Biju Jayanti: 'ବିଜୁ ବାବୁ ମତେ ୨୧ ଦିନ ଜେଲରେ ପୁରେଇଥିଲେ', ବାହାରିବା ପରେ ମୁଁ ତାଙ୍କୁ କହିଲି...

ଭୁବନେଶ୍ୱର ଜୟଦେବ ଭବନରେ ମହାନ୍ ଜନନାୟକ ବିଜୁ ପଟ୍ଟନାୟକଙ୍କ ରାଜ୍ୟସ୍ତରୀୟ ଜୟନ୍ତୀ ପାଳିତ ହୋଇଯାଇଛି । ଏହି କାର୍ଯ୍ୟକ୍ରମରେ ଯୋଗଦେଇ ଉପମୁଖ୍ୟମନ୍ତ୍ରୀ ତଥା କୃଷି ଓ କୃଷକ ସଶକ୍ତି କରଣ ଓ ଶକ୍ତି ମନ୍ତ୍ରୀ କନକବର୍ଦ୍ଧନ ସିଂହଦେଓ ବିଜୁ ବାବୁଙ୍କ ସହିତ ତାଙ୍କର ବ୍ୟକ୍ତିଗତ ରାଜନୈତିକ ଅନୁଭବକୁ ବର୍ଣ୍ଣନା କରି କହିଥିଲେ, ବିଜୁ ବାବୁ ସବୁବେଳେ ତୃଣମୂଳ ସ୍ତରର ଲୋକଙ୍କ ସେବା କରିବା ଉପରେ ଗୁରୁତ୍ବ ଆରୋପ କରୁଥିଲେ ।

ସେ ଏହି ଅବସରରେ ବିଜୁ ବାବୁଙ୍କ କଥା ମନେପକେଇ ନିଜ ଜୀବନରେ ଘଟିଥିବା ଏକ ସୁନ୍ଦର କାହାଣୀର ଅବତାରଣାକରି କହିଥିଲେ, 'ମୁଁ ବିଜୁ ବାବୁଙ୍କ ଘରକୁ ଯାଇଥିଲି । ବିଜୁ ବାବୁ ମତେ ଏବଂ ପତ୍ନୀ ସଂଗୀତାଙ୍କୁ ଜଳଖିଆ ଖାଇବାକୁ ଦେଇ କହିଲେ ତୋତେ ଆରେଷ୍ଟ କରିବି । ମୁଁ କହିଲି ମୁଁ ଆଇନରୁ ଉର୍ଦ୍ଧରେ ନୁହେଁ । ଯଦି କିଛି ଭୁଲ କରିଛି ତେବେ ମତେ ଆରେଷ୍ଟ କରନ୍ତୁ । ତା'ପରେ ମୁଁ ଘରକୁ ଆସିବା ପରେ ପୋଲିସ ଆରେଷ୍ଟ କଲା । ୨୧ ଦିନ ଜେଲରେ ରହିଲି ।  ଜେଲରୁ ବାହାରିବା ପରେ ମୋ ଦାଦା ବିକ୍ରମ କେଶରୀ ସିଂଦେଓଙ୍କୁ କହିଲି ମତେ ବିଜୁ ବାବୁଙ୍କୁ ଭେଟାଓ ।  ମୁଁ ସ୍ତ୍ରୀକୁ କହିଲି ମୁଁ ଆଜି ବୁଢାକୁ ଶୁଣେଇକି ଆସିବି ।

ବିକ୍ରମ କେଶରୀ ଦେଓ ମୋତେ ବିଜୁ ବାବୁଙ୍କ ପାଖକୁ ନେଇକି ଗଲେ । କିନ୍ତୁ, ବିଜୁ ବାବୁ କହିଲେ ତୋତେ ମୁଁ ଫ୍ରିରେ ପବ୍ଲିସିଟି ଦେଲି । ଯାହା ଦଳ ତୋତେ ଦେଇ ପାରିନଥା'ନ୍ତା। ମୁଁ ତାଙ୍କୁ ଧନ୍ୟବାଦ ଦେଲି । ଆଉ କହିଲି ମୁଁ ଆପଣଙ୍କୁ ବିରୋଧ କରୁନି ଖାଲି କହୁଛି ଯେ ଖାଲି ବିଜୁ ବାବୁଙ୍କ ନାଁରେ ଓଡ଼ିଶାରେ ଭୋଟ ନାହିଁ। ବିଜେପିର ଅସ୍ତିତ୍ୱ ଅଛି। ତା'ପରେ ବିଜୁ ବାବୁ ମୋତେ କୁଣ୍ଢେଇ ପକେଇଲେ  । ୧୯୯୫ରେ ଏକପାଖିଆ ଭାବେ ଜିତିକି ଆସିଲି ।

ଅପରପକ୍ଷେ ଏହି କାର୍ଯ୍ୟକ୍ରମରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ କହିଥିଲେ  ବିଜୁ ବାବୁ ଶିଳ୍ପ କ୍ଷେତ୍ରକୁ ବହୁତ ପ୍ରାଧାନ୍ୟ ଦେଉଥିଲେ । ସେ ନିଜେ ଅନେକ କାରଖାନା ପ୍ରତିଷ୍ଠା କରିଥିଲେ ମଧ୍ୟ ପରବର୍ତ୍ତୀ ସମୟରେ ସେସବୁକୁ ସରକାରଙ୍କୁ ଦେଇ ଦେଇଥିଲେ । ବୋଧହୁଏ ଏଭଳି ନିଷ୍ପତ୍ତି ନେବାରେ, ସେ ଥିଲେ ବିଶ୍ବର ଏକମାତ୍ର ବ୍ୟକ୍ତିତ୍ବ। ଓଡିଶାକୁ ଶିଳ୍ପ କ୍ଷେତ୍ରରେ, ପଞ୍ଚାୟତିରାଜ କ୍ଷେତ୍ରରେ, ମହିଳା ସଶକ୍ତିକରଣ କ୍ଷେତ୍ରରେ ତାଙ୍କର ଚିନ୍ତାଧାରା ଥିଲା ଅନନ୍ୟ ।

ଆଜି ଆମ ସରକାର ବିଜୁ ବାବୁଙ୍କ ସେହି ପଥକୁ ଅନୁସରଣ କରୁଛି । ତାଙ୍କ ମାର୍ଗରେ ପରିଚାଳିତ ହୋଇ ଏକ କୋଟିରୁ ଅଧିକ ମହିଳାଙ୍କୁ ସୁଭଦ୍ରା ଯୋଜନାରେ ସାମିଲ କରି ବିଜୁ ବାବୁଙ୍କ ମହିଳା ସଶକ୍ତିକରଣର ସ୍ବପ୍ନକୁ ସାକାର କରିବାକୁ ଯାଉଛୁ । 

ଅନ୍ୟପଟେ ନବୀନ ପଟ୍ଟନାୟକଙ୍କୁ ନିମନ୍ତ୍ରଣ କରାଯାଇଥିଲେ ମଧ୍ୟ ସେ ନଆସିବାରୁ ମୁଖ୍ୟମନ୍ତ୍ରୀ ବିରୋଧୀ ଦଳ ନେତା ନବୀନଙ୍କୁ ସମାଲୋଚନା କରି କହିଛନ୍ତି ବିଜୁ ବାବୁଙ୍କ ଜୟନ୍ତୀକୁ ଯେଉଁମାନେ ଆସି ନାହାନ୍ତି ସେମାନେ ପାପ କରିଛନ୍ତି ।

ଅଧିକ ପଢ଼ନ୍ତୁ: ରାଜା ଚକ୍ରଙ୍କୁ ଘାଣ୍ଟୁଛି EOW, ୨୦ ଗାଡ଼ି ଜବତ ଓ ୨୦୦ ଆକାଉଣ୍ଟ ଠାବ