11 Dead: ଦର୍ଶନ ପାଇଁ ବାହାରିଥିଲେ, ମଝି ରାସ୍ତାରେ ଚାଲିଗଲା ଜୀବନ

ଉତ୍ତରପ୍ରଦେଶର ଗୋଣ୍ଡା ଜିଲ୍ଲାରେ ମର୍ମନ୍ତୁଦ ସଡ଼କ ଦୁର୍ଘଟଣା । ଏକ ବୋଲେରୋ ଗାଡ଼ି ନିୟନ୍ତ୍ରଣ ହରାଇ ଓଲଟି ପଡ଼ି କେନାଲକୁ ଖସିପଡ଼ିଲା । ଗାଡ଼ିରେ ୧୫ ଜଣ ଯାତ୍ରୀ ଥିଲେ, ଯେଉଁମାନଙ୍କ ମଧ୍ୟରୁ ୧୧ ଜଣଙ୍କର ଘଟଣାସ୍ଥଳରେ ମୃତ୍ୟୁ ଘଟିଛି ।

ବୋଲେରୋରେ ଶ୍ରଦ୍ଧାଳୁମାନେ ଥିଲେ, ଯେଉଁମାନେ ଦର୍ଶନ ପାଇଁ ଏକ ମନ୍ଦିରକୁ ଯାଉଥିଲେ। ଏକ ରିପୋର୍ଟ ଅନୁଯାୟୀ ଏହି ଦୁର୍ଘଟଣା ଇଟିୟାଥୋକ ଥାନା ଅଞ୍ଚଳର ରହରା ଗାଁ ନିକଟରେ ଘଟିଥିଲା। ଆହତମାନଙ୍କୁ ଚିକିତ୍ସା ପାଇଁ ଡାକ୍ତରଖାନା ନିଆଯାଇଛି।

ସମସ୍ତ ଶ୍ରଦ୍ଧାଳୁ ଦର୍ଶନ ପାଇଁ ବାହାରିଥିଲେ। ହଠାତ୍ ବୋଲେରୋ ଗାଡ଼ି ନିୟନ୍ତ୍ରଣ ହରାଇ କେନାଲକୁ ଓଲଟି ପଡ଼ିଥିଲା। ୧୧ ଜଣଙ୍କର ମୃତ୍ୟୁ ସହ ଚାରି ଜଣ ଆହତ ହୋଇଛନ୍ତି। ପ୍ରଶାସନିକ ଦଳ ଗୁଡ଼ିକ ଉଦ୍ଧାର କାର୍ଯ୍ୟରେ ନିୟୋଜିତ ଥିଲେ ।

pic.twitter.com/15d2P62a0f

— AJAY Tiwari (@tiwari8595) August 3, 2025

ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଏହି ଘଟଣାରେ ଦୁଃଖ ପ୍ରକାଶ କରିଛନ୍ତି ଏବଂ ଅଧିକାରୀମାନଙ୍କୁ ତୁରନ୍ତ ଘଟଣାସ୍ଥଳରେ ପହଞ୍ଚି ରିଲିଫ କାର୍ଯ୍ୟକୁ ତ୍ୱରାନ୍ୱିତ କରିବାକୁ ନିର୍ଦ୍ଦେଶ ଦେଇଛନ୍ତି। ଏହା ସହିତ ସେ ମୃତକଙ୍କ ପରିବାରକୁ ୫ ଲକ୍ଷ ଟଙ୍କାର ଆର୍ଥିକ ସହାୟତା ପ୍ରଦାନ କରିବାକୁ ନିର୍ଦ୍ଦେଶ ଦେଇଛନ୍ତି।

ଏକ୍ସରେ ପୋଷ୍ଟ କରି ସେ ଲେଖିଛନ୍ତି, "ମୋର ସମବେଦନା ଶୋକସନ୍ତପ୍ତ ପରିବାରଗୁଡ଼ିକ ସହ ଅଛି। ଏହି ଦୁର୍ଘଟଣାରେ ମୃତ୍ୟୁବରଣ କରିଥିବା ଲୋକଙ୍କ ପରିବାରକୁ ୫ ଲକ୍ଷ ଟଙ୍କାର ଆର୍ଥିକ ସହାୟତା ପ୍ରଦାନ କରିବାକୁ ନିର୍ଦ୍ଦେଶ ଦେଇଛି।"

ଗତ ଏକ ସପ୍ତାହ ମଧ୍ୟରେ ଏହା ଚତୁର୍ଥ ବଡ଼ ଦୁର୍ଘଟଣା, ଯେଉଁଥିରେ ଶ୍ରଦ୍ଧାଳୁମାନଙ୍କର ମୃତ୍ୟୁ ହୋଇଛି। ଏହା ପୂର୍ବରୁ ୨୯ ଜୁଲାଇରେ ଝାଡ଼ଖଣ୍ଡର ଦେଓଘରରେ ଘଟିଥିବା ସଡ଼କ ଦୁର୍ଘଟଣାରେ ୧୮ ଜଣ ଶ୍ରଦ୍ଧାଳୁଙ୍କର ମୃତ୍ୟୁ ହୋଇଥିଲା। କାଉଡ଼ିଆଙ୍କୁ ନେଉଥିବା ଏକ ବସ ଏବଂ ଟ୍ରକ ମଧ୍ୟରେ ଭୀଷଣ ଧକ୍କା ହୋଇଥିଲା। ଏହି ଦୁର୍ଘଟଣାରେ ଅନେକ ଲୋକ ଆହତ ହୋଇଥିଲେ।

जनपद गोण्डा में दुर्भाग्यपूर्ण दुर्घटना में हुई जनहानि अत्यंत दुःखद एवं हृदय विदारक है।

मेरी संवेदनाएं शोक संतप्त परिवारों के साथ हैं।

इस दुर्घटना में दिवंगत हुए लोगों के परिजनों को ₹05-05 लाख की आर्थिक सहायता प्रदान करने तथा जिला प्रशासन के अधिकारियों को घायलों को तत्काल…

— Yogi Adityanath (@myogiadityanath) August 3, 2025

ଏହା ପୂର୍ବରୁ ୨୭ ଜୁଲାଇରେ ହରିଦ୍ୱାରର ମନସା ଦେବୀ ମନ୍ଦିରରେ ଭିଡ଼ ଯୋଗୁଁ ଦୁର୍ଘଟଣା ଘଟିଥିଲା, ଯେଉଁଥିରେ ଆଠ ଜଣଙ୍କର ମୃତ୍ୟୁ ହୋଇଥିଲା ଏବଂ ୩୦ ଜଣ ଆହତ ହୋଇଥିଲେ।