PF Withdrawal Goes Easy: କର୍ମଚାରୀଙ୍କ ପାଇଁ ଖୁସି ଖବର, ଏଣିକି ଏଟିଏମ୍‌ରୁ ଉଠିବ ପିଏଫ୍ ଟଙ୍କା

ଗୋଟିଏ କ୍ଲିକ୍‌ରେ ଟଙ୍କା ଆସିବ । ପିଏଫ୍‌ ଟଙ୍କା ଉଠାଇବାକୁ ଆଉ ମାସ ମାସ ଅପେକ୍ଷା କରିବାକୁ ପଡ଼ିବନି କି ୧୦ ପ୍ରକାର ଫର୍ମ ଭରିବାକୁ ବି ପଡିବନି । ଏବେଠୁ ସହଜ ହେବ ପିଏଫ୍ ଟଙ୍କା ଉଠାଣ । ୟୁପିଆଇ ଜରିଆରେ ଏଟିଏମ୍‌ରୁ ଉଠାଇପାରିବେ ପିଏଫ୍‌ ଟଙ୍କା । ଖୁବଶୀଘ୍ର ସରକାର ପିଏଫ୍‌ ଉଠାଣ ନିୟମରେ ପରିବର୍ତ୍ତନ କରିବାକୁ ଯାଉଛନ୍ତି । 

ପିଏଫ୍‌ ଉଠାଣ ଏକ ଜଟିଳ ପ୍ରକ୍ରିୟା, ଯାହାକୁ ନେଇ ଲୋକେ ଅନେକ ସମୟରେ ଅଭିଯୋଗ କରୁଥିବାର ଦେଖାଯାଏ । ଏକ କାର୍ଯ୍ୟକ୍ରମରେ କେନ୍ଦ୍ର ଶ୍ରମ ଓ ନିଯୁକ୍ତି ମନ୍ତ୍ରୀ ମନସୁଖ ମାଣ୍ଡଭୀୟ କହିଛନ୍ତି, ଖୁବଶୀଘ୍ର ପିଏଫ୍ ଉଠାଣ ପ୍ରକ୍ରିୟା ସହଜ ଓ ସରଳ ହେବ । ୨୦୨୬ ମାର୍ଚ୍ଚ ସୁଦ୍ଧା ପିଏଫ୍‌ ଆକାଉଣ୍ଟରୁ ସିଧା ୟୁପିଆଇ ଓ ଏଟିଏମ୍ ଜରିଆରେ ଟଙ୍କା ଉଠାଣର ସୁବିଧା ମିଳିବ । ଯାହାଫଳରେ କର୍ମଚାରୀମାନେ ଯେତେବେଳେ ଚାହିଁବେ ପିଏଫ୍‌ର ୭୫ ପ୍ରତିଶତ ରାଶି ଏଟିଏମ୍‌ରୁ ଉଠାଇ ପାରିବେ ।

ଜାଣନ୍ତୁ ଏହା କେମିତି ସମ୍ଭବ ହେବ ?

ବର୍ତ୍ତମାନ ପର୍ଯ୍ୟନ୍ତ ପିଏଫ୍‌ ଆକାଉଣ୍ଟକୁ ୟୁପିଆଇ ସହ ଲିଙ୍କ୍‌ କରିବାର କୌଣସି ବିକଳ୍ପ ନାହିଁ । ଯେବେ ଏହି ସୁବିଧା ଆରମ୍ଭ ହେବ, ଏଥିପାଇଁ କିଛି ଅନଲାଇନ ପ୍ରକ୍ରିୟା ରହିପାରେ । EPFO ମେମ୍ବର ପୋର୍ଟାଲ ଓ UMANG ଆପ୍‌ରେ ଏହି ସୁବିଧା ଉପଲବ୍ଧ ହୋଇପାରେ । ପିଏଫ୍‌ ଆକାଉଣ୍ଟକୁ ୟୁପିଆଇ ସହ ଯୋଡିବା ପାଇଁ 'Universal Account Number' ବା UAN  ଆକ୍ଟିଭ କରିବା ବାଧ୍ୟତାମୂଳକ ହେବ ।

ଆପଣଙ୍କର ମୋବାଇଲ ନମ୍ବର- ଆଧାର ଓ ବ୍ୟାଙ୍କ ଆକାଉଣ୍ଟ ସହ ଲିଙ୍କ୍‌ ରହିବା ଆବଶ୍ୟକ । ଏ ପୂରା ପ୍ରକ୍ରିୟା ଓଟିପି ଆଧାରିତ ଭେରିଫିକେସନ୍‌ ଦ୍ୱାରା ସମ୍ପୂର୍ଣ୍ଣ ହେବ ।
ହେଲେ ଏହି ପ୍ରକ୍ରିୟାକୁ ନେଇ EPFO ଏ ଯାଏଁ କୌଣସି ଗାଇଡଲାଇନ୍ ଜାରି କରିନାହିଁ । ଅନୁମାନ କରାଯାଉଛି ଯେ, 'Link PF with UPI' କିମ୍ବା 'PF Withdrawal via UPI' ଭଳି ଏକ ନୂଆ ଅପ୍ସନ ଦେଖାଯିବ । ଏହି ଅପ୍ସନକୁ କ୍ଲିକ୍‌ କରିବା ପରେ ପିଏଫ୍‌ ଖାତାଧାରକ ନିଜ UPI ଆଇଡି ରେଜିଷ୍ଟର କରିବେ । ଏହାପରେ ଗୁଗୁଲ ପେ, ଫୋନ ପେ, ପେ-ଟିଏମ୍‌  ଭଳି UPI ଆପ୍‌ ରେ ଏକ ନୋଟିଫିକେସନ ଆସିବ । ଯେଉଁଠି ପିଏଫ ଆକାଉଣ୍ଟକୁ ଯୋଡିବାକୁ ଅନୁମତି ଦେବାକୁ ହେବ ।

ଭେରିଫିକେସନ ସରିବା ପରେ ପିଏଫ୍‌ ଆକାଉଣ୍ଟ ୟୁପିଆଇ ସହ ଲିଙ୍କ୍ ହୋଇଯିବ । ଏହାପରେ ଆପଣ ଚାହିଁଲେ ୟୁପିଆଇ ଜରିଆରେ ପିଏଫ୍‌ ଆକାଉଣ୍ଟରୁ ବ୍ୟାଙ୍କ୍ ଆକାଉଣ୍ଟରୁ ଟଙ୍କା ଟ୍ରାନ୍ସଫର କରିପାରିବେ ଏବଂ ତୁରନ୍ତ ଏଟିଏମ୍‌ରୁ ଉଠାଇ ପାରିବେ । 

ପୁଣିଥରେ କହିରଖୁଛୁ କି, ଏହି ପ୍ରକ୍ରିୟା ନେଇ EPFO ଏ ଯାଏଁ କୌଣସି ସ୍ପଷ୍ଟ କରିନାହିଁ । ଖୁବଶୀଘ୍ର ଏ ସଂପର୍କିତ ଗାଇଡଲାଇନ୍ ଆସିପାରେ । କାହିଁକିନା ମନ୍ତ୍ରୀ କହିସାରିଲେଣି ।