LIVE TV
ସିରିଆରେ ଶେଷ ହୋଇଛି ଅସଦଙ୍କ ହିଟଲର୍ ରାଜ୍ ! ଶେଷରେ ରାଷ୍ଟ୍ରପତି ବଶର ଅଲ-ଅସଦଙ୍କ ପତନ ହୋଇଛି। ଅସଦ ତାଙ୍କ ଶାସନ କାଳରେ ଅନେକ ଲୋକଙ୍କ ଉପରେ ଅତ୍ୟାଚାର କରିଛନ୍ତି। ସାମାନ୍ୟ ଅପରାଧ ପାଇଁ ଲୋକଙ୍କୁ ଜେଲର କାଳ କୋଠରୀରେ ବନ୍ଦୀ କରାଯାଉଥିଲା। ତେବେ ଜେଲରେ ଥିବା ଅନେକ ଲୋକଙ୍କ ଜୀବନ ଯାଇଛି। ଅସଦଙ୍କ ଶାସନ ଶେଷ ହେବା ପରେ ଜେଲରୁ ମୃତଦେହଗୁଡ଼ିକୁ ବାହାର କରାଯାଉଛି। ହେଲେ ଏବେ ମୃତଦେହ ସବୁ ଚିହ୍ନିବା ଅସମ୍ଭବ ହୋଇପଡିଛି। ଏହାର କାରଣ ଜାଣିଲେ ଆପଣ ବି ଆଶ୍ଚର୍ଯ୍ୟ ହୋଇଯିବେ।
ବଶର ଅଲ-ଅସଦ ଦେଶ ଛାଡ଼ି ପଳାୟନ କରିବା ଖବର ମିଳିବା ପରେ ଲୋକମାନେ ସେଲିବ୍ରେସନ ଆରମ୍ଭ କରିଦେଇଛନ୍ତି। ତାଙ୍କ ଜୁଲୁମ ସହୁଥିବା ଲୋକଙ୍କୁ ମିଳିଛି ଆଶ୍ୱସ୍ତି। ବହୁ ସଂଖ୍ୟକ ଲୋକ ସେମାନଙ୍କ ସଂପର୍କୀୟ ଓ ଆତ୍ମୀୟ ସ୍ୱଜନଙ୍କ ମୃତଦେହ ସଂଗ୍ରହ କରିବା ପାଇଁ ଶବ ବ୍ୟବଚ୍ଛେଦ ଗୃହରେ ପହଞ୍ଚିଛନ୍ତି। ତେବେ ମୃତଦେହର ଅବସ୍ଥା ଏପରି ଯେ ସେମାନଙ୍କୁ ଚିହ୍ନିବା କଷ୍ଟକର ହୋଇପଡୁଛି। ସମାନ ଅବସ୍ଥାରେ ମହମ୍ମଦ ଚୌବେ ନାମକ ଜଣେ ବ୍ୟକ୍ତିଙ୍କ ମୃତଦେହ ମିଳିଥିଲା। ଏପରିକି ତାଙ୍କ ଆଖି ବାହାରିଯାଇଥିଲା। ଯାହା ଜଣପଡୁଛି ଚିତ୍କାର କରି କରି ତାଙ୍କର ମୃତ୍ୟୁ ହୋଇଥାଇପାରେ। ଆକଳନ ଅନୁଯାୟୀ, ୨୦୧୧ ମସିହାରୁ ସିରିଆରେ ୧.୫ ଲକ୍ଷ ଲୋକଙ୍କୁ ବନ୍ଦୀ କରି ରଖାଯାଇଛି। ଯେଉଁମାନେ ବଶର ଅଲ-ଅସଦଙ୍କ ବିରୋଧରେ ସ୍ୱର ଉତ୍ତୋଳନ କରିଥିଲେ ।
Also Read
ପାଞ୍ଚ ବର୍ଷ ପୂର୍ବେ ଚୌବେଙ୍କୁ ଜେଲରେ ବନ୍ଦୀ କରାଯାଇଥିଲା। ସେ ରାଷ୍ଟ୍ରପତି ଅସଦଙ୍କ ଦ୍ୱାରା ନିର୍ମିତ ଏକ କାରାଗାରରେ ଥିଲେ, ଯେଉଁଠି କାହାର ପତ୍ତାବି ମିଳେନି। ଅସଦ ସରକାର ସାରା ଦେଶରେ ଏଭଳି ବନ୍ଦୋବସ୍ତ କେନ୍ଦ୍ର ଏବଂ ଜେଲ ନିର୍ମାଣ କରିଥିଲେ, ଯାହା ବିଷୟରେ ସାଧାରଣ ଲୋକ ମଧ୍ୟ ଜାଣି ନ ଥିଲେ। ଏହି ଜେଲରେ ରହୁଥିବା ଲୋକଙ୍କ ମୃତ୍ୟୁ ପରେ ମଧ୍ୟ ସେମାନଙ୍କ ମୃତଦେହ ବାହାରକୁ ଅଣାଯାଇନଥାଏ। ବର୍ତ୍ତମାନ ଅସଦ ସରକାରଙ୍କ ପତନ ପରେ ସିରିଆର ଲୋକମାନେ ଏହି ଶବଗୁଡ଼ିକର ଫଟୋ ସାରା ବିଶ୍ୱରେ ସେୟାର କରୁଛନ୍ତି। ସେମାନେ ଆଶା କରୁଛନ୍ତି ହୁଏତ ମୃତ ବ୍ୟକ୍ତିଙ୍କ ସଂପର୍କୀୟ ଶେଷ ଥର ପାଇଁ ସେମାନଙ୍କ ପ୍ରିୟଜନଙ୍କୁ ଦେଖିପାରିବେ ।
ଅଧିକ ପଢନ୍ତୁ : ଅନିଶ୍ଚିତତା ଭିତରେ ସିରିଆର ଭାଗ୍ୟ: ଅନ୍ତ ହେଲା ୧୩ ବର୍ଷର ଗୃହଯୁଦ୍ଧ, ତଥାପି ଭବିଷ୍ୟତ ଅନ୍ଧାରରେ
ରାଜଧାନୀ ଦମାସକସରେ ଥିବା ଏହିପରି ଏକ ଶବ ଗୃହର କାନ୍ଥରେ ମୃତକଙ୍କ ଫଟୋ ପ୍ରଦର୍ଶିତ ହୋଇଛି । ମୃତକଙ୍କ ପରିବାର ଲୋକ ଏଠାରେ ପହଞ୍ଚିଛନ୍ତି ଏବଂ ନିଜ ପ୍ରିୟ ଲୋକଙ୍କୁ ଖୋଜୁଛନ୍ତି । ମହମ୍ମଦ ଚୌବେଙ୍କୁ ତାଙ୍କର ଜଣେ ଭାଇ ତୁର୍କୀରୁ ଏକ ଫଟୋ ପଠାଇଥିଲେ। ଏହା ପରେ ସେ ଏଠାରେ ପହଞ୍ଚିଥିଲେ । ତାଙ୍କ ଭାଇଙ୍କୁ କାହିଁକି ଜେଲ ଦଣ୍ଡାଦେଶ ହୋଇଛି, ତାହା ମଧ୍ୟ ସେ ଜାଣନ୍ତି ନାହିଁ। ସେ ତାଙ୍କ ଭାଇଙ୍କ ମୃତଦେହର କାନ ପାଖରେ ଥିବା ଚିହ୍ନ ଦ୍ୱାରା ଚିହ୍ନଟ କରିଥିଲେ। ଏହା ବ୍ୟତୀତ, ୧୨ ବର୍ଷ ବୟସରେ ତାଙ୍କ ଭାଇଙ୍କ ଗୋଟିଏ ଆଙ୍ଗୁଳି କାଟି ଦିଆଯାଇଥିଲା।
ଏହି ଶବ ବ୍ୟବଚ୍ଛେଦ ରିପୋର୍ଟରେ ୟାସିର କାଇସର ନାମକ ଜଣେ ଫୋରେନସିକ୍ ଆସିଷ୍ଟାଣ୍ଟ କହିଛନ୍ତି ଯେ ସେ ସକାଳେ ହସ୍ପିଟାଲରୁ ୪୦ ଟି ଶବ ପାଇଥିଲେ। ସେମାନଙ୍କର ଫିଙ୍ଗର ପ୍ରିଣ୍ଟ ଏବଂ ଡିଏନ୍ଏ ନମୁନା ନିଆଯାଉଛି। କିନ୍ତୁ ଏତେ ସଂଖ୍ୟକ ଲୋକ ଆସୁଛନ୍ତି ଯେ ମେଳ କରିବା କଷ୍ଟକର ହୋଇପଡୁଛି । ଏହି ଶବଗୁଡ଼ିକ ମଧ୍ୟରୁ କେତେକ କୁଖ୍ୟାତ ସାଦନାୟା ଜେଲରୁ ଆସିଛି । ସେମାନେ ଏବେ ବି ବନ୍ଦୀମାନଙ୍କ ପୋଷାକରେ ଅଛନ୍ତି। ଶବ ବ୍ୟବଚ୍ଛେଦ ବିଭାଗର ଅନ୍ୟ ଜଣେ କର୍ମଚାରୀ ଡାକ୍ତର ଅବଦୁଲ୍ଲା ୟୁସୁଫ କହିଛନ୍ତି ଯେ ସମସ୍ତଙ୍କୁ ଚିହ୍ନିବା ପାଇଁ ବହୁତ ସମୟ ଲାଗିବ।
