ ୭ ଦିନ ଭିତରେ ଗିରଫ କରାନଗଲେ ନବୀନ ନିବାସ ଘେରିବାକୁ ଛାତ୍ର କଂଗ୍ରେସ ଚେତାବନୀ ଦେଇଛି ।

ରାଜଧାନୀର କୁହୁଳା ନିଆଁ ବ୍ୟାପିଛି ପୁରୀ ନିମାପଡ଼ାକୁ । ଏଠି ବି ତେଜିଛି ମନ୍ତ୍ରୀ ବିରୋଧୀ ନାରା । ନିମାପଡା ବିଜେପି ପକ୍ଷରୁ ଶତାଧିକ କର୍ମୀ ଜୟଶ୍ରୀ ଛକ ଠାରେ ପ୍ରତିବାଦ କରିଛନ୍ତି । ନିମାପଡ଼ା-ପିପିଲି-ବାଲିପାଟଣା ରାସ୍ତା ଅବରୋଧ କରିବା ସହ ମନ୍ତ୍ରୀଙ୍କ କୁଶପୁତ୍ତଳିକା ଜାଳିଛନ୍ତି । ଦାବି କରିଛନ୍ତି, ମନ୍ତ୍ରୀ ସମୀର ଦାସଙ୍କୁ ବହିଷ୍କାର କର, ଗିରଫ କର। ସେହିପରି ପୁରୀ ସାତସଂଖ ଠାରେ ଜାତୀୟ ରାଜପଥ ଅବରୋଧ କରି ପ୍ରତିବାଦ ଜଣାଇଥିଲେ ଦଳୀୟ ନେତା ଓ ଶତାଧିକ କର୍ମୀ । ଏପଟେ ରାଜ୍ୟ ବିଜେପି ପ୍ରେସମିଟ୍ କରି ମନ୍ତ୍ରୀ ସମୀର ଦାସଙ୍କ ଇସ୍ତଫା ଦାବି କରିଛି । ଏପରିକି ମନ୍ତ୍ରୀଙ୍କ ବିରୋଧରେ ଫୌଜଦାରୀ ମକଦ୍ଦମା ରୁଜୁ କରିବାକୁ ଦାବି କରିଛି ଦଳ ।

ଏପଟେ ୪ ଦିନ ହେଲା ତଦନ୍ତରେ ଲାଗିଛି ପୋଲିସ । ପତ୍ନୀ, ପରିବାର ସଦସ୍ୟ, ରୋଷେୟା, ଡ୍ରାଇଭର, ଜଣ ଜଣଙ୍କୁ ମାରାଥନ୍ ଜେରା କରାଯାଉଛି । ଏପରିକି ଧର୍ମେନ୍ଦ୍ରଙ୍କ ଗାଁ ଗୋପକୁ ମଧ୍ୟ ପୋଲିସର ଏକ ସ୍ୱତନ୍ତ୍ର ଟିମ୍ ଯିବ ମୃତ୍ୟୁ ପୂର୍ବରୁ ଧର୍ମେନ୍ଦ୍ର ଏକାଧିକ ଲୋକଙ୍କ ସହ ଫୋନରେ କଥା ହୋଇଥିବାରୁ ପୋଲିସ ସେମାନଙ୍କୁ ନୋଟିସ କରି ପଚରାଉଚରା କରିପାରେ । ଏଥିସହ ଭାଇରାଲ ହେଉଥିବା ଅଡିଓର ସତ୍ୟାସତ୍ୟ ଯାଂଚ୍ କରାଯିବ ଏବଂ ତଦନ୍ତ ପରେ ସବୁ ସାମ୍ନାକୁ ଆସିବ ବୋଲି ଡିସିପି କହିଛନ୍ତି ।

ସସପେନ୍ସରେ ଥିବା ଧର୍ମେନ୍ଦ୍ରଙ୍କ ମୃତ୍ୟୁ ମାମଲାରେ ଝଡ ସୃଷ୍ଟି କରିଛି । ସାମ୍ନାକୁ ଆସିଥିବା ଏକ ଅଡିଓ ଯେଉଁଥିରେ ରହିଛି ଗଣଶିକ୍ଷା ମନ୍ତ୍ରୀ ସମୀର ଦାସଙ୍କ ନାଁ । ଭାଇରାଲ ହେଉଥିବା ଏହି ଅଡିଓରେ ମୃତ୍ୟୁ ପୂର୍ବରୁ ଧର୍ମେନ୍ଦ୍ର, ବନ୍ଧୁ ଅକ୍ଷୟଙ୍କ ସହ ମୋବାଇଲେ କଥା ହୋଇଥିବା କୁହାଯାଉଛି । ଏହି ଅଡିଓକୁ ଆଧାର କରି ମନ୍ତ୍ରୀ ସମୀର ଦାସ ଇସ୍ତଫା ଦେବା ସହ ତଦନ୍ତର ସାମ୍ନା କରନ୍ତୁ ବୋଲି ଗତକାଲି କହିଥିଲେ ବିଜେପି ନେତ୍ରୀ ପ୍ରଭାତୀ ପରିଡା ।

ଧର୍ମେନ୍ଦ୍ରଙ୍କ ମୃତ୍ୟକୁ ୪ ଦିନ ବିତିଥିଲେ ବି ରହସ୍ୟ ଭିତରେ ରହିଛି ପୁରା ଘଟଣା । ମୃତ୍ୟୁ  ପାଇଁ ଧର୍ମେନ୍ଦ୍ର ତାଙ୍କ ପତ୍ନୀ, ମନ୍ତ୍ରୀ ସମୀର ଦାସ, ସମ୍ପର୍କୀୟ ଏବଂ ଅନ୍ୟ କିଛି ନିର୍ଦ୍ଦିଷ୍ଟ ଲୋକଙ୍କୁ ଦାୟୀ କଲେ କାହିଁକି ? ଧର୍ମେନ୍ଦ୍ରଙ୍କ ମୃତ୍ୟୁ ପଛରେ ଏମାନଙ୍କର କଣ ରହିଛି ଭୂମିକା ? ଧର୍ମେନ୍ଦ୍ର ନାଁ ନେଇଥିବା ବ୍ୟକ୍ତିଙ୍କୁ ପଚରାଉଚରା କରିବ କି ପୋଲିସ? ମୃତ୍ୟୁ ପୂର୍ବରୁ ଧର୍ମେନ୍ଦ୍ର ଇଙ୍ଗିତ କରିଥିବା ରାଜନୈତିକ ଇସ୍ୟୁ କଣ? ଏବଂ ଏହା ପଛରେ କିଏ? ଏବେ ଏସବୁ ରହସ୍ୟ ଉପରୁ ପରଦା ହଟାଇବା ପୋଲିସ ପାଇଁ ଚ୍ୟାଲେଂଜ୍ ...