LIVE TV
'ଏକ୍ସ' ଇନ୍, ବ୍ଲୁ ବାର୍ଡ ଆଉଟ୍ । ଟ୍ୱିଟରରୁ ବିଦାୟ ନେଲା ନୀଳ ପକ୍ଷୀ । ଏଣିକି ଟ୍ୱିଟରର ନୂଆ ଲୋଗୋ 'ଏକ୍ସ' । ଚର୍ଚ୍ଚାରେ ଏଲନ ମସ୍କଙ୍କ 'ରିବ୍ରାଣ୍ଡିଂ' ନିଷ୍ପତ୍ତି । ଲୋକପ୍ରିୟ ମାଇକ୍ରୋ ବ୍ଲଗିଂ ପ୍ଲାଟଫର୍ମ ଟ୍ୱିଟରର ମାଲିକାନା ହାତକୁ ନେବା ପରେ, ଅଚାନକ ବଡ଼ ବଡ଼ ପରିବର୍ତ୍ତନ କରି ସାରା ବିଶ୍ୱକୁ ଚମକାଇ ଦେଇଛନ୍ତି ବିଶ୍ୱର ଏକ ନମ୍ବର ଧନୀ ବ୍ୟକ୍ତି ତଥା ସ୍ପେଶ ଏକ୍ସ ଓ ଟେସଲାର ମାଲିକ ଏଲନ ମସ୍କ । ତେବେ ଟ୍ୱିଟରର ନାଁ ଓ ଲୋଗୋକୁ ରାତାରାତି 'ଏକ୍ସ'କୁ ପରିବର୍ତ୍ତନ, ଅଧିକାଂଶ ୟୁଜରଙ୍କୁ ଚକିତ କରିଛି ।
କେବଳ ଯେ ଟ୍ୱିଟର ଲୋଗୋରୁ ନୀଳ ଚଢ଼େଇକୁ ହଟାଇ ସେଠାରେ ଇଂରାଜୀ ଆଲଫାବେଟ୍ 'ଏକ୍ସ'କୁ ନୂଆ ଲୋଗୋ କରାଯାଇଛି ତା ନୁହେଁ, ଏବେଠୁ ଟ୍ୱିଟରର ନୂଆ ନାଁ ବି 'ଏକ୍ସ'କୁ ପରିବର୍ତ୍ତିତ ହୋଇଛି । ଏଣିକି ଗୋଟିଏ ଟ୍ୱିଟକୁ ଗୋଟିଏ ଏକ୍ସ ବୋଲି କୁହାଯିବ । ଫଳରେ ହୁଏତ ଇଣ୍ଟରନେଟ ଜଗତରୁ ବିଦାୟ ନେଇ ଇତିହାସ ପାଲଟିପାରେ ଟ୍ୱିଟରର ନାଁ ଏବଂ ଅତି ପରିଚିତ ବ୍ଲୁ ବାର୍ଡ ଲୋଗୋ ।...
Also Read
ଟ୍ୱିଟରର ନୂଆ ଅବତାର ଏକ୍ସରେ ଭବିଷ୍ୟତରେ ଯୋଡ଼ିହେବାକୁ ଯାଉଛି ଅନେକ ଫିଚର । ଆଗାମୀ ଦିନରେ ଏଥିରେ ଅଡିଓ, ଭିଡିଓ, ମେସେଜିଂ ପେମେଣ୍ଟ ବା ବ୍ୟାଙ୍କିଂ ସେବା ଉପଲବ୍ଧ ହେବ ବୋଲି ଜଣାଇଛନ୍ତି କଂପାନୀର ସିଇଓ ଲିଣ୍ଡା ୟାକାରିନୋ । ଏଥିରେ ଆର୍ଟିଫିସିଆଲ୍ ଇଣ୍ଟଲିଜେନ୍ସ ବା AIକୁ ଯୋଡ଼ାଯିବ । ଫଳରେ ଏହା ବିଭିନ୍ନ ଆଇଡିଆ, ସାମଗ୍ରୀ, ସେବା ଓ ସୁଯୋଗର ବୈଶ୍ୱିକ ବାଣିଜ୍ୟସ୍ଥଳରେ ପରିଣତ ହେବ ବୋଲି ସେ ଟ୍ୱିଟ୍ କରିଛନ୍ତି । ସୂଚନା ଯୋଗ୍ୟ ଯେ, କିଛି ମାସ ପୂର୍ବରୁ ହଠାତ୍ ଏଲନ ମସ୍କ ନୀଳ ପକ୍ଷୀକୁ ଟ୍ୱିଟର ଲୋଗୋରୁ ହଟାଇ କିଛି ଦିନ ପାଇଁ ସେହି ସ୍ଥାନରେ ଡଜ୍ କଏନର କୁକୁର ଚିତ୍ରକୁ ସ୍ଥାନିତ କରିଥିଲେ।...
ଏଲନ୍ ମସ୍କଙ୍କୁ କହିହେବ କି ଏକ୍ସ-ମ୍ୟାନ୍?
ଟ୍ୱିଟରକୁ 'ଏକ୍ସ' ଭାବେ ନାମିତ କରିବା ପରେ ଚର୍ଚ୍ଚା ଜୋର ଧରିଛି ।'ଏକ୍ସ' ଲେଟର୍ ପ୍ରତି ଏଲନ ମସ୍କଙ୍କ ଅହେତୁକ ଦୁର୍ବଳତା ରହିଛି । ଏଲନ ମସ୍କଙ୍କର ଅନେକ କଂପାନୀର ନାଁରେ ଯୋଡ଼ି ହୋଇଛି 'ଏକ୍ସ' । ସବୁଠୁ ଚର୍ଚ୍ଚିତ ହେଉଛି ତାଙ୍କର ମହାକାଶ ଅଭିଯାନ ସଂପର୍କିତ ଟେକନୋଲୋଜି କଂପାନୀ ସ୍ପେଶ୍-ଏକ୍ସ । ତେବେ ଏକ୍ସ ଆଲଫାବେଟ୍ ପ୍ରତି ତାଙ୍କର ଆଗ୍ରହ ପ୍ରଥମେ ଦେଖିବାକୁ ମିଳିଥିଲା ୧୯୯୯ ମସିହାରେ ।
ଏକ୍ସ ଡଟ୍ କମ୍ ୱେବସାଇଟ ଡୋମେନ୍ କିଣି ଅନଲାଇନ ବ୍ୟାଙ୍କି ସର୍ଭିସ୍ ପ୍ଲାଟଫର୍ମ ତିଆରି କରିଥିଲେ ଏଲନ ମସ୍କ। ପରେ ଏହା ପେ'ପାଲ୍ ରେ ପରିଣତ ହୋଇଥିଲା । ୨୦୧୭ରେ ସେ ପେ'ପାଲ୍ ଠାରୁ ନିଜର ପୁରୁଣା ଏକ୍ସ ଡଟ୍ କମ୍ ଡୋମେନକୁ କିଣି ନିଜ ପାଖରେ ସାଇତି ରଖିଥିଲେ। ଯାହାକି ଏବେ ୬ ବର୍ଷ ପରେ ପୁଣିଥରେ ସକ୍ରିୟ ହେବା ସହିତ ଟ୍ୱିଟର ୱେବସାଇଟକୁ ରିଡାଇରେକ୍ଟ ହେଉଛି । ଏହି ଡୋମେନ୍ ତାଙ୍କର ଭାବାବେଗ ସହ ଜଡ଼ିତ ବୋଲି ପୂର୍ବରୁ ସ୍ପଷ୍ଟ କରିଥିଲେ ମସ୍କ ।
ତେବେ କେବଳ ଏକ୍ସ ଡଟ୍ କମ୍ କି ସ୍ପେଶ୍-ଏକ୍ସ ନୁହେଁ, ଏଲନ ମସ୍କ ତାଙ୍କର ଟେସଲା ଇଲେକ୍ଟ୍ରିକ୍ କାରର ଗୋଟିଏ ଭର୍ସନର ନାଁ ରଖିଛନ୍ତି ମଡେଲ୍-ଏକ୍ସ । ଟ୍ୱିଟରର ପ୍ୟାରେଣ୍ଟ କଂପାନୀର ନାଁ ଦେଇଛନ୍ତି ଏକ୍ସ-କର୍ପ । ଚଳିତ ମାସ ସେ ଲଞ୍ଚ କରିଥିବା ଆର୍ଟିଫିସିଆଲ୍ ଇଣ୍ଟଲିଜେନ୍ସ କଂପାନୀର ନାଁ ହେଉଛି ଏକ୍ସ-ଏଆଇ। ଜାଣିଲେ ଆଶ୍ଚର୍ଯ୍ୟ ହେବେ, କେବଳ ନିଜର ବିଭିନ୍ନ କଂପାନୀ ନୁହେଁ, ବିଶ୍ୱର ଏହି ଧନୀ ବ୍ୟକ୍ତି ତଥା ଚର୍ଚ୍ଚିତ ଉଦ୍ୟୋଗପତି ନିଜର ଏକ ସନ୍ତାନର ନାଁ ରେ ବି ଏକ୍ସକୁ ଯୋଡ଼ିଛନ୍ତି । ତାଙ୍କର ଜଣେ ପୁଅର ନାଁ ହେଉଛି X AE A-XII ମସ୍କ।
