LIVE TV
ବଲାଙ୍ଗୀରର ଚା’ ଦିଲ୍ଲୀରେ କଲା କମାଲ । ୧୦ ବର୍ଷ ତଳେ ମୋଦିଙ୍କୁ ଦେଖିବା ପାଇଁ ବାପାଙ୍କ ଠାରୁ ମାଡ଼ ଖାଇଥିଲେ । ଏବେ ପ୍ରଧାନମନ୍ତ୍ରୀଙ୍କୁ ଚା’ ପିଆଇ ଚର୍ଚ୍ଚାରେ ରହିଛନ୍ତି ଓଡ଼ିଆ ପୁଅ । ଦିନେ ତାଙ୍କ ପାଇଁ ଯାହା ଥିଲା ସ୍ବପ୍ନ, ଏବେ ନେଲା ବାସ୍ତବ ରୂପ । ସ୍ବପ୍ନ ଯେତେବେଳେ ବାସ୍ତବ ରୂପ ନିଏ ସେତେବେଳର ଖୁସି କେବଳ ଅନୁଭବୀ ହିଁ ଜାଣିପାରେ । ଯାହା ଆଜି ଘଟିଛି ବଲାଙ୍ଗୀର ସହରର ଜଣାଶୁଣା ଚା’ ଦୋକାନୀ ସୋମନାଥଙ୍କ ସହ । ଓଡ଼ିଶା ପର୍ବରେ ପ୍ରଧାନମନ୍ତ୍ରୀ ମୋଦିଙ୍କୁ ଚା’ ପିଆଇ ଚର୍ଚ୍ଚାରେ ରହିଛନ୍ତି ସୋମନାଥ ।
ତେବେ ସୋମନାଥ ଓଟିଭିକୁ ସ୍ବତନ୍ତ୍ରସାକ୍ଷତକାର ଦେଇ ସେଦିନର କାହାଣୀ କହିଛନ୍ତି, ମୋଦିଙ୍କୁ ଭେଟିବା ପାଇଁ ମୋତେ ଭୋକ, ଶୋଷ ନଥିଲା । କାରଣ ମୋଦିଙ୍କୁ ଭେଟିବା ପାଇଁ ୧୦ ବର୍ଷ ଅପେକ୍ଷା କରିଥିଲି । ଏମିତିକି ବାପାଙ୍କ ଠାରୁ ମାଡ଼ ଖାଇଥିଲି ବୋଲି କହିଛନ୍ତି । ୧୦ ବର୍ଷ ତଳେ ବରଗଡ଼ ଆସିଥିଲେ ମୋଦି, ଚା’ ଦୋକାନରେ ବସାଇଥିଲେ ବାପା । ମୁଁ କିନ୍ତୁ ଚା’ ଦୋକାନ ଛାଡ଼ି ଟ୍ରେନ୍ ଯୋଗେ ଯାଇଥିଲି ଦେଖିବା ପାଇଁ ଯାହା ଫଳରେ ପ୍ରବଳ ମାଡ଼ ମାରିଥିଲେ ବାପା । କିନ୍ତୁ ମୁଁ ଆଜି ୧୦ ବର୍ଷ ପରେ ମୋଦିଙ୍କୁ ଚା’ ପିଆଇ ପାରିଛି । ଯାହା ମୋ ପାଇଁ ସବୁଠୁ ବଡ଼ ସଫଳତା ବୋଲି କହିଛନ୍ତି । ଚା’ ପିଇବା ସହ ସୋମନାଥଙ୍କୁ ପ୍ରଶାଂସ କରିଥିଲେ ପ୍ରଧାନମନ୍ତ୍ରୀ ।
Also Read
ଅଧିକ ପଢ଼ନ୍ତୁ: ମିସେସ୍ ପାଣ୍ଡିଆନ୍ଙ୍କ ଛୁଟି ବାତିଲ୍; ଆଜିଠୁ କାର୍ଯ୍ୟରେ ଯୋଗଦେଲେ
ଖାଲି ପ୍ରଧାନମନ୍ତ୍ରୀ ମୋଦି ନୁହଁନ୍ତି ବରଂ ଦେଶର ରାଷ୍ଟ୍ରପତି ଦୌପ୍ରଦୀ ମୁର୍ମୁ ବି ସୋମନାଥଙ୍କ ଟି-ଷ୍ଟଲ୍ ବୁଲିବା ସହ ତାଙ୍କୁ ପ୍ରଶାଂସ କରିଥିଲେ । ତେବେ ସୋମନାଥ ଭବିଷ୍ୟତକୁ ନେଇ ବଡ଼ ଯୋଜନା ରଖିଛନ୍ତି । ମୋଦିଙ୍କୁ ଭେଟିବା ପରେ ବେଶ୍ ଅନୁପ୍ରାଣିତ ହୋଇଛନ୍ତି ବୋଲି କହିଛନ୍ତି ସୋମନାଥ । ତେବେ ପ୍ରଧାନମନ୍ତ୍ରୀଙ୍କୁ ମାଟି କପ୍ରେ ଚା’ ବଢ଼ାଇବା ବେଳେ ସୋମନାଥଙ୍କ ହାତ ଥରିଥିଲା ବୋଲି ସେ ଭାବବିହ୍ୱଳ ହୋଇ କହିଛନ୍ତି।
ତେବେ ଜବାହାରଲାଲ ନେହେରୁ ଷ୍ଟାଡିୟମରେ ଆୟୋଜିତ ତିନି ଦିନିଆ ଓଡ଼ିଶା ପର୍ବ ୨୦୨୪ରେ ସାମିଲ ହୋଇଥିଲେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଓଡ଼ିଶା ପର୍ବରେ ପ୍ରଧାନମନ୍ତ୍ରୀଙ୍କୁ ଭବ୍ୟ ସ୍ୱାଗତ ସମ୍ବର୍ଦ୍ଧନା କରିଥିଲେ । ନଭେମ୍ବର ୨୨ରୁ ୨୪ ଯାଏଁ ତିନି ଦିନିଆ କାର୍ଯ୍ୟକ୍ରମ ଆୟୋଜିତ ହୋଇଥିଲା । ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓଡିଶା ପର୍ବରେ ସାମିଲ ହେବା ସମୟରେ ପ୍ରଧାନମନ୍ତ୍ରୀଙ୍କୁ ପାରମ୍ପାରିକ ବାଦ୍ୟ ଯନ୍ତ୍ର ବଜାଇ ଶାସ୍ତ୍ରୀୟ ସଙ୍ଗୀତ ସହିତ ଭବ୍ୟ ସ୍ୱାଗତ ସମ୍ୱର୍ଦ୍ଧନା ଦିଆଯାଇଥିଲା । ଏହି ସମୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଦୁଇ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଏବଂ ଅଶ୍ୱିନୀ ବୈଷ୍ଣବଙ୍କ ସହିତ ବିଭିନ୍ନ ଷ୍ଟଲ ବୁଲିବା ସହିତ ଚା’ ପିଇଥିଲେ ।
ଓଡ଼ିଶା ପର୍ବରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଉଦ୍ବୋଧନ ଦେଇ ଓଡ଼ିଶା ପର୍ବକୁ ଆସି ଗର୍ବିତ ବୋଲି କହିଥିଲେ ପ୍ରଧାନମନ୍ତ୍ରୀ । ସ୍ୱାଧୀନତା ଆନ୍ଦୋଳନରେ ଅନେକ ଓଡ଼ିଆ ବୀରଙ୍କ ଅବଦାନ ରହିଛି । ପାଇକ ବିଦ୍ରୋହ ଏହାର ଏକ ଉଦାହରଣ । ଓଡ଼ିଆ ଝିଅ ଦ୍ରୌପଦୀ ମୁର୍ମୁ ଦେଶର ରାଷ୍ଟ୍ରପତି, ଏହା ଗର୍ବର ବିଷୟ । ୨୦୩୬ରେ ଓଡ଼ିଶା ରାଜ୍ୟ ସ୍ଥାପନର ୧୦୦ ବର୍ଷ ପୂର୍ତ୍ତି ପାଳିବ । ଦିନ ଥିଲା ପୂର୍ବ ଭାରତକୁ ପଛୁଆ ମନେ କରାଯାଉଥିଲା । ପୂର୍ବ ଭାରତକୁ ବିକାଶର ଇଞ୍ଜିନ୍ ମନେ କରି ଗତବର୍ଷ ଅପେକ୍ଷା ଏଥର ଓଡ଼ିଶାକୁ ୩୦% ଅଧିକ ବଜେଟ୍ ଦିଆଯାଇଛି ବୋଲି କହିଥିଲେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ।
