ISKCON Ratha Yatra: ହ୍ୟୁଷ୍ଟନରେ ଅଦିନରେ ଗଡ଼ିଲା ନନ୍ଦିଘୋଷ, ଫେଷ୍ଟିଭାଲ ଅଫ ବ୍ଲିସ ନାଁରେ ରଥଯାତ୍ରା କଲା ଇସ୍କନ

ଆମେରିକା ହ୍ୟୁଷ୍ଟନରେ ଅଦିନରେ ଗଡ଼ିଲା ନନ୍ଦିଘୋଷ । ଫେଷ୍ଟିଭାଲ ଅଫ ବ୍ଲିସ ନାଁରେ ରଥଯାତ୍ରା କରିଛି ଇସ୍କନ । ରଥରେ ଚତୁର୍ଦ୍ଧା ମୂର୍ତ୍ତି ନଥିଲେ ବି ନନ୍ଦିଘୋଷ ଭଳି ଅବିକଳ ରଥ ନିର୍ମାଣ କରି ଟାଣିଛି ଇସ୍କନ । ଯାହା ଓଡ଼ିଆ ଜଗନ୍ନାଥ ଭକ୍ତଙ୍କ ଭାବାବେଗକୁ ଆଘାତ ଦେଇଛି । ଅଦିନ ରଥଯାତ୍ରା ନ କରିବାକୁ ଗଜପତି ମହାରାଜା କହିବା ପରେ ଏଥିରୁ ନିବୃତ୍ତ ରହିବ ବୋଲି ଇସ୍କନ ପକ୍ଷରୁ କୁହାଯାଇଥିଲା । ଏହାପରେ ଆମେରିକା ହ୍ୟୁଷ୍ଟନରେ ଶ୍ରୀଜିଉଙ୍କ ଅଦିନ ସ୍ନାନ ଓ ରଥଯାତ୍ରା ହେବନି ବୋଲି ଇସ୍କନ ପକ୍ଷରୁ ସୂଚନା ଦିଆଯାଇଥିଲା ।

ତେବେ ନିର୍ଦ୍ଧାରିତ ଦିନ ହ୍ୟୁଷ୍ଟନରେ ନନ୍ଦିଘୋଷ ଭଳି ଅବିକଳ ରଥ ନିର୍ମାଣ କରି ଏହାକୁ ଟାଣିବା ସହ ଫେଷ୍ଟିଭାଲ ଅଫ ବ୍ଲିସ ପାଳନ କରିଛି ଇସ୍କନ। ଅଦିନରେ ନନ୍ଦିଘୋଷ ରଥ ଗଡ଼ିବା ଓ ଇସ୍କନର ଏଭଳି ମନୋଭାବକୁ ନେଇ ଉଠିଛି ପ୍ରଶ୍ନ । ତେବେ ଇସ୍କନ ପକ୍ଷରୁ ଏନେଇ ପ୍ରତିକ୍ରିୟା ମିଳିପାରିନାହିଁ ।

ସୂଚନା ଅନୁସାରେ ଅଦିନିଆ ରଥଯାତ୍ରାକୁ ନେଇ କ୍ଷୋଭ ପ୍ରକାଶ କରିଥିଲେ ଗଜପତି ମହାରାଜା । ଗତ ନଭେମ୍ବର ୩ରେ ସ୍ନାନ ଯାତ୍ର ଓ ୯ ତାରିଖରେ ହ୍ୟୁଷ୍ଟନ ସହରରେ ଇସ୍କନ ପକ୍ଷରୁ ମହାପ୍ରଭୁ ଜଗନ୍ନାଥଙ୍କ ରଥଯାତ୍ରା ଆୟୋଜନ ପାଇଁ ସ୍ଥିର ହୋଇଥିଲା । ତେବେ ଗଜପତି ମହାରାଜାଙ୍କ କ୍ଷୋଭ ପରେ ସ୍ନାନ ଯାତ୍ରା ବାତିଲ ହୋଇଥିଲା । ପରେ ଅଦିନ ରଥଯାତ୍ରା ବି ବାତିଲ ହୋଇଛି ବୋଲି ଇସ୍କନ ପକ୍ଷରୁ କୁହାଯାଇଥିଲା । କିନ୍ତୁ ନଭେମ୍ବର ୯ରେ ଫେଷ୍ଟିଭାଲ ଅଫ ବ୍ଲିସ ନାଁରେ ରଥଯାତ୍ରା କରିଛି ଇସ୍କନ ।

ଇସ୍କନର ଅଦିନିଆ ରଥଯାତ୍ରା ପ୍ରସଙ୍ଗରେ ପ୍ରେସମିଟ୍ କରିଥିଲେ ଗଜପତି ମହାରାଜା । ଶ୍ରୀମନ୍ଦିର ପରମ୍ପରାର ଉଲ୍ଲଂଘନ ହେଉଛି ବୋଲି କହିଥିଲେ । ମହାପ୍ରଭୁଙ୍କ ପରମ୍ପରାରେ ବ୍ୟତିକ୍ରମ ହେବା ଠିକ୍ ନୁହେଁ ବୋଲି ସେ କହିଥିଲେ । ପୂର୍ବରୁ ସେ ଏନେଇ ISKCONକୁ ଚିଠି ମଧ୍ୟ ଲେଖିଥିଲେ । ତାସତ୍ତ୍ୱେ ବି ଇସ୍କନ ଜିଦ୍‌ ଧରି ବସିଥିଲା । କିନ୍ତୁ ୩ ତାରିଖ ସ୍ନାନଯାତ୍ରାକୁ ବାତିଲ କରିଥିଲା ।

‘ମାର୍ଚ୍ଚରେ ISKCONର ଗଭର୍ଣ୍ଣିଂ କାଉନସିଲ ବୈଠକ ରହିଛି । ସେଠି ଯଦି ସେମାନେ ମାନିଯିବେ, ଭଲ କଥା । ଆମେ ଚାହୁଁଛୁ ଆଲୋଚନା ଦ୍ୱାରା ସମାଧାନ ହେଉ । ଯଦି ମାନିବେନି ଆମ ପାଖରେ ଆଇନର ରାସ୍ତା ବ୍ୟତୀତ ଅନ୍ୟ ବିକଳ୍ପ ନାହିଁ । ଏଥର ଆମେ ଛାଡ଼ିବାନି, ବହୁତ ହୋଇଗଲା’ ବୋଲି କହି ଚେତାବନୀ ଦେଇଥିଲେ ଗଜପତି । ୧୯୬୯ରୁ ଇସ୍କନ ଅଦିନରେ ରଥଯାତ୍ରା ଆୟୋଜନ କରିଆସୁଛି । ବାରମ୍ବାର କହିବା ପରେ ୨୦୨୧ରୁ ଭାରତରେ ଅଦିନ ରଥଯାତ୍ରା ହେଉନି। କିନ୍ତୁ ବିଦେଶରେ ନିୟମ ଭାଙ୍ଗି ଅଦିନ ରଥଯାତ୍ରା କରୁଥିଲା ଇସ୍କନ।

ଅନ୍ୟପଟେ ଅଦିନିଆ ରଥଯାତ୍ରାକୁ ନେଇ ହ୍ୟୁଷ୍ଟନ ସହରରୁ ବି ଶୁଭିଥିଲା ଇସ୍କନ ବିରୋଧୀ ସ୍ୱର । ହ୍ୟୁଷ୍ଟନରୁ ପ୍ରବାସୀ ଓଡ଼ିଆ ଓ ପ୍ରବାସୀ ଭାରତୀୟମାନେ ଜଗନ୍ନାଥ ସଂସ୍କୃତିର ରକ୍ଷା ପାଇଁ ସରକାରଙ୍କୁ ନିବେଦନ କରିଥିଲେ । ଜଗନ୍ନାଥ ପ୍ରେମୀଙ୍କ ଭାବାବେଗ ସହ ନଖେଳିବାକୁ ସେମାନେ ତାଗିଦ୍ ବି କରିଥିଲେ । ପୁରୀ ଶଙ୍କରାଚାର୍ଯ୍ୟଙ୍କ ପରାମର୍ଶ ହେଉ କି ଗଜପତି ମହାରାଜାଙ୍କ ଚିଠି । ଏସବୁକୁ ବେଖାତିର କରି ଆସୁଥିଲା ଇସ୍କନ । ହେଲେ ଏବେ ଅଦିନିଆ ରଥଯାତ୍ର କରି ଜଗନ୍ନାଥ ଭକ୍ତଙ୍କ ଭାବାବେଗକୁ ଆଘାତ ଦେଇଛି ଇସ୍କନ ।

ମହାପ୍ରଭୁ ଶ୍ରୀଜଗନ୍ନାଥଙ୍କ ପବିତ୍ର ରଥଯାତ୍ରା ନିର୍ଦ୍ଧାରିତ ପୂଣ୍ୟତିଥି ବ୍ୟତିରେକ ଅନ୍ୟ ସମୟରେ ଅନୁଷ୍ଠିତ ନହେଉ ବୋଲି ଗତ ୨୦୧୯ ସେପ୍ଟେମ୍ବରରେ ବାର୍ତ୍ତା ଦେଇଥିଲେ । ଶ୍ରୀଜଗନ୍ନାଥ ମହାପ୍ରଭୁଙ୍କ ପବିତ୍ର ଶ୍ରୀଗୁଣ୍ଡିଚା ଯାତ୍ରା ସନାତନ ଶାସ୍ତ୍ର ଆଧାରିତ ଆଷାଢ ଶୁକ୍ଳପକ୍ଷ ଦ୍ୱିତୀୟା ତିଥିରେ ହୋଇଥାଏ । ତେଣୁ ଏହି ଦିନ ବିଶ୍ୱର ସମସ୍ତ ଜଗନ୍ନାଥ ପ୍ରେମୀ ଭକ୍ତ ଓ ଅନୁଷ୍ଠାନ ମାନେ ଏହି ପୂଣ୍ୟ ତିଥି ମାନଙ୍କରେ ହିଁ ରଥଯାତ୍ରା ପାଳନ କରିବା ପାଇଁ ବାର୍ତ୍ତାରେ କହିଥିଲେ ଗଜପତି ମହାରାଜା ।

ଶ୍ରୀମନ୍ଦିରର ମହାନ ପରମ୍ପରା ଓ ଶାସ୍ତ୍ରୀୟ ଘୋଷଣା ଉଲଂଘନ କରି ମହାପ୍ରଭୁଙ୍କର ଏହି ପବିତ୍ର ଯାତ୍ରା ଅନୁଷ୍ଠିତ କରିବେ ନାହିଁ ବୋଲି ଗଜପତି ଦର୍ଶାଇଥିଲେ । ଗଜଗତି ମହାରାଜାଙ୍କ ଏହି ବାର୍ତ୍ତା ପରେ ଇସ୍କନ ଇଣ୍ଡିଆ ପକ୍ଷରୁ ଏକ ପ୍ରସ୍ତାବ ଗ୍ରହଣ କରାଯାଇଥିଲା । ଏଥିରେ ଯେଉଁ ତିଥିରେ ରଥଯାତ୍ରା ପଡ଼ୁଛି ସେହି ତିଥି ବ୍ୟତିରେକ ଅନ୍ୟ ସମୟରେ ରଥଯାତ୍ରା ନକରିବାକୁ ସଂକଳ୍ପ କରାଯାଇଥିଲା । ତେବେ ୨୦୧୯ରେ ଇସ୍କନ ପକ୍ଷରୁ ହୋଇଥିବା ସଂକଳ୍ପକୁ ତାଙ୍କର ଆମେକାରେ ଥିବା ସଂସ୍ଥା ଏବେ ଖାତିର କରୁନଥିବା ଦେଖିବାକୁ ମିଳିଛି ।