Sonia Gandhi: ରାଷ୍ଟ୍ରପତିଙ୍କ ପ୍ରତି ଅପମାନଜନକ ମନ୍ତବ୍ୟ ପ୍ରସଙ୍ଗ, ସୋନିଆ ଗାନ୍ଧିଙ୍କ ବିରୋଧରେ ସ୍ବାଧିକାର ଭଙ୍ଗ ନୋଟିସ୍

ରାଷ୍ଟ୍ରପତିଙ୍କ ପ୍ରତି ଅପମାନଜନକ ମନ୍ତବ୍ୟ ପ୍ରସଙ୍ଗରେ ଅଡ଼ୁଆରେ ସୋନିଆ ଗାନ୍ଧି । କଂଗ୍ରେସ ସଂସଦୀୟ ଦଳ ଅଧ୍ୟକ୍ଷା ସୋନିଆ ଗାନ୍ଧିଙ୍କ ବିରୋଧରେ ସଂସଦରେ ସ୍ବାଧିକାରଭଙ୍ଗ ନୋଟିସ୍ ଆଣିଲେ ବିଜେପି ସାଂସଦ । ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ସଂପର୍କରେ ଅପମାନଜନକ ଓ ନିନ୍ଦନୀୟ ମନ୍ତବ୍ୟ ଦେଇ, ସୋନିଆ ଦେଶର ସର୍ବୋଚ୍ଚ କାର୍ଯ୍ୟାଳୟର ଗରିମା କ୍ଷୁର୍ଣ୍ଣ କରିଥିବା ଅଭିଯୋଗ କରିଛି ବିଜେପି । ତେଣୁ ଘଟଣାକୁ ଗୁରୁତ୍ବର ସହ ନେଇ, ରାଜ୍ୟସଭା ସାଂସଦ ସୋନିଆଙ୍କ ବିରୋଧରେ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ନେବା ପାଇଁ ଉପରାଷ୍ଟ୍ରପତିଙ୍କୁ ଚିଠି ଲେଖିଛନ୍ତି ବିଜେପି ସାଂସଦ ।

ରାଷ୍ଟ୍ରପତିଙ୍କ ସଂପର୍କରେ ଅସମ୍ମାନସୂଚକ ଶବ୍ଦ ପ୍ରୟୋଗ ପାଇଁ ସ୍ବାଧୀନ ସାଂସଦ ତଥା କଂଗ୍ରେସ ସମର୍ଥକ ପପ୍ପୁ ଯାଦବଙ୍କ ବିରୋଧରେ ମଧ୍ୟ ବିଜେପି ସାଂସଦ ମାନଙ୍କ ପକ୍ଷରୁ ସ୍ବାଧୀକାର ଭଙ୍ଗ ନୋଟିସ୍ ଅଣାଯାଇଛି । ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କୁ ସଂସଦ ବାହାରେ ପୁଅର୍ ଲେଡି ବା ବିଚାରି ବୋଲି କହି ତାଚ୍ଛଲ୍ୟଭରା ମନ୍ତବ୍ୟ ଦେଇଥିଲେ ସୋନିଆ । ପପ୍ପୁ ଯାଦବ ତାଙ୍କୁ ଷ୍ଟାମ୍ପ ବୋଲି କହିବା ସହ ତାଙ୍କୁ କେବଳ ଲଭ୍ ଲେଟର୍ ପଢ଼ିବାକୁ ପଡ଼େ ବୋଲି ମନ୍ତବ୍ୟ ରଖିଥିଲେ, ଯାହାକୁ ନେଇ ବିବାଦ ଉପୁଜିଛି ।

ଅଧିକ ପଢ଼ନ୍ତୁ: ଦିଲ୍ଲୀ ବିଧାନସଭା ପଚାର ଶେଷ, ଦିଲ୍ଲୀ ଶିକ୍ଷା ମଡେଲର ପୋଲ୍ ଖୋଲିଦେଲେ ମୋଦି

ରାଷ୍ଟ୍ରପତିଙ୍କୁ ନେଇ ସୋନିଆ ଗାନ୍ଧୀଙ୍କ ଏଭଳି ମନ୍ତବ୍ୟ ପରେ ସଂସଦୀୟ ବ୍ୟାପାର ମନ୍ତ୍ରୀ କିରଣ ରିଜିଜୁ ତୁରନ୍ତ ପ୍ରତିକ୍ରିୟା ପ୍ରକାଶ କରି ଉଭୟ ସୋନିଆ ଗାନ୍ଧି ଓ କଂଗ୍ରେସ କ୍ଷମାପ୍ରାର୍ଥନା କରନ୍ତୁ ବୋଲି ଦାବି କରିଥିଲେ । ପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏ ଘଟଣାରେ ତୀବ୍ର ପ୍ରତିକ୍ରିୟା ପ୍ରକାଶ କରିଥିଲେ । ମୋଦି କହିଥିଲେ, ରାଜକୀୟ ପରିବାର ସଦସ୍ୟ, ରାଷ୍ଟ୍ରପତିଙ୍କୁ ଅପମାନିତ କରିବା ଆରମ୍ଭ କରିଛନ୍ତି । ଏହା ଦେଶର ୧୦ କୋଟି ଆଦିବାସୀଙ୍କ ପ୍ରତି ଅପମାନ ବୋଲି କହିଥିଲେ ମୋଦି ।

ସେପଟେ ଝିଅ ପ୍ରିୟଙ୍କା ଏ ମାମଲାରେ ସୋନିଆଙ୍କୁ ସମର୍ଥନ କରି ଏହାକୁ ମିଡିଆ ଟ୍ବିଷ୍ଟ ବୋଲି ମତ ରଖିଥିଲେ । ରାଷ୍ଟ୍ରପତିଙ୍କ ଉଦ୍ଦେଶ୍ୟରେ ସୋନିଆ ଗାନ୍ଧିଙ୍କ ଏଭଳି ବୟାନ ଆଦୌ ଗ୍ରହଣୀୟ ନୁହେଁ ବୋଲି ଖୋଦ୍ ରାଷ୍ଟ୍ରପତି ଭବନ ପକ୍ଷରୁ କୁହାଯାଇଥିଲା । ଜାରି କରାଯାଇଥିବା ବିବୃତ୍ତିରେ କୁହାଯାଇଥିଲା ଅଭିଭାଷଣ ରଖିବାବେଳେ ରାଷ୍ଟ୍ରପତି ଥକି ଯାଇନଥିଲେ ବରଂ ସମାଜର ଅବହେଳିତ, ମହିଳା ଓ ଚାଷୀଙ୍କ ଉଦ୍ଦେଶ୍ୟରେ ବାର୍ତ୍ତା ରଖିଥିଲେ ।

ଅଧିକ ପଢ଼ନ୍ତୁ: କାଳ ସାଜିଲା ଚୋରା ପୀରତି, ଶେଷରେ ଲୋନ୍ ନେଇ ନିଜ ଶାଳୀକୁ ହତ୍ୟାକଲା ଭିଣୋଇ