Train Travel Gets Costlier: ଟ୍ରେନ ଯାତ୍ରୀଙ୍କ ପାଇଁ ଜରୁରୀ ସୂଚନା: ଟିକେଟ୍‌ ଦର ବଢାଇଲା ରେଲୱେ

ବର୍ଷ ଶେଷରେ ରେଳଯାତ୍ରୀଙ୍କୁ ବଡ଼ ଝଟ୍‌କା । ଏଣିକି ଆହୁରି ମହଙ୍ଗା ହୋଇଗଲା ଟ୍ରେନ ଯାତ୍ରା । ବଢିଲା ଟିକେଟ୍ ଦାମ୍ । ଜେନେରାଲରୁ ନେଇ ଏସି କ୍ଲାସ୍ ଯାଏଁ, ଟିକେଟ୍‌ ଦର ବଢାଇଲା ରେଲୱେ । ଯାତ୍ରୀ ପକେଟ୍‌ ଉପରେ ବଢିଲା ବୋଝ । ଖାସ୍ କରି ଦୂରକୁ ଯାତ୍ରା କରୁଥିବା ଯାତ୍ରୀମାନେ ଏବେଠୁ ଅଧିକ ଖର୍ଚ୍ଚାନ୍ତ ହେବେ ।

ନୂଆ ଦର ଅନୁସାରେ, ସାଧାରଣ ବର୍ଗରେ ୨୧୫ କି.ମିରୁ ଅଧିକ ଯାତ୍ରା ପାଇଁ କିଲୋମିଟର ପିଛା ୧ ପଇସା ବଢିଛି ଭଡା । ମେଲ୍ ଓ ଏକ୍ସପ୍ରେସ୍ ଟ୍ରେନ୍‌ରେ ନନ୍ ଏସି ପାଇଁ କିଲୋମିଟର ପିଛା ୨ ପଇସା, AC କ୍ଲାସ୍‌ ପାଇଁ ମଧ୍ୟ କିଲୋମିଟର ପିଛା ୨ ପଇସା ବୃଦ୍ଧି କରାଯାଇଛି । ସେହିଭଳି ନନ୍ ଏସିରେ ୫୦୦ କିମି ଯାତ୍ରା ପାଇଁ ଅଧିକ ୧୦ ଟଙ୍କା ଦେବାକୁ ପଡ଼ିବ । ଆସନ୍ତା ୨୬ ତାରିଖରୁ ଲାଗୁ ହେବ ଏହି ନୂଆ ଦର ।

ବର୍ଦ୍ଧିତ ଭଡା ଦ୍ୱାରା ଭାରତୀୟ ରେଲୱେ ଚଳିତ ବର୍ଷ ୬୦୦ କୋଟି ଟଙ୍କାର ଆୟ କରିବା ନେଇ ଅନୁମାନ କରାଯାଉଛି । ତେବେ ଲୋକାଲ ଟ୍ରେନ୍ ଓ ମାସିକିଆ ଟିକେଟରେ କୌଣସି ବୃଦ୍ଧି ନାହିଁ । ନୂଆ ଦର ଅନୁସାରେ, ଅର୍ଡିନାରୀ କ୍ଲାସ୍‌ରେ ୨୧୫ କିଲୋମିଟର ଯାତ୍ରା ପାଇଁ କୌଣସି ଅତିରିକ୍ତ ରାଶି ଦେବାକୁ ହେବନି ।

ଆମ ଦେଶରେ ଟ୍ରେନ ଯାତାୟତ ଓ ପରିବହନର ଏକ ପ୍ରମୁଖ ମାଧ୍ୟମ । ଗରିବଠୁ ନେଇ ସାଧାରଣ କର୍ମଚାରୀଟିଏ ପ୍ରତିଦିନ ଗନ୍ତବ୍ୟସ୍ଥଳରେ ପହଞ୍ଚିବା ପାଇଁ ଟ୍ରେନରେ ଯାତ୍ରା କରିଥାନ୍ତି । ଏମିତିରେ ବର୍ଷ ଶେଷରେ ଟ୍ରେନ ଭଡା ବଢିବା ଯାତ୍ରୀଙ୍କ ପାଇଁ ଝଟ୍‌କା ।