Jaat in Controversy: 'ଜାଟ୍‌' କରି ଅସୁବିଧାରେ ସନ୍ନି ଦେଓଲ; ଥାନାରେ ରୁଜୁ ହେଲା ମାମଲା

ସନ୍ନି ଦେଓଲ ଆଜିକାଲି ଫିଲ୍ମ 'ଜାଟ୍‌' ପାଇଁ ଖୁବ୍ ଚର୍ଚ୍ଚାରେ ଅଛନ୍ତି। ଫିଲ୍ମଟି ବକ୍ସ ଅଫିସରେ ଭଲ ପ୍ରଦର୍ଶନ କରୁଛି। କିନ୍ତୁ ମୁକ୍ତିଲାଭ ପରେ, ଫିଲ୍ମଟି ଏକ ବଡ଼ ବିବାଦରେ ଫସିଯାଇଛି। ସନ୍ନି ଦେଓଲ ଏବଂ ରଣଦୀପ ହୁଡାଙ୍କ ଫିଲ୍ମ ‘ଜାଟ୍‌’ ବିରୋଧରେ ପଞ୍ଜାବରେ ଖ୍ରୀଷ୍ଟିଆନ ସମ୍ପ୍ରଦାୟ ପକ୍ଷରୁ ବିରୋଧ ପ୍ରଦର୍ଶନ କରାଯାଇଥିଲା।

ଏହା ପରେ, ଜଳନ୍ଧରରେ ଏକ ଏଫ୍‌ଆଇଆର୍‌ ପଞ୍ଜିକୃତ ହୋଇଥିଲା। ଅଭିଯୋଗ ହୋଇଛି ଯେ ଫିଲ୍ମରେ ରଣଦୀପ ହୁଡା ଯୀଶୁ ଖ୍ରୀଷ୍ଟ ଏବଂ ଖ୍ରୀଷ୍ଟିଆନିଟିରେ ବ୍ୟବହୃତ ପବିତ୍ର ଜିନିଷଗୁଡ଼ିକର ଅସମ୍ମାନ କରିଛନ୍ତି।

ବଲିଉଡ୍‌ ଅଭିନେତା ସନ୍ନି ଦେଓଲ, ରଣଦୀପ ହୁଡା, ବିନୀତ କୁମାର, ନିର୍ଦ୍ଦେଶକ ଗୋପୀ ଚନ୍ଦ, ଜାଟ୍ ଫିଲ୍ମର ପ୍ରଯୋଜକ ନବୀନ ମାଲିନେନୀଙ୍କ ବିରୋଧରେ ଜଳନ୍ଧରର ସଦର ପୋଲିସ ଷ୍ଟେସନରେ ଏକ ମାମଲା ରୁଜୁ କରାଯାଇଛି।

କାହିଁକି ବିରୋଧ:

ଜଳନ୍ଧରରେ ଖ୍ରୀଷ୍ଟିଆନ ସଂପ୍ରଦାୟ ଏକ ଲିଖିତ ଅଭିଯୋଗ ଦେଇ ଦାବି କରିଛି ଯେ ଯଦି କାର୍ଯ୍ୟାନୁଷ୍ଠାନ ନିଆ ନ ଯାଏ, ତେବେ ପଞ୍ଜାବରେ ସିନେମା ହଲ୍‌ଗୁଡ଼ିକୁ ବ୍ୟାନ୍ କରାଯିବ। ଅଭିଯୋଗରେ ଉଲ୍ଲେଖ କରାଯାଇଛି ଯେ ସିନ୍‌ରେ ଅସମ୍ମାନ କରାଯାଉଛି ଏବଂ ଧାର୍ମିକ ଭାବନାକୁ ଆଘାତ ଦିଆଯାଉଛି।

ଅଧିକ ପଢ଼ନ୍ତୁ:  ସନ୍ନି ଦେଓଲ କହିଲେ ସେ କାହିଁକି ଫିଲ୍ମରେ ରାଗନ୍ତି

ପୂର୍ବରୁ, ତାମିଲନାଡୁର ଲୋକମାନେ ମଧ୍ୟ ଫିଲ୍ମ ଉପରେ ପ୍ରତିବନ୍ଧକ ଲଗାଇବାକୁ ଦାବି କରିଥିଲେ କାରଣ ସେମାନେ କହିଥିଲେ ଯେ ଫିଲ୍ମରେ LTTE ସମ୍ପ୍ରଦାୟ (ଲିବରେସନ ଟାଇଗର୍ସ ଅଫ୍ ତାମିଲ ଏଲମ୍)କୁ ଆତଙ୍କବାଦୀ ଭାବରେ ଚିତ୍ରଣ କରାଯାଇଛି।

'ଜାଟ୍‌'ର ରୋଜଗାର:

'ଜାଟ୍‌' ରିଲିଜ୍ ହେବା ପରଠାରୁ ଦର୍ଶକଙ୍କ ଦୃଷ୍ଟି ଆକର୍ଷଣ କରିଛି। ଗୁରୁବାର ଦିନ ଫିଲ୍ମଟି ୪ କୋଟି ଟଙ୍କା ରୋଜଗାର କରିଛି। ଏହାର ମୋଟ ରୋଜଗାର ୬୧.୫ କୋଟି ଟଙ୍କାରେ ପହଞ୍ଚିଛି। ଫିଲ୍ମର କାହାଣୀ, ଦମଦାର ଆକ୍ସନ୍ ସିକ୍ୱେନ୍ସ ଏବଂ ଚରିତ୍ରଗୁଡ଼ିକର ଗଭୀରତା ଏହାକୁ ଦର୍ଶକଙ୍କ ମଧ୍ୟରେ ଲୋକପ୍ରିୟ କରିଛି।

'ଜାଟ ୨'ର ଘୋଷଣା:

'ଜାଟ୍‌ ୨'କୁ ନେଇ କୁହାଯାଇଛି ଯେ ଆଗାମୀ ଆକ୍ସନ ଫିଲ୍ମଟି ମଧ୍ୟ ଗୋପୀଚାନ୍ଦ ମାଲିନେନୀଙ୍କ ଦ୍ୱାରା ନିର୍ଦ୍ଦେଶିତ ହେବ। ସେହିପରି, ପୋଷ୍ଟରରେ ପ୍ରଯୋଜକ ନବୀନ ୟର୍‌ନେନୀ, ରବିଶଙ୍କର ୱାଇ ଏବଂ ଟିଜି ବିଶ୍ୱ ପ୍ରସାଦଙ୍କ ନାଁ ମଧ୍ୟ ପ୍ରକାଶ ପାଇଛି।

'ଜାଟ୍‌ ୨' ମଧ୍ୟ ମୈତ୍ରୀ ମୁଭି ମେକର୍ସ ପ୍ରଡକ୍ସନ ହାଉସ ଦ୍ୱାରା ନିର୍ମିତ ହେବ। ଫିଲ୍ମର ସିକ୍ୱେଲରେ ସନ୍ନି ଦେଓଲଙ୍କୁ ନିଶ୍ଚିତ କରାଯାଇଛି। ତଥାପି ନିର୍ମାତା ଅନ୍ୟ କଳାକାରମାନଙ୍କ ବିଷୟରେ କୌଣସି ସୂଚନା ଦେଇ ନାହାଁନ୍ତି।

ଅଧିକ ପଢ଼ନ୍ତୁ:  'ଗଦର ୨' ପରେ ବଢିଲା ସନ୍ନି ଦେଓଲ୍‌ଙ୍କ ଚାହିଦା; ‘ଜାଟ୍’ ପାଇଁ ନେଲେ ମୋଟା ଅଙ୍କ